జనవాణి టెక్నాలజీ డెస్క్ August 11: Claude Code ఉపయోగించే Pro, Max, Team ప్లాన్ యూజర్లకు Anthropic కీలక మార్పు ప్రకటించింది. ఇకపై కొత్త సెషన్లలో Auto Mode డిఫాల్ట్‌గా పనిచేయనుంది. అంటే ప్రతి టూల్ కాల్‌కు యూజర్ అనుమతి కోసం పదేపదే వేచి ఉండకుండా Claude స్వయంగా పనిని కొనసాగించగలదు. అదే సమయంలో ప్రమాదకరమైన, విధ్వంసకర లేదా వినియోగదారు పరిధి దాటి వెళ్లే చర్యలను గుర్తించి అడ్డుకునే భద్రతా వ్యవస్థ కూడా పనిచేస్తుంది. ఆగస్టు 14 నుంచి ఈ మార్పు అమల్లోకి రానుంది.
ఆటో మోడ్ అంటే ఏంటి?
ప్రస్తుతం Claude Codeలో అనేక కమాండ్లను అమలు చేసే ముందు యూజర్ అనుమతి ఇవ్వాల్సి ఉంటుంది. Auto Modeలో మాత్రం ప్రతి చర్యకు ప్రత్యేకంగా ప్రాంప్ట్ చూపించే విధానాన్ని తగ్గించి, ప్రతి టూల్ కాల్‌ను ప్రత్యేక క్లాసిఫైయర్ ద్వారా పరిశీలిస్తారు. ఆ చర్య ను తిరిగి మార్చలేమా, విధ్వంసకరమా, లేదా యూజర్ పనిచేస్తున్న పరిధి దాటి బయటకు వెళ్లే ప్రమాదం ఉందా అనే అంశాలను ఈ వ్యవస్థ పరిశీలిస్తుంది. ప్రమాదకరంగా కనిపించిన చర్యను బ్లాక్ చేస్తుంది. ఆ తర్వాత Claude సాధ్యమైనంత వరకు సురక్షితమైన ప్రత్యామ్నాయాన్ని వెతుకుతుంది లేదా యూజర్ అనుమతిని కోరుతుంది. వరుసగా మూడు బ్లాక్స్ లేదా ఒక సెషన్‌లో 20 బ్లాక్స్ ఎదురైతే మాన్యువల్ అప్రూవల్ విధానానికి తిరిగి వెళ్తుంది.
ఆగస్టు 14 నుంచి ఎవరికి వర్తిస్తుంది?
Pro, Max, Team ప్లాన్‌లలో ఆగస్టు 14 నుంచి ప్రారంభమయ్యే కొత్త Claude Code సెషన్లకు Auto Mode డిఫాల్ట్‌గా ఉంటుంది. అయితే ఇప్పటికే యూజర్ స్వయంగా మరో డిఫాల్ట్‌ను సెట్ చేసుకుని ఉంటే, దానిని మార్చాలా వద్దా అని ఒకసారి అడిగే అవకాశం ఉంటుంది.
ఇప్పటికే Auto Modeను పిన్ చేసిన యూజర్ల సెట్టింగుల్లో ఎలాంటి మార్పు ఉండదు. అలాగే Auto Mode క్లాసిఫైయర్‌కు అవసరమయ్యే అదనపు టోకెన్లపై ఇకపై Pro, Max, Team యూజర్ల నుంచి ప్రత్యేక ఛార్జీ వసూలు చేయబోమని Anthropic తెలిపింది.
Enterprise యూజర్లకు మాత్రం ఇప్పట్లో మార్పు లేదు
Claude Enterprise, Claude API, Claude Platform on AWS, Amazon Bedrock, Google Cloud's Agent Platform, Microsoft Foundry వంటి ప్లాట్‌ఫామ్‌లలో Auto Mode ప్రస్తుతానికి ఆప్షనల్‌గానే ఉంటుంది.
క్లౌడ్ భాగస్వాములతో కలిసి వచ్చే నెలలో ఈ ప్లాట్‌ఫామ్‌లలోనూ Auto Modeను డిఫాల్ట్‌గా మార్చే ప్రణాళిక ఉన్నట్లు Anthropic వెల్లడించింది. అప్పటివరకు Enterprise అడ్మిన్లు Managed Settings ద్వారా Auto Modeను డిఫాల్ట్‌గా సెట్ చేసుకోవచ్చు.
