సూపర్ స్టార్ మహేశ్ బాబు కొత్త లుక్‌తో సోషల్ మీడియాలో హల్‌చల్ చేస్తున్నారు. కొన్నేళ్లుగా గడ్డంతో రఫ్ లుక్‌లో కనిపించిన మహేశ్.. తాజాగా పూర్తిగా క్లీన్ షేవ్ చేసుకుని దర్శనమివ్వడంతో అభిమానులు ఆశ్చర్యపోతున్నారు. ఈ లుక్‌లో ఆయన మరింత యంగ్‌గా కనిపిస్తుండటంతో ఫ్యాన్స్ నుంచి భారీ స్పందన వస్తోంది.
దర్శకధీరుడు ఎస్.ఎస్. రాజమౌళి తెరకెక్కిస్తున్న పాన్ వరల్డ్ మూవీ ‘వారణాసి’ షూటింగ్‌లో భాగంగా కాశీ షెడ్యూల్‌ను పూర్తి చేసుకున్న మహేశ్ బాబు తాజాగా హైదరాబాద్ ఎయిర్‌పోర్టులో కనిపించారు. క్లీన్ షేవ్ లుక్‌లో ఉన్న ఆయన ఫొటోలు, వీడియోలు ప్రస్తుతం సోషల్ మీడియాలో వైరల్ అవుతున్నాయి.
ఎయిర్‌పోర్టులో ఉల్లాసంగా కనిపించిన మహేశ్ తనను ఫొటోలు తీస్తున్న కెమెరాలను చూసి నవ్వుతూ గడ్డం వైపు చూపించారు. ‘గడ్డం లేదు’ అన్నట్లుగా ఆయన చేసిన చిలిపి సైగలు అభిమానులను ఆకట్టుకున్నాయి.
మహేశ్ కొత్త లుక్‌పై నెటిజన్లు ఆసక్తికర కామెంట్లు చేస్తున్నారు. 51 ఏళ్ల వయసులోనూ 24 ఏళ్ల కాలేజీ కుర్రాడిలా కనిపిస్తున్నారంటూ ప్రశంసలు కురిపిస్తున్నారు. చాలా కాలం తర్వాత క్లీన్ షేవ్‌లో మహేశ్‌ను చూడటంతో ‘అతడు’, ‘ఒక్కడు’ సినిమాల నాటి లుక్‌ను గుర్తుచేసుకుంటున్నారు.
ఇదిలా ఉంటే.. మహేశ్ బాబు ఈ ఆకస్మిక లుక్ మార్పు వెనుక ‘వారణాసి’ సినిమాకు సంబంధించిన కారణం ఉందా అనే చర్చ మొదలైంది. ఈ సినిమా కోసం ఆయన గత కొంతకాలంగా ప్రత్యేకమైన గెటప్‌ను కొనసాగిస్తున్న విషయం తెలిసిందే. సినిమాలో మహేశ్ ‘రుద్ర’ అనే ట్రావెలర్ పాత్రలో, అలాగే శ్రీరాముడి పాత్రలోనూ విభిన్న కోణాల్లో కనిపించనున్నారనే ప్రచారం జరుగుతోంది. అంతేకాదు సినిమాలో దాదాపు 15 నిమిషాల పాటు సాగే కీలక ఎపిసోడ్‌లో మహేశ్ 24 ఏళ్ల యువకుడిగా కనిపించనున్నారనే వార్తలు కూడా వినిపిస్తున్నాయి.
అయితే ఆ యువకుడి పాత్ర కోసమే మహేశ్ క్లీన్ షేవ్ చేసుకున్నారా? లేక కాశీ షెడ్యూల్ పూర్తవడంతో కాస్త రిలాక్స్ అయ్యేందుకు గడ్డాన్ని తొలగించారా? అనేది మాత్రం ప్రస్తుతానికి స్పష్టత లేదు. ఏదేమైనా మహేశ్ బాబు కొత్త ‘ఏజ్‌లెస్ హ్యాండ్‌సమ్’ లుక్ అభిమానులకు పండగ వాతావరణాన్ని తీసుకొచ్చింది. ఈ లుక్ వెనుక అసలు కారణం ఏమిటనేది ‘వారణాసి’ చిత్రబృందం అధికారికంగా వెల్లడిస్తేనే స్పష్టమవుతుంది.
Loading Tweet...
