అమెరికా కాలిఫోర్నియాలోని ఓక్లాండ్ ఎరీనా వేదికగా సిలికానాంధ్ర రజతోత్సవాలు రెండో రోజు కూడా అంగరంగ వైభవంగా కొనసాగుతున్నాయి. ప్రపంచ నలుమూలల నుంచి వేలాదిమంది ప్రవాస తెలుగువారు హాజరై తెలుగు సంస్కృతి, సంప్రదాయాల వైభవాన్ని ఆస్వాదిస్తున్నారు. ప్రస్తుతం జరుగుతున్న ఈ మహాసభలను లైవ్‌లో వీక్షించే అవకాశం కూడా అందుబాటులో ఉంది.
తెలుగు భాషా పరిరక్షణ, సంస్కృతి ప్రచారానికి గత 25 ఏళ్లుగా విశేష సేవలందిస్తున్న సిలికానాంధ్ర సంస్థ తన రజతోత్సవాలను అత్యంత ప్రతిష్ఠాత్మకంగా నిర్వహిస్తోంది. భావితరాలకు తెలుగు వారసత్వాన్ని అందించాలనే లక్ష్యంతో నిర్వహిస్తున్న ఈ వేడుకలు ప్రవాస భారతీయులను ఒకే వేదికపైకి తీసుకువచ్చాయి. రెండో రోజు కార్యక్రమాల్లో కుంభ హారతి, కూచిపూడి నృత్య ప్రదర్శనలు, సంగీత-లయ విన్యాసాలు, లలిత గీతాలు, శతక పద్యాల ఆలాపనలు, జానపద కళారూపాలు ప్రేక్షకులను అలరిస్తున్నాయి. సంగీతామృత వర్షిణి, లయామృత వర్షిణి బృందాల ప్రత్యేక ప్రదర్శనలు వేడుకలకు మరింత ఆకర్షణగా నిలిచాయి.
తెలుగు సంస్కృతిని ప్రపంచానికి చాటిచెప్పేలా ప్రతిష్ఠాత్మక గిన్నిస్ వరల్డ్ రికార్డ్ కార్యక్రమాలు కూడా ఈ మహాసభల్లో కొనసాగుతున్నాయి. అమెరికా నలుమూలల నుంచి వచ్చిన తెలుగు కుటుంబాలతో ఓక్లాండ్ ఎరీనా మొత్తం పండుగ వాతావరణాన్ని సంతరించుకుంది. సిలికానాంధ్ర రజతోత్సవాల రెండో రోజు కార్యక్రమాలను కింద ప్రత్యక్ష ప్రసారంలో (Live) వీక్షించవచ్చు.
