హైదరాబాద్, సెప్టెంబర్ 22 (జనవాణి): తెలంగాణలో మరోసారి వర్షాలు దంచికొట్టే అవకాశం ఉంది. రాబోయే ఐదురోజుల పాటు రాష్ట్రవ్యాప్తంగా భారీ నుంచి అత్యంత భారీ వర్షాలు కురిసే అవకాశం ఉందని హైదరాబాద్ ప్రాంతీయ వాతావరణ కేంద్రం వెల్లడించింది. పలు జిల్లాలకు రెడ్, ఆరెంజ్ అలెర్ట్‌లు జారీ చేసింది.
వాయుగుండం ప్రభావం
వాయువ్య బంగాళాఖాతంలో వాయుగుండం ఏర్పడిందని వాతావరణశాఖ తెలిపింది. ఇది గత ఆరు గంటల్లో గంటకు 18 కిలోమీటర్ల వేగంతో పశ్చిమ దిశగా కదులుతోంది. రానున్న 12 గంటల్లో పశ్చిమ-వాయువ్య దిశగా పయనిస్తూ తీవ్ర వాయుగుండంగా బలపడే అవకాశం ఉందని అంచనా వేసింది. ఆ తర్వాత పశ్చిమ-వాయువ్య దిశగా కదులుతూ బుధవారం రాత్రి లేదా గురువారం తెల్లవారుజామున ఉత్తర కోస్తాంధ్ర, దక్షిణ ఒడిశా తీర ప్రాంతాల మధ్య తీరం దాటే అవకాశం ఉందని తెలిపింది. ఈ వాయుగుండం ప్రభావంతో తెలంగాణలోనూ విస్తారంగా వర్షాలు కురిసే అవకాశాలున్నాయి.
బుధవారం పరిస్థితి
బుధవారం పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, మహబూబాబాద్, వరంగల్, హన్మకొండ జిల్లాల్లో అతిభారీ నుంచి అత్యంత భారీ వర్షాలు కురిసే అవకాశం ఉంది. ఈ జిల్లాలకు రెడ్ అలెర్ట్ జారీ చేశారు.
ఆసిఫాబాద్, మంచిర్యాల, జగిత్యాల, రాజన్న సిరిసిల్ల, కరీంనగర్, నల్గొండ, సూర్యాపేట, జనగాం, సిద్దిపేట జిల్లాలకు ఆరెంజ్ అలెర్ట్ ప్రకటించారు. పలు ప్రాంతాల్లో ఉరుములు, మెరుపులు, ఈదురుగాలులతో కూడిన వర్షాలు కురిసే అవకాశం ఉంది.
కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హన్మకొండ జిల్లాల్లో గంటకు 50-60 కిలోమీటర్ల వేగంతో ఈదురుగాలులు వీచే అవకాశం ఉందని వాతావరణశాఖ తెలిపింది.
గురువారం 8 జిల్లాలకు రెడ్ అలెర్ట్
గురువారం ఆసిఫాబాద్, మంచిర్యాల, కరీంనగర్, పెద్దపల్లి, జయశంకర్ భూపాలపల్లి, మహబూబాబాద్, వరంగల్, హన్మకొండ జిల్లాల్లో అతిభారీ నుంచి అత్యంత భారీ వర్షాలు కురిసే అవకాశం ఉంది. ఈ ఎనిమిది జిల్లాలకు రెడ్ అలెర్ట్ జారీ చేశారు. ఇతర జిల్లాల్లోనూ భారీ నుంచి అతిభారీ వర్షాలు కురిసే అవకాశం ఉందని అధికారులు తెలిపారు. పలు ప్రాంతాల్లో ఉరుములు, మెరుపులతో కూడిన వర్షాలు పడే అవకాశం ఉందని హెచ్చరించారు.
శుక్ర, శనివారాల్లోనూ వర్షాలు
శుక్రవారం ఆదిలాబాద్, ఆసిఫాబాద్, మంచిర్యాల, నిర్మల్, నిజామాబాద్, జగిత్యాల, రాజన్న సిరిసిల్ల జిల్లాల్లో అతిభారీ వర్షాలు కురిసే సూచనలు ఉన్నాయి. కరీంనగర్, పెద్దపల్లి, భూపాలపల్లి, ములుగు, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హన్మకొండ తదితర జిల్లాల్లోనూ భారీ వర్షాలు కురిసే అవకాశం ఉంది.
శనివారం ఆదిలాబాద్, ఆసిఫాబాద్, మంచిర్యాల జిల్లాల్లో అతిభారీ వర్షాలు పడే అవకాశం ఉందని వాతావరణశాఖ తెలిపింది. నిర్మల్, నిజామాబాద్, జగిత్యాల, రాజన్న సిరిసిల్ల, కరీంనగర్, పెద్దపల్లి, భూపాలపల్లి, కొత్తగూడెం, ఖమ్మం జిల్లాల్లో ఉరుములు, మెరుపులతో కూడిన భారీ వర్షాలు కురిసే అవకాశం ఉందని వెల్లడించింది.
వాయుగుండం ప్రభావంతో తెలంగాణలో రాబోయే రోజుల్లో వర్షాల తీవ్రత కొనసాగే అవకాశం ఉన్నందున ప్రజలు అప్రమత్తంగా ఉండాలని వాతావరణశాఖ సూచించింది.