97 శాతం Permission Prompts లకు యూజర్లు ఓకే
Auto Modeను డిఫాల్ట్‌గా మార్చడానికి ప్రధాన కారణాల్లో ఒకటి Permission Prompts విషయంలో యూజర్ల ప్రవర్తన అని Anthropic తెలిపింది.
Claude Codeలో వచ్చే Permission Promptsలో సుమారు 97 శాతం అభ్యర్థనలకు యూజర్లు అనుమతి ఇస్తున్నట్లు కంపెనీ డేటా చెబుతోంది. సాధారణ, సురక్షితమైన కమాండ్లు ఎక్కువగా ఉండొచ్చని Anthropic పేర్కొన్నప్పటికీ.. ఇంత ఎక్కువ Approval Rate ఉండటం వల్ల యూజర్లు ప్రతి కమాండ్‌ను జాగ్రత్తగా పరిశీలించకుండా అలవాటుగా క్లిక్ చేస్తున్న అవకాశముందని తెలిపింది.
దీనికి మరో ఆసక్తికరమైన వ్యత్యాసాన్ని కంపెనీ గుర్తించింది. Claude ఒక ప్లాన్‌ను Approval కోసం చూపినప్పుడు యూజర్లు 39 శాతం సందర్భాల్లో తిరస్కరించగా, వ్యక్తిగత Permission Requests విషయంలో తిరస్కరణ రేటు కేవలం 3 శాతంగా ఉంది.
1,053 మంది ప్రొఫెషనల్స్‌తో పరీక్ష.. ఫలితాలు ఏంటి?
Auto Mode భద్రతను మాన్యువల్ రివ్యూతో పోల్చేందుకు Anthropic 1,053 మంది చెల్లింపు ప్రొఫెషనల్ టెస్టర్లతో కంట్రోల్డ్ స్టడీ నిర్వహించింది.
ఈ పరీక్షలో ప్రమాదకరమైన కమాండ్‌ను గుర్తించడంలో మాన్యువల్ రివ్యూ చేసిన టెస్టర్లు కేవలం 13.6 శాతం సందర్భాల్లోనే దాన్ని గుర్తించారు. అదే కమాండ్లను Auto Mode 89 శాతం సందర్భాల్లో బ్లాక్ చేసింది.
మొత్తం 1,053 పరీక్షల్లో యూజర్లు 143 ప్రమాదకర కమాండ్లను గుర్తించగా.. Auto Mode 937 కమాండ్లను బ్లాక్ చేసింది. ఒకరితో ఒకరు పోల్చినప్పుడు Auto Mode యూజర్లు అనుమతించిన 800 ప్రమాదకర కమాండ్లను అడ్డుకోగా, Auto Mode అనుమతించిన వాటిలో కేవలం ఆరు కమాండ్లను మాత్రమే మనుషులు అడ్డుకున్నారని కంపెనీ తెలిపింది. సెషన్ ఎక్కువసేపు సాగితే మాన్యువల్ రివ్యూ మరింత బలహీనపడినట్లు కూడా అధ్యయనంలో తేలింది.
దీర్ఘకాలిక పనులకు మరింత ఉపయోగం
Auto Mode వల్ల Claude Codeను ఎక్కువసేపు ఆటోమేటిక్‌గా పనిచేయడానికి వదిలేయడం సాధ్యమవుతుంది. ముఖ్యంగా గంటల తరబడి కొనసాగే పెద్ద కోడింగ్ లేదా రీసెర్చ్ పనులకు ఇది ఉపయోగపడుతుందని Anthropic చెబుతోంది.
కంపెనీ ప్రకారం Teams, Enterpriseలో Auto Mode ఉపయోగిస్తున్న సంస్థల యూజర్లు దాదాపు 25 శాతం ఎక్కువ PRలను పూర్తి చేస్తున్నారు. Adobe, Nuro, Gusto, Garner Health వంటి సంస్థలు ఇప్పటికే Auto Modeను తమ ప్రొడక్షన్ డిఫాల్ట్‌గా ఉపయోగిస్తున్నాయి.
Prompt Injectionకు రక్షణ ఎలా?
Auto Modeలో ప్రమాదకర కమాండ్లను మాత్రమే కాకుండా Prompt Injection దాడులను ఎదుర్కొనే అదనపు భద్రతా పొరను కూడా ఉపయోగిస్తున్నట్లు Anthropic తెలిపింది.
