రక్షాబంధన్‌ సందర్భంగా టాలీవుడ్‌ నటి, నిర్మాత మంజుల ఘట్టమనేని తన సోదరులపై ఉన్న ప్రేమను సోషల్‌ మీడియా వేదికగా పంచుకున్నారు. సూపర్‌స్టార్‌ మహేశ్‌బాబును ట్యాగ్‌ చేస్తూ ఆమె చేసిన ఈ ఎమోషనల్‌ పోస్ట్‌ అభిమానులను ఆకట్టుకుంటోంది.
తోబుట్టువుల మధ్య ఉండే అనుబంధం ఎంతో ప్రత్యేకమైనదని మంజుల పేర్కొన్నారు. జీవితంలోని ప్రతి దశను, తమలో వచ్చిన ప్రతి మార్పును దగ్గరుండి చూసేది తోబుట్టువులేనని చెప్పారు. మనలోని మంచి, చెడు రెండింటినీ తెలిసినప్పటికీ ప్రేమగా అర్థం చేసుకునే బంధం వారిదేనని తెలిపారు. ముఖ్యంగా అన్నాచెల్లెలు, అక్కాతమ్ముడి అనుబంధంలో ఉండే ప్రత్యేకతను ఆమె ప్రస్తావించారు. ఎన్నో ఏళ్ల జ్ఞాపకాలు, అనుభవాలు, కలిసి గడిపిన క్షణాలు ఈ బంధాన్ని మరింత బలపరుస్తాయని చెప్పారు.
పుట్టుకతోనే మనకు లభించే ఈ అందమైన బంధం జీవితంలో దొరికే అత్యంత విలువైన బహుమతుల్లో ఒకటి అంటూ మంజుల భావోద్వేగాన్ని వ్యక్తం చేశారు. రక్షాబంధన్‌ సందర్భంగా అందరికీ శుభాకాంక్షలు తెలిపారు. మహేశ్‌బాబును ప్రత్యేకంగా ట్యాగ్‌ చేయడంతో ఈ పోస్ట్‌ అభిమానుల దృష్టిని ఆకర్షించింది. ప్రస్తుతం మంజుల షేర్‌ చేసిన ఈ ఎమోషనల్‌ పోస్ట్‌ సోషల్‌ మీడియాలో వైరల్‌గా మారుతోంది.
