సోషల్ మీడియాలో వైరల్ అవుతున్న ఓ రియల్ ఎస్టేట్ ప్రకటనపై తిరుమల తిరుపతి దేవస్థానం తీవ్రంగా స్పందించింది. "SCP Developers" పేరుతో కొందరు వ్యక్తులు తిరుపతి హైవే వద్ద ప్లాట్లు కొనుగోలు చేస్తే జీవితాంతం శ్రీవారి వీఐపీ బ్రేక్ దర్శనం కల్పిస్తామని ప్రచారం చేస్తూ విడుదల చేసిన రీల్స్‌ను టీటీడీ ఖండించింది.
టీటీడీతో ఎలాంటి సంబంధం లేదు
సదరు ప్రచారానికి టీటీడీతో ఎలాంటి సంబంధం లేదని అధికారులు స్పష్టం చేశారు. శ్రీవారి దర్శనాలకు సంబంధించిన సేవలు, టికెట్లు, వీఐపీ బ్రేక్ దర్శనాలు పూర్తిగా టీటీడీ నిబంధనలు, మార్గదర్శకాల ప్రకారమే అమలులో ఉంటాయని పేర్కొన్నారు. ఇటువంటి హామీలు ఇచ్చే అధికారం ఏ ప్రైవేట్ సంస్థకు గానీ, వ్యక్తికి గానీ లేదని స్పష్టం చేశారు.
భక్తులు అప్రమత్తంగా ఉండాలి
టీటీడీ పేరు, శ్రీవారి పేరును ఉపయోగించి భక్తులను ఆకర్షించేలా తప్పుడు ప్రకటనలు చేయడం బాధ్యతారాహిత్యమని అధికారులు పేర్కొన్నారు. సోషల్ మీడియా రీల్స్, వాణిజ్య ప్రకటనలను నమ్మి ఎవరూ మోసపోవద్దని భక్తులకు విజ్ఞప్తి చేశారు.
అధికారిక సమాచారాన్నే విశ్వసించాలి
శ్రీవారి దర్శనాలకు సంబంధించిన సమాచారం కోసం టీటీడీ అధికారిక ప్రకటనలు, అధికారిక వెబ్‌సైట్, అధికారిక సోషల్ మీడియా ఖాతాలను మాత్రమే విశ్వసించాలని సూచించారు. ఇతర వేదికల్లో వచ్చే ప్రచారాన్ని నమ్మే ముందు నిజానిజాలు నిర్ధారించుకోవాలని కోరారు.
పోలీసులకు ఫిర్యాదు
టీటీడీ విజిలెన్స్ అధికారులు విచారణ చేపట్టిన నేపథ్యంలో సదరు సంస్థ తమ వ్యాపార ప్రకటనను సోషల్ మీడియా నుంచి తొలగించినట్లు గుర్తించినట్టు తెలిపారు. అయినప్పటికీ, టీటీడీ పేరు, శ్రీవారి ప్రతిష్ఠను వ్యాపార ప్రయోజనాల కోసం వినియోగిస్తూ భక్తులను తప్పుదోవ పట్టించేందుకు ప్రయత్నించారనే ఆరోపణలపై ఆ సంస్థపై పోలీసులకు ఫిర్యాదు చేసి కఠిన చట్టపరమైన చర్యలు తీసుకోనున్నట్లు టీటీడీ వెల్లడించింది.
