మెగాస్టార్‌ చిరంజీవి సినీ రంగంలోకి అడుగుపెట్టి 48 ఏళ్లు పూర్తయ్యాయి. 1978లో ‘ప్రాణం ఖరీదు’ సినిమాతో ప్రారంభమైన ఆయన సినీ ప్రయాణం ఎన్నో మైలురాళ్లను దాటింది. అగ్ర కథానాయకుడిగా ఎదిగి, కోట్లాది అభిమానుల గుండెల్లో ‘మెగాస్టార్‌’గా ప్రత్యేక స్థానాన్ని సంపాదించుకున్నారు.
ఈ ప్రత్యేక సందర్భాన్ని పురస్కరించుకుని చిరంజీవి తనయుడు, హీరో రామ్‌చరణ్‌ భావోద్వేగ పోస్ట్ చేశారు. “నాన్నా.. మీరు సినిమాల్లోకి వచ్చి 48 ఏళ్లు పూర్తయ్యాయి. మా కుటుంబం మొత్తాన్నీ మార్చేసిన ఆ రోజును మేం ఎప్పటికీ గుర్తుంచుకుంటాం” అంటూ తండ్రి సినీ ప్రస్థానాన్ని గుర్తు చేసుకున్నారు.
ఇన్నేళ్ల సినీ ప్రయాణంలో చిరంజీవి చేసిన ప్రతిదానికీ చరణ్‌ కృతజ్ఞతలు తెలిపారు. అదే సమయంలో తన తండ్రిపై ఇన్నేళ్లుగా ప్రేమాభిమానాలు చూపిస్తున్న ప్రేక్షకులకు కూడా ధన్యవాదాలు చెప్పారు. చిరంజీవి ప్రయాణం తమ కుటుంబానికి ఎప్పటికీ స్ఫూర్తినిస్తుందని పేర్కొన్నారు. “ఇప్పుడు 50 ఏళ్ల సినీ ప్రస్థానాన్ని జరుపుకొనే రోజు కోసం ఎదురుచూస్తున్నా” అంటూ తన ఆకాంక్షను చరణ్‌ వెల్లడించారు.
మరోవైపు 48 ఏళ్ల సినీ ప్రస్థానం పూర్తైన సందర్భంగా చిరంజీవి కూడా అభిమానులకు కృతజ్ఞతలు తెలిపారు. తనకు అవకాశాలు ఇచ్చిన నిర్మాతలు, విభిన్న పాత్రలను పరిచయం చేసిన దర్శకులు, తోటి నటులు, సాంకేతిక నిపుణులకు ధన్యవాదాలు చెప్పారు.
విజయాలు, అవార్డుల కంటే అభిమానులు తనపై చూపించిన ప్రేమే తనకు ఎంతో గొప్పదని చిరంజీవి పేర్కొన్నారు. అభిమానులు తనను కుటుంబ సభ్యుడిగా భావించడం తనకు ఎంతో విలువైన విషయమని చెప్పారు. వారి అపారమైన ప్రేమ వల్లే ‘చిరంజీవి’ అనే పేరు తనకు శాశ్వత గుర్తింపుగా మారిందని తెలిపారు.
Loading Tweet...
