దేశంలో బంగారం, వెండి ధరల్లో గత కొన్ని రోజులుగా తీవ్ర హెచ్చుతగ్గులు కొనసాగుతున్నాయి. శుక్రవారం గుడ్ రిటర్న్స్ వెల్లడించిన వివరాల ప్రకారం ఢిల్లీలో 24 క్యారెట్ల 10 గ్రాముల బంగారం రూ.1,52,980గా ఉండగా.. హైదరాబాద్‌లో రూ.1,52,830గా నమోదైంది. ఇక వెండి ధరలు కిలోకు రూ.2.45 లక్షల నుంచి రూ.2.50 లక్షల వరకు ఉన్నాయి.
పశ్చిమ ఆసియాలో కొనసాగుతున్న యుద్ధ ప్రభావంతో దేశీయ, అంతర్జాతీయ ఈక్విటీ మార్కెట్లు ఒడిదుడుకులకు గురవుతున్నాయి. మరోవైపు బులియన్ మార్కెట్లలో మిశ్రమ పరిస్థితి నెలకొంది. అంతర్జాతీయ మార్కెట్‌లో బంగారం, వెండి ధరలు పెరగగా.. దేశీయ స్పాట్ మార్కెట్‌లో మాత్రం బంగారం ధరలు భారీగా తగ్గాయి. వెండి ధరలో ఎలాంటి మార్పు కనిపించలేదు.
