కొన్ని సినిమాలు ఎన్ని సార్లు చూసినా బోర్ కొట్టవు. చూసిన ప్రతీ సారి మళ్లీ కొత్తగా చూస్తున్నట్లే అనిపిస్తుంది. అలాంటి సినిమాల్లో 'దిల్‌వాలే దుల్హానియా లేజాయేంగే' ఒకటి. ఎవర్‌గ్రీన్ కల్ట్ క్లాసిక్ లవ్ స్టోరీ సినిమాల్లో ఈ మూవీ టాప్ ప్లేస్‌లో ఉంటుంది. అసలు చాలా మంది హిందీ భాష రాని వాళ్లు కూడా ఈ సినిమా కోసం అప్పట్లో థియేటర్‌లకు ఎగబడ్డారంటే ఎంత గొప్ప లవ్ స్టోరీ మూవీనో ప్రత్యేకించి చెప్పనవసరం లేదు. ఆదిత్య చోప్రా దర్శకత్వం వహించిన ఈ సినిమాలో షారుఖ్ ఖాన్, కాజోల్ హీరో, హీరోయిన్‌లుగా నటించారు. సినిమా వచ్చి మూడు దశాబ్దాలు దాటుతున్నా సరే.. ఇప్పటికీ ఈ సినిమాకున్న యుఫోరియా ఏ మాత్రం తగ్గలేదు అనడంలో అతిశయొక్తి కాదు.
ఆదిత్య చోప్రా దర్శఖత్వ వహించిన ఈ సినిమా అక్టోబర్ 20, 1995న రిలీజై ఇండస్ట్రీ రికార్డులు తిరగరాసింది. అసలు అప్పట్లో నెల రోజుల వరకు ఈ సినిమాకు టిక్కెట్లు దొరకని పరిస్థితి ఏర్పడిందంటే ఎంత పెద్ద బ్లాక్ బస్టర్ సినిమానో ప్రత్యేకించి చెప్పనవసరం లేదు. వీక్ డేస్, వీకెండ్స్ ఇలా తేడా లేకుండా దాదాపు నెల రోజుల పాటు చాలా థియేటర్లలో హౌజ్ పుల్ బోర్డులు పడిపోయాయి. కాగా.. ఈ సినిమా క్రేజ్ ఏ రేంజ్‌లో ఉందంటే ఇప్పటికీ ఓ థియేటర్లో ఈ సినిమా ప్రదర్శితం అవుతుంది. అంటే దాదాపుగా 30 ఏళ్లకు పైగా ఇదే సినిమా ఆ థియేటర్లో నడుస్తుంది.
ముంబైలోని మరాఠా మందిర్ థియేటర్లో ప్రతీ రోజు మార్నింగ్‌ షోలో ఈ సినిమా ప్రదర్శితం అవుతుంది. అంతేకాదు ఆ థియేటర్లో బాల్కనీ టికెట్ ధర రూ.50 కాగా, సాధారణ టికెట్ ధర రూ.30 మాత్రమే. కాలేజ్ స్టూడెంట్స్, కొత్తగా పెళ్లైన జంటలు, ప్రేమికులు ఇలా చాలా మంది ఇప్పటికీ ఈ సినిమా చూడడానికి వస్తుంటారు.
సండేస్‌లో అయితే దాదాపు 500 మంది వరకు ఈ సినిమా చూస్తారని థియేటర్ యాజమాన్యం చెబుతుంది. ముంబై వాళ్లు మాత్రమే కాదు దేశంలోని ఇతర రాష్ట్రాల వాళ్లు విదేశాల నుంచి వచ్చే పర్యాటకులు కూడా ఈ షోను చూసేందుకు వస్తుంటారు. ఒక దశలో 2015లో ఈ సినిమాను ఆపేయాలని థియేటర్ యాజమాన్యం భావించిందట. కానీ అభిమానులు తీవ్రంగా వ్యతిరేకించడంతో అప్పటి నిర్ణయాన్ని వెనక్కి తీసుకుని ఇప్పటికీ అదే ఉత్సాహంతో ఈ సినిమాను ప్రదర్శిస్తున్నారు.
ఈ సినిమాలో షారుఖ్ ఖాన్, కాజోల్ కెమిస్ట్రీ ప్రేక్షకులను బాగా ఆకట్టుకుంది. సాధారణ ప్రేమకథే అయినా దాన్ని చూపించిన విధానం ప్రేక్షకులను బాగా కనెక్ట్ చేసింది. కేవలం రూ.4 కోట్ల బడ్జెట్‌తో తెరకెక్కిన ఈ సినిమా ప్రపంచవ్యాప్తంగా రూ.102 కోట్లకు పైగా వసూలు చేసి అప్పట్లో సంచలనం సృష్టించింది. ఈ సినిమాకు నేషనల్ అవార్డు కూడా దక్కింది. అమ్రిష్ పూరి, ఫరీదా జలాల్, అనుపమ్ ఖేర్‌లు కీలక పాత్రల్లో నటించిన ఈ సినిమాకు జతిన్ లలిత్ సంగీతం అందించాడు. ఇప్పటికీ ఈ సినిమా పాటలు చాలా మంది ప్లేలిస్ట్‌లో ఉంటాయి.
