చాలా కాలం తర్వాత ప్రధాని నరేంద్ర మోదీ ఆంధ్రప్రదేశ్‌లో పర్యటిస్తున్నారు. ఉత్తరాంధ్ర ప్రజలు ఎంతోకాలంగా ఎదురుచూస్తున్న భోగాపురం అల్లూరి సీతారామరాజు అంతర్జాతీయ విమానాశ్రయాన్ని ఆయన నేడు జాతికి అంకితం చేయనున్నారు. ఈ కార్యక్రమాన్ని రాష్ట్ర ప్రభుత్వం ప్రతిష్ఠాత్మకంగా నిర్వహిస్తోంది.
భోగాపురం ఎయిర్‌పోర్ట్‌ను అంతర్జాతీయ ప్రమాణాలతో అభివృద్ధి చేశారు. సుమారు 3.8 కిలోమీటర్ల పొడవైన రన్‌వే, అత్యాధునిక ప్రయాణికుల టెర్మినల్, ప్రత్యేక కార్గో టెర్మినల్, ఆధునిక ఎయిర్ ట్రాఫిక్ కంట్రోల్ (ATC) టవర్ ఈ విమానాశ్రయ ప్రధాన ఆకర్షణలు.
సముద్రతీర ప్రాంతానికి అనుగుణంగా 'ఎగిరే చేప' (Flying Fish) ఆకృతిలో టెర్మినల్‌ను రూపకల్పన చేశారు. విమానాశ్రయం లోపల ఏటికొప్పాక బొమ్మలు, తోలుబొమ్మలాట, బొబ్బిలి వీణ వంటి ఆంధ్రప్రదేశ్ సంప్రదాయ కళలను ప్రతిబింబించే అలంకరణలు ప్రత్యేక ఆకర్షణగా నిలుస్తున్నాయి.
ప్రధాని మోదీకి ఘన స్వాగతం పలికేందుకు భారీ ఏర్పాట్లు చేశారు. కార్యక్రమానికి సుమారు మూడు లక్షల మంది హాజరవుతారని అధికారులు అంచనా వేస్తున్నారు. అలాగే 13,750 మంది గిరిజన మహిళలు సంప్రదాయ ధింసా నృత్యంతో ప్రధానమంత్రికి స్వాగతం పలకనున్నారు.
భోగాపురం అంతర్జాతీయ విమానాశ్రయం ప్రారంభంతో ఉత్తరాంధ్రలో పర్యాటకం, పారిశ్రామిక పెట్టుబడులు, వాణిజ్యం మరింత వేగం అందుకుంటాయని ప్రభుత్వం భావిస్తోంది. ఈ ప్రాజెక్ట్ ద్వారా వేలాది మందికి ప్రత్యక్ష ఉపాధి, లక్షల మందికి పరోక్ష ఉపాధి అవకాశాలు లభించే అవకాశం ఉందని అధికారులు చెబుతున్నారు.
