విక్టరీ వెంకటేష్, స్టార్ డైరెక్టర్ త్రివిక్రమ్ కాంబినేషన్‌లో తెరకెక్కుతున్న చిత్రం ‘ఆదర్శ కుటుంబం’. ఫన్, ఫ్యామిలీ ఎమోషన్స్‌తో పాటు థ్రిల్లర్ అంశాలను మేళవించి ఈ సినిమాను రూపొందిస్తున్నారు. అక్టోబర్ 2న ఈ మూవీ థియేటర్లలోకి రానుంది.
ఈ సినిమా నుంచి తొలి సింగిల్‌పై మేకర్స్ ఆసక్తికరమైన అప్‌డేట్ ఇచ్చారు. ‘నారాయణమ్మ’ అంటూ సాగే ఈ పాటను సెప్టెంబర్ 22న విడుదల చేయనున్నారు. ఫోక్ స్టైల్‌లో సాగే ఈ మాస్ సాంగ్‌లో వెంకటేష్ ముగ్గురు హీరోయిన్లతో కలిసి స్టెప్పులు వేయనున్నట్లు తెలుస్తోంది.
ఈ పాటలో వెంకటేష్‌తో పాటు శ్రీనిధి శెట్టి, డింపుల్ హయతి, నివేదా పేతురాజ్ కనిపించనున్నారు. మాస్ బీట్‌కు థమన్ అందించిన సంగీతం, ముగ్గురు హీరోయిన్ల స్క్రీన్ ప్రెజెన్స్ ఈ పాటకు ప్రత్యేక ఆకర్షణగా నిలవనున్నాయి. తొలి పాటతోనే సినిమా ప్రమోషన్స్‌ను జోరుగా ప్రారంభించేందుకు చిత్రబృందం సిద్ధమైంది.
వెంకటేష్ 77వ సినిమా
‘ఆదర్శ కుటుంబం’ వెంకటేష్ హీరోగా నటిస్తున్న 77వ చిత్రం. తన కుటుంబాన్ని కాపాడుకోవడానికి ఓ వ్యక్తి చేసే పోరాటం చుట్టూ కథ సాగనున్నట్లు తెలుస్తోంది. మధ్యతరగతి జీవితంలో అప్పులతో ఇబ్బందులు పడే ఓ వ్యక్తి అనూహ్యంగా రిచ్‌గా ఎలా మారాడు? ఆ తర్వాత అతడి జీవితంలో ఎలాంటి పరిణామాలు చోటుచేసుకున్నాయి? అనే అంశాలతో కథను రూపొందించినట్లు సమాచారం. తనదైన ఫ్యామిలీ ఎంటర్‌టైనర్ శైలికి థ్రిల్లర్ అంశాలను జోడించి త్రివిక్రమ్ ఈ సినిమాను తెరకెక్కిస్తున్నారు. త్రివిక్రమ్ దర్శకత్వంలో వెంకటేష్ నటిస్తున్న తొలి సినిమా ఇదే కావడం విశేషం.
గతంలో వెంకటేష్ నటించిన ‘వాసు’, ‘నువ్వు నాకు నచ్చావ్’, ‘మల్లీశ్వరి’ చిత్రాలకు త్రివిక్రమ్ రచయితగా పనిచేశారు. ఇప్పుడు తొలిసారి వీరిద్దరూ దర్శకుడు, హీరోగా కలిసి పనిచేస్తుండటంతో ‘ఆదర్శ కుటుంబం’పై అంచనాలు నెలకొన్నాయి. ఈ సినిమాలో నారా రోహిత్, యువీనా పార్థవి, రాజా ప్రజ్వల్ కీలక పాత్రల్లో నటిస్తున్నారు. ప్రస్తుతం ‘ఆదర్శ కుటