న్యూఢిల్లీలో కేంద్ర పర్యావరణ, అటవీ మరియు వాతావరణ మార్పుల శాఖ మంత్రి భూపేంద్ర యాదవ్‌ను తెలంగాణ శక్తి ( కార్మిక, ఉపాధి, శిక్షణ & ఫ్యాక్టరీస్) మరియు గనుల శాఖ మంత్రి డా. జి. వివేక్ వెంకటస్వామి, పెద్దపల్లి లోక్‌సభ సభ్యుడు గడ్డం వంశీకృష్ణ మర్యాదపూర్వకంగా కలిశారు. రాష్ట్రానికి సంబంధించిన పలు కీలక అంశాలపై చర్చించారు.
సింగరేణి సంస్థకు కేటాయించిన తాడిచర్ల బ్లాక్-2 ప్రాజెక్టుకు అవసరమైన పర్యావరణ అనుమతులు త్వరగా మంజూరు చేయాలని కేంద్ర మంత్రిని కోరారు. ఈ ప్రాజెక్టు ప్రారంభమైతే పెద్ద సంఖ్యలో ఉపాధి అవకాశాలు ఏర్పడటంతో పాటు స్థానిక ఆర్థిక వ్యవస్థకు ఊతం లభిస్తుందని వారు వివరించారు.
వెయ్యికి పైగా ఉద్యోగాల అవకాశం
తాడిచర్ల బ్లాక్-2 ప్రాజెక్టు అమల్లోకి వస్తే 1,000 మందికి పైగా ప్రత్యక్ష, పరోక్ష ఉద్యోగ అవకాశాలు కల్పించే అవకాశం ఉందని ఎంపీ గడ్డం వంశీకృష్ణ కేంద్ర మంత్రికి వివరించారు. ముఖ్యంగా స్థానిక యువతకు ఉపాధి కల్పించడంతో పాటు పారిశ్రామికాభివృద్ధికి ఈ ప్రాజెక్టు దోహదపడుతుందని తెలిపారు.
ఆర్‌కేపీ మైన్స్ అనుమతులపైనా విజ్ఞప్తి
తాడిచర్ల బ్లాక్-2తో పాటు ఆర్‌కేపీ మైన్స్‌కు కూడా పెండింగ్‌లో ఉన్న పర్యావరణ అనుమతులను వీలైనంత త్వరగా మంజూరు చేయాలని మంత్రి డా. జి. వివేక్ వెంకటస్వామి విజ్ఞప్తి చేశారు. ఈ ప్రాజెక్టుల అమలు రాష్ట్ర పారిశ్రామికాభివృద్ధికి, ఉపాధి కల్పనకు కీలకమని ఆయన వివరించారు.
సానుకూలంగా స్పందించిన కేంద్ర మంత్రి
ఈ అంశాలపై కేంద్ర మంత్రి భూపేంద్ర యాదవ్ సానుకూలంగా స్పందించినట్లు వెల్లడించారు. సంబంధిత అధికారులతో సమీక్షించి అవసరమైన చర్యలు తీసుకుంటామని ఆయన హామీ ఇచ్చినట్లు మంత్రి వివేక్ వెంకటస్వామి, ఎంపీ గడ్డం వంశీకృష్ణ తెలిపారు.
