భోగాపురంలోని అల్లూరి సీతారామరాజు అంతర్జాతీయ విమానాశ్రయం కేవలం విమానాలు దిగే, ఎగిరే కేంద్రం కాదు. ఇది పర్యాటకం, పారిశ్రామికాభివృద్ధి, ఎగుమతులు, ఉపాధి, అంతర్జాతీయ పెట్టుబడులకు కొత్త ద్వారంగా మారబోతోంది. మరి ఈ ఎయిర్‌పోర్టు ఎందుకంత ప్రత్యేకం? దేశంలో దీనికి ఉన్న ప్రత్యేకతలేంటి?
రాష్ట్ర విభజన తర్వాత తొలి మెగా అంతర్జాతీయ విమానాశ్రయం
ఆంధ్రప్రదేశ్ విభజన తర్వాత నిర్మితమైన తొలి అతిపెద్ద అంతర్జాతీయ విమానాశ్రయం ఇదే. విశాఖపట్నం తర్వాత ఉత్తరాంధ్రకు మరో అంతర్జాతీయ గేట్‌వేగా నిలవనుంది.
భోగాపురం ఎయిర్‌పోర్టులో 3.8 కిలోమీటర్ల పొడవుతో రెండు రన్‌వేలను నిర్మించారు. ఎయిర్‌బస్, బోయింగ్ వంటి భారీ విమానాలు సైతం ఎలాంటి ఇబ్బంది లేకుండా ల్యాండింగ్, టేకాఫ్ చేయగలవు. భవిష్యత్తు విమాన రద్దీని దృష్టిలో పెట్టుకొని ఈ ప్రణాళిక రూపొందించారు.
కేవలం ప్రయాణికుల కోసమే కాదు.. కార్గో హబ్ కూడా
5 వేల చదరపు మీటర్ల కార్గో టెర్మినల్ ద్వారా ఏటా 25 వేల టన్నుల సరుకు రవాణా చేయగల సామర్థ్యం ఉంది. ఉత్తరాంధ్రలోని ఆక్వా, ఫార్మా, వ్యవసాయ ఉత్పత్తులు, సముద్ర ఆహార ఎగుమతులకు ఇది కీలకంగా మారనుంది.
79 వేల చదరపు మీటర్ల విస్తీర్ణంలో రెండు అంతస్తులతో రూపొందిన ప్రయాణికుల టెర్మినల్‌లో వేగవంతమైన చెక్‌ఇన్, సెల్ఫ్ చెక్‌ఇన్, ఆధునిక భద్రతా వ్యవస్థలు, అంతర్జాతీయ ప్రమాణాల వసతులు అందుబాటులో ఉంటాయి.
ఎగిరే చేప ఆకృతిలో డిజైన్
భోగాపురం సముద్ర తీరానికి సమీపంలో ఉండటంతో టెర్మినల్‌ను ఎగిరే చేప (Flying Fish) ఆకృతిలో రూపొందించారు. ఇది దేశంలోని అత్యంత ఆకర్షణీయమైన విమానాశ్రయ డిజైన్లలో ఒకటిగా నిలుస్తోంది.
విమానాశ్రయంలోకి అడుగుపెట్టగానే ఆంధ్రప్రదేశ్ సంస్కృతి కనిపించేలా ప్రత్యేకంగా తీర్చిదిద్దారు. ఏటికొప్పాక బొమ్మలు, తోలు బొమ్మలాట, బొబ్బిలి వీణ, అరసవల్లి, శ్రీకూర్మం, సింహాచలం, కనకమహాలక్ష్మి ఆలయం, థింసా నృత్యం వంటి కళా, సాంస్కృతిక అంశాలను టెర్మినల్ గోడలపై ప్రతిష్ఠించారు.
ఏరో సిటీతో కొత్త ఎకానమీ
ఎయిర్‌పోర్టుతో పాటు హోటళ్లు, కమర్షియల్ హబ్‌లు, కార్యాలయాలు, వినోద కేంద్రాలతో కూడిన జీఎంఆర్ ఏరో సిటీ అభివృద్ధి చేయనున్నారు. దీని వల్ల భోగాపురం ప్రాంతం కొత్త ఆర్థిక కేంద్రంగా మారే అవకాశాలున్నాయి.
25 ఎకరాల్లో మెయింటెనెన్స్, రిపేర్ అండ్ ఓవర్‌హాల్ (MRO) సదుపాయం ఏర్పాటు చేస్తున్నారు. దీంతో విమానాల నిర్వహణ, మరమ్మతుల కోసం ఇతర రాష్ట్రాలపై ఆధారపడాల్సిన అవసరం తగ్గుతుంది.
లక్షలాది ఉద్యోగాలకు అవకాశం
ఈ ప్రాజెక్టు ద్వారా ప్రత్యక్షంగా సుమారు 15 వేల మందికి, పరోక్షంగా ఉత్తరాంధ్రలో దాదాపు 5.85 లక్షల మందికి ఉపాధి అవకాశాలు ఏర్పడతాయని అంచనా. పర్యాటకం, రవాణా, హోటళ్లు, లాజిస్టిక్స్, రిటైల్ రంగాలు వేగంగా అభివృద్ధి చెందనున్నాయి.
మొదటి దశలో ఏడాదికి 60 లక్షల మంది ప్రయాణికులను నిర్వహించే సామర్థ్యం ఉండగా, రెండో దశలో 1.20 కోట్లు, మూడో దశలో 1.80 కోట్ల మంది ప్రయాణికులను నిర్వహించేలా విస్తరణ ప్రణాళిక రూపొందించారు. భవిష్యత్ అవసరాలను దృష్టిలో పెట్టుకొని ఎయిర్‌పోర్టును నిర్మించారు.
భోగాపురం ఎయిర్‌పోర్టు గురించి..
నిర్మాణ వ్యయం: రూ.4,750 కోట్లు
విస్తీర్ణం: 2,203 ఎకరాలు
రెండు రన్‌వేలు
79,000 చదరపు మీటర్ల టెర్మినల్
40 చెక్‌ఇన్ కౌంటర్లు
10 ఇమిగ్రేషన్ కౌంటర్లు
5 డొమెస్టిక్, 2 ఇంటర్నేషనల్ బ్యాగేజ్ బెల్ట్‌లు
గంటకు 275 కి.మీ. వేగంతో వీచే గాలులను తట్టుకునే నిర్మాణం
సెల్ఫ్ చెక్‌ఇన్, ఆధునిక భద్రతా వ్యవస్థలు
ఏరో సిటీ, కార్గో హబ్, ఎంఆర్వో, ఏవియేషన్ యూనివర్సిటీ
భోగాపురం అంతర్జాతీయ విమానాశ్రయం కేవలం ఒక రవాణా ప్రాజెక్టు కాదు. ఉత్తరాంధ్ర అభివృద్ధి దిశను మార్చగల మౌలిక సదుపాయంగా దీనిని విశ్లేషకులు భావిస్తున్నారు. పర్యాటకం నుంచి పరిశ్రమల వరకు, ఎగుమతుల నుంచి ఉపాధి వరకు అనేక రంగాలకు ఇది కొత్త ఊపునివ్వనుంది. అందుకే భోగాపురం ఎయిర్‌పోర్టును ఆంధ్రప్రదేశ్ భవిష్యత్తుకు కొత్త గేట్‌వేగా అభివర్ణిస్తున్నారు.
