విశాఖలో నడిరోడ్డుపై స్టూడెంట్స్ గ్యాంగ్‌వార్.. ప్రేమ వ్యవహారమే కారణమా?.

జనవాణి: విశాకపట్నం August 22: విశాఖపట్నం: ఇద్దరు విద్యార్థుల మధ్య మొదలైన చిన్న వివాదం.. చివరకు గ్యాంగ్‌వార్‌గా మారింది. నడిరోడ్డుపై రెండు వర్గాలుగా విడిపోయిన యువకులు పరస్పరం దాడులు చేసుకున్న ఘటన విశాఖలో ఆలస్యంగా వెలుగులోకి వచ్చింది. తిమ్మాపురం రోడ్డులోని శివశక్తినగర్‌లో రెండు రోజుల క్రితం జరిగిన ఈ ఘటనకు ప్రేమ వ్యవహారమే కారణమని సమాచారం. ఘర్షణ సమయంలో అటుగా వెళ్తున్న ఓ బైకర్‌ను సైతం ఆపి యువకులు దాడి చేసినట్లు తెలుస్తోంది.

ఇద్దరు విద్యార్థుల మధ్య వివాదమే మొదలు

చంద్రంపాలెం పాఠశాలలో ఇద్దరు విద్యార్థుల మధ్య తలెత్తిన వివాదం క్రమంగా ముదిరినట్లు సమాచారం. ఈ గొడవకు ప్రేమ వ్యవహారం కారణమని స్థానికంగా ప్రచారం జరుగుతోంది. అనంతరం ఇరువర్గాల విద్యార్థులు, యువకులు ఇందులోకి రావడంతో వివాదం పెద్దదిగా మారినట్లు తెలుస్తోంది.

నడిరోడ్డుపై రెండు వర్గాలుగా..

తిమ్మాపురం రోడ్డులోని శివశక్తినగర్‌ ప్రాంతంలో రెండు వర్గాలుగా విడిపోయిన యువకులు పరస్పరం కొట్టుకున్నట్లు సమాచారం. ఒక్కసారిగా రోడ్డుపై పెద్ద సంఖ్యలో యువకులు చేరి గొడవకు దిగడంతో స్థానికులు ఆందోళనకు గురయ్యారు. ఘర్షణ జరుగుతున్న సమయంలో అటుగా వెళ్తున్న ఓ బైకర్‌ను సైతం యువకులు ఆపినట్లు తెలుస్తోంది. అనంతరం అతడిపై కూడా దాడి చేసినట్లు సమాచారం.

గురువారం రాత్రి మళ్లీ ప్రయత్నం

ఇదిలా ఉండగా.. గురువారం రాత్రి కూడా యువకులు మరోసారి ఘర్షణకు ప్రయత్నించినట్లు తెలుస్తోంది. విషయం తెలుసుకున్న పోలీసులు అక్కడికి చేరుకోవడంతో యువకులు అక్కడి నుంచి పరారైనట్లు సమాచారం. యువకుల్లో పలువురు మద్యం సేవించినట్లు స్థానికంగా సమాచారం అందిందని పోలీసులు గుర్తించినట్లు తెలుస్తోంది. ఘటనపై పూర్తి వివరాలను పోలీసులు సేకరిస్తున్నారు.

17 మంది అదుపులోకి

ఈ ఘటనకు సంబంధించి మొత్తం 20 మంది యువకులను పోలీసులు గుర్తించినట్లు సమాచారం. వారిలో 17 మందిని అదుపులోకి తీసుకుని విచారించినట్లు తెలుస్తోంది. కాగా, ఆరుగురిపై కేసు నమోదు చేసినట్లు సమాచారం. వీరిలో ముగ్గురు మేజర్లు కాగా.. మరో ముగ్గురు మైనర్లు ఉన్నట్లు తెలుస్తోంది. మైనర్ల విషయంలో నిబంధనల ప్రకారం పోలీసులు చర్యలు తీసుకుంటున్నట్లు సమాచారం.

చిన్న గొడవ.. గ్యాంగ్‌వార్‌గా మారడంతో ఆందోళన

విద్యార్థుల మధ్య మొదలైన వివాదం పెద్ద సంఖ్యలో యువకులు చేరడంతో గ్యాంగ్‌వార్‌ స్థాయికి చేరుకోవడంపై స్థానికులు ఆందోళన వ్యక్తం చేస్తున్నారు. ముఖ్యంగా బహిరంగ ప్రదేశంలో నడిరోడ్డుపై ఘర్షణకు దిగడం, అటుగా వెళ్లే వ్యక్తిపైనా దాడికి పాల్పడినట్లు సమాచారం రావడం కలకలం రేపుతోంది.