బయటి వెబ్‌పేజీలు, ఫైల్ కంటెంట్ లేదా ఇతర టూల్ అవుట్‌పుట్ల నుంచి వచ్చే హానికర సూచనలను పరిశీలించి.. అవి Claude ప్రవర్తనను మార్చేందుకు ప్రయత్నిస్తున్నాయా లేదా అన్నది గుర్తించే వ్యవస్థను Auto Modeలో చేర్చారు.
మూడు ప్రమాదకర చర్యలను అడ్డుకున్న Auto Mode
Anthropic తన అంతర్గత వినియోగంలో Auto Mode అడ్డుకున్న మూడు ఉదాహరణలను కూడా వెల్లడించింది. ఒక సందర్భంలో అంతర్గత డ్రైవ్‌కు ఫైల్ అప్‌లోడ్ విఫలమైన తర్వాత Claude అదే నివేదికను పబ్లిక్ కోడ్-షేరింగ్ సైట్‌లో ప్రచురించేందుకు ప్రయత్నించింది. Auto Mode ఆ చర్యను అడ్డుకుంది.
మరో సందర్భంలో దాదాపు 2,000 podsను ఒకేసారి నిలిపివేయడంతో పాటు వందలాది GPU ట్రైనింగ్ జాబ్స్‌ను తొలగించే ప్రమాదకర చర్యలను Auto Mode గుర్తించింది.
ఇంకో సందర్భంలో కేవలం Read-only billing access కోరినప్పటికీ, Claude పూర్తి అడ్మినిస్ట్రేటివ్ నియంత్రణ కలిగిన క్లౌడ్ రోల్‌ను ఎంచుకునే ప్రయత్నం చేసింది. యూజర్ కోరిన అనుమతులకు, ఇవ్వబోయే అధికారాలకు మధ్య ఉన్న తేడాను Auto Mode గుర్తించి అడ్డుకుంది.
డేటా లీక్‌లపై Hard Deny
Auto Modeలో డేటా ఎక్స్‌ఫిల్ట్రేషన్ వంటి కొన్ని చర్యలకు మరింత కఠినమైన నియంత్రణలు ఉన్నాయి. కోడ్ లేదా సీక్రెట్స్‌ను బాహ్య ప్రదేశానికి పంపడం వంటి చర్యలను క్లాసిఫైయర్ ఎప్పటికీ అనుమతించకూడని విభాగంలో ఉంచినట్లు Anthropic తెలిపింది.
అలాంటి చర్యను అమలు చేయాలంటే Auto Mode నుంచి బయటకు వచ్చి యూజర్ స్వయంగా కమాండ్‌ను అమలు చేయాల్సి ఉంటుంది. సంస్థలు తమకు అవసరమైన అదనపు Hard Deny నియమాలను కూడా ఏర్పాటు చేసుకోవచ్చు.
ఇక Claude Code ఎలా మారుతుంది?
మొత్తంగా చూస్తే Claude Codeలో Auto Mode డిఫాల్ట్‌గా మారడం వల్ల యూజర్లకు పదేపదే Permission Prompts రావడం తగ్గుతుంది. అదే సమయంలో AI ఏదైనా ప్రమాదకర చర్యకు పాల్పడే అవకాశం ఉన్నప్పుడు ప్రత్యేక భద్రతా క్లాసిఫైయర్ అడ్డుగా నిలుస్తుంది.
అయితే ఇది పూర్తిగా రిస్క్ లేని వ్యవస్థ అని అర్థం కాదు. Anthropic స్వయంగా తన adversarial testingలో Auto Modeకు మిస్ అయిన దాడులు కూడా ఉన్నాయని పేర్కొంది. అందువల్ల Auto Modeను వేగవంతమైన, ఎక్కువ స్వయంప్రతిపత్తితో పనిచేసే భద్రతా విధానంగా చూడాలి.
ఆగస్టు 14 నుంచి Pro, Max, Team ప్లాన్‌లలో కొత్త Claude Code సెషన్లు ఈ కొత్త డిఫాల్ట్‌తో ప్రారంభం కానున్న నేపథ్యంలో.. డెవలపర్లకు AI ఆధారిత కోడింగ్‌లో మరింత నిరంతరాయమైన వర్క్‌ఫ్లో అందుబాటులోకి రానుంది.
