హైదరాబాద్: ఒకప్పుడు 'ఆనందం' సినిమాతో టాలీవుడ్‌లో యూత్ క్రష్‌గా మారిన హీరోయిన్ రేఖ వేదవ్యాస్.. చాలా కాలంగా సినిమాలకు దూరంగా ఉన్నప్పటికీ అప్పుడప్పుడు ఇచ్చే ఇంటర్వ్యూలతో వార్తల్లో నిలుస్తుంటారు. తాజాగా ఆమె వ్యక్తిగత జీవితంపై చేసిన వ్యాఖ్యలు సోషల్ మీడియాలో పెద్ద ఎత్తున చర్చకు దారితీశాయి.
ఇప్పటికీ పెళ్లి చేసుకోకుండా ఎందుకు ఉన్నారనే ప్రశ్నకు స్పందించిన రేఖ.. సరదాగా "నేను కూడా సల్మాన్ ఖాన్‌లాగే జీవితాంతం సింగిల్‌గా ఉండిపోతానేమో" అంటూ నవ్వేశారు. అయితే వెంటనే మరో ఆసక్తికర వ్యాఖ్య చేసి అందరినీ ఆశ్చర్యపరిచారు.
"నన్ను నిజంగా పెళ్లి చేసుకోవాలనుకునే వారు నా ఇన్‌స్టాగ్రామ్ అకౌంట్ 'anandam_rekha'కి మెసేజ్ చేయొచ్చు. కానీ టైమ్‌పాస్ కోసం కాదు.. జీవిత భాగస్వామిగా సీరియస్‌గా ఆలోచించే వాళ్లే సంప్రదించాలి" అని స్పష్టం చేశారు.
తన జీవిత భాగస్వామి ఎలా ఉండాలన్న విషయంలో కూడా రేఖ ఆసక్తికరంగా స్పందించారు. ఒకప్పుడు రూపం, వ్యక్తిత్వం, ఎన్నో అంచనాలు పెట్టుకునేదాన్నని, కానీ ఇప్పుడు ఆలోచన పూర్తిగా మారిపోయిందన్నారు.
"పర్‌ఫెక్ట్ మనిషి ఈ ప్రపంచంలో ఉండడు. నేనూ పర్‌ఫెక్ట్ కాదు. అందంగా ఉండాలి, పొడవుగా ఉండాలి, డబ్బున్నవాడు కావాలి అనే కోరికలు నాకు లేవు. నన్ను నిజంగా ప్రేమించి, అర్థం చేసుకునే మంచి మనసున్న వ్యక్తి ఉంటే చాలు" అని చెప్పారు.
ప్రేమ గురించి మాట్లాడుతూ నేటి యువతకు కూడా ఆమె కొన్ని సూచనలు చేశారు. ప్రేమ, క్రష్, ఇన్ఫ్యాచుయేషన్, ఆబ్సెషన్ అన్నీ ఒకటి కాదని, వాటి మధ్య తేడా తెలుసుకోవాలని అన్నారు.
ఒకరిని ఇష్టపడటం సహజమే కానీ, "వాళ్లు నాకే దక్కాలి" అనే స్వార్థపూరిత ఆలోచన ప్రమాదకరమని హెచ్చరించారు. ప్రేమ పేరుతో మోసం చేసే వారు ఎప్పటికైనా కర్మ ఫలితాన్ని అనుభవిస్తారని వ్యాఖ్యానించారు.
వన్‌సైడ్ లవ్ గురించి కూడా స్పందించిన రేఖ.. మనసులో ప్రేమను దాచిపెట్టడం కంటే సరైన సమయంలో గౌరవంగా చెప్పడం మంచిదని, అవతలి వ్యక్తి నిర్ణయాన్ని గౌరవించాలని సూచించారు. అలాగే ప్రేమను కుటుంబ సభ్యుల అంగీకారంతో పెళ్లి వరకు తీసుకెళ్లే ప్రయత్నం చేయాలని యువతకు సలహా ఇచ్చారు.
2001లో విడుదలైన 'ఆనందం' సినిమా ద్వారా తెలుగు ప్రేక్షకులకు పరిచయమైన రేఖ వేదవ్యాస్.. తన సహజమైన నటన, అమాయకమైన అభినయంతో మంచి గుర్తింపు సంపాదించారు. అనంతరం పలు చిత్రాల్లో నటించిన ఆమె.. కొన్నేళ్లుగా సినీ పరిశ్రమకు దూరంగా ఉంటున్నారు. ఇప్పుడు ఆమె చేసిన ఈ కామెంట్లు మరోసారి ఆమె పేరును సోషల్ మీడియాలో ట్రెండింగ్‌లోకి తీసుకొచ్చాయి.
