తాడేపల్లి, ఆగస్టు 9 (జనవాణి): డీఎస్సీ నియామకాల్లో చోటుచేసుకున్నట్లు ఆరోపిస్తున్న అక్రమాలపై సీబీఐతో దర్యాప్తు జరిపించాలని వైఎస్సార్‌సీపీ ఎమ్మెల్సీ పర్వతరెడ్డి చంద్రశేఖర్‌రెడ్డి డిమాండ్‌ చేశారు. దర్యాప్తు పారదర్శకంగా జరగాలంటే ముందుగా విద్యాశాఖ మంత్రి నారా లోకేష్‌ రాజీనామా చేయాలని కోరారు. తాడేపల్లిలోని వైఎస్సార్‌సీపీ కేంద్ర కార్యాలయంలో ఆదివారం ఆయన మీడియాతో మాట్లాడారు.
డీఎస్సీని రద్దు చేయాలని, ఇప్పటికే ఉద్యోగాలు పొందిన వారి ఉద్యోగాలు తొలగించాలని తాము కోరడం లేదని పర్వతరెడ్డి స్పష్టం చేశారు. నియామక ప్రక్రియలో అక్రమాలు జరిగాయన్న ఆరోపణలపై సీబీఐ దర్యాప్తు మాత్రమే కోరుతున్నామని తెలిపారు. దర్యాప్తులో తప్పులు రుజువైతే ఎలాంటి చర్యలు తీసుకోవాలన్నది కోర్టులు నిర్ణయిస్తాయని అన్నారు.
డీఎస్సీ అక్రమాలపై ఇప్పటికే అనేక ఆధారాలు బయటపెట్టామని పర్వతరెడ్డి పేర్కొన్నారు. ఎస్సీఈఆర్టీలో డేటా ఎంట్రీ ఆపరేటర్‌గా పనిచేసిన నవీన్‌ వ్యవహారం కీలకమని, ఆయన ద్వారా విద్యార్థులు, కోచింగ్‌ సెంటర్లకు ప్రశ్నపత్రాలు చేరాయన్న ఆరోపణలు వస్తున్నాయని చెప్పారు. ఆయా ఆరోపణలపై సమగ్ర దర్యాప్తు జరగాల్సిన అవసరం ఉందన్నారు.
స్పోర్ట్స్‌ కోటాలో అక్రమాలు జరిగాయని ఆరోపణ
డీఎస్సీ నియామకాల్లో స్పోర్ట్స్‌ కోటా కూడా అక్రమాలకు కేంద్రంగా మారిందని పర్వతరెడ్డి ఆరోపించారు. ప్రభుత్వం జారీ చేసిన రెండు జీవోలలోనే అక్రమాలకు అవకాశం కల్పించే నిబంధనలు ఉన్నాయని విమర్శించారు. కొన్ని అభ్యర్థుల స్పోర్ట్స్‌ సర్టిఫికెట్ల విషయంలో నిబంధనలకు విరుద్ధంగా వ్యవహరించారని, ఒకరి హయ్యస్ట్‌ అచీవ్‌మెంట్‌ సర్టిఫికెట్‌కు మరొకరి బ్యాకప్‌ సర్టిఫికెట్‌ జతచేసిన సందర్భాలు ఉన్నాయని అన్నారు.
సర్టిఫికెట్లలో పేర్లు, సంతకాలు లేని సందర్భాలు కూడా ఉన్నాయని చెప్పారు. వెబ్‌సైట్‌లో అందుబాటులో ఉంచిన స్పోర్ట్స్‌ సర్టిఫికెట్లలో ఇటీవల మార్పులు చేశారని ఆరోపించారు. తాము గతంలోనే వాటిని డౌన్‌లోడ్‌ చేసుకున్నామని, దర్యాప్తులో అసలు విషయాలు బయటపడతాయని తెలిపారు.
నార్మలైజేషన్‌పైనా అభ్యంతరం
రిజర్వేషన్లు, నార్మలైజేషన్‌ విధానంలోనూ అన్యాయం జరిగిందని పర్వతరెడ్డి ఆరోపించారు. నెల రోజుల పాటు డీఎస్సీ పరీక్షలు నిర్వహించి, వివిధ సెషన్లకు వేర్వేరుగా మార్కులు కలపడం వల్ల అభ్యర్థులు నష్టపోయారని అన్నారు. కొన్ని సెషన్లలో ఆరు మార్కుల వరకు కలిపారని, దీంతో స్వల్ప తేడాతో ఉద్యోగాలు కోల్పోయే పరిస్థితి ఏర్పడిందని పేర్కొన్నారు.
టెట్‌ అర్హతకు సంబంధించిన నిబంధనలను కూడా సక్రమంగా అమలు చేయలేదని ఆరోపించారు. రిజర్వేషన్‌ ప్రక్రియలోనూ నిబంధనలు పాటించలేదని అన్నారు. ఈ అంశాలన్నింటిపై సీబీఐ దర్యాప్తు జరిగితే వాస్తవాలు వెలుగులోకి వస్తాయని తెలిపారు.
డీఎస్సీ అక్రమాలపై వైఎస్సార్‌సీపీ చేస్తున్న పోరాటాన్ని కొనసాగిస్తామని, త్వరలో జరిగే శాసనమండలి సమావేశాల్లోనూ ఈ అంశాన్ని ప్రభుత్వం దృష్టికి తీసుకెళ్తామని పర్వతరెడ్డి వెల్లడించారు.
డీఎస్సీపై పాటలు పాడితే కేసులా?
డీఎస్సీ అక్రమాలను ప్రశ్నిస్తూ వైఎస్సార్‌సీపీ చేపట్టిన నిరసనల్లో పాటలు పాడినందుకు కేసులు నమోదు చేయడాన్ని పర్వతరెడ్డి తప్పుబట్టారు. రాజకీయ కార్యక్రమాల్లో గతంలో వివిధ పార్టీలు పాటలు, నినాదాలు ఉపయోగించాయని పేర్కొన్నారు. డీఎస్సీపై తాము ఉద్యోగాలు పొందిన అభ్యర్థులకు వ్యతిరేకం కాదని, కేవలం అక్రమాలపై సీబీఐ దర్యాప్తు కోరుతున్నామని స్పష్టం చేశారు.
డీఎస్సీలో ఎలాంటి అక్రమాలు జరగకపోతే దర్యాప్తులో సంబంధిత వారికి క్లీన్‌చిట్‌ వస్తుందని అన్నారు. అలాంటప్పుడు సీబీఐ దర్యాప్తును ఎందుకు వ్యతిరేకిస్తున్నారని ప్రశ్నించారు. లోకేష్‌ రాజీనామా చేసిన తర్వాతే సీబీఐ దర్యాప్తు జరగాలని పర్వతరెడ్డి చంద్రశేఖర్‌రెడ్డి డిమాండ్‌ చేశారు.
