తెలంగాణ అసెంబ్లీ వేదికగా మాజీ సీఎం కేసీఆర్, కల్వకుంట్ల కుటుంబంపై సీఎం రేవంత్ రెడ్డి తీవ్ర ఆరోపణలు చేశారు. తెలంగాణ ఉద్యమం, ధరణిని అడ్డుపెట్టుకుని భూముల వ్యవహారాల్లో అక్రమాలకు పాల్పడ్డారని ఆరోపించారు. కేసీఆర్ కుటుంబ సభ్యుల పేర్లపై ఉన్నట్లు పేర్కొన్న భూముల వివరాలను సభలో వెల్లడించారు. ఎర్రవెల్లిలోని కేసీఆర్ ఫాంహౌస్ భూములపై 30 రోజుల్లో విచారణ పూర్తి చేసి నివేదిక ఇవ్వాలని అధికారులను ఆదేశించారు.
తెలంగాణలో గత ప్రభుత్వం తీసుకొచ్చిన ధరణి పోర్టల్‌ పేదలు, రైతులు, భూయజమానులకు తీవ్ర ఇబ్బందులు తెచ్చిపెట్టిందని రాష్ట్ర రెవెన్యూ శాఖ మంత్రి పొంగులేటి శ్రీనివాస్‌రెడ్డి ఆరోపించారు. ధరణి సమస్యలను అప్పటి మంత్రులు, ఎమ్మెల్యేలు పలుమార్లు మాజీ సీఎం కేసీఆర్ దృష్టికి తీసుకెళ్లినా పరిష్కారం లభించలేదని విమర్శించారు. ధరణిలోని సాంకేతిక లోపాలు, ‘సీక్రెట్‌ లాక్‌’ల వ్యవస్థ, భూ రికార్డుల సమస్యలపై శాసనసభలో ఆయన తీవ్ర వ్యాఖ్యలు చేశారు.
ధరణి స్థానంలో తీసుకొచ్చిన భూభారతి విధానంపై బీజేపీ ఎంపీ ఈటల రాజేందర్ తీవ్ర విమర్శలు చేశారు. సెక్షన్ 22A కింద వందలాది కాలనీలను నిషేధిత జాబితాలో చేర్చడంతో పేదలు, మధ్యతరగతి ప్రజలు తమ ఇళ్లను విక్రయించలేక, బ్యాంకు రుణాలు పొందలేక ఇబ్బందులు పడుతున్నారని ఆరోపించారు. భూబాధితులకు మద్దతుగా సెప్టెంబర్ 5, 6 తేదీల్లో ఇందిరా పార్క్ వద్ద బీజేపీ దీక్ష చేపట్టనున్నట్లు ప్రకటించారు.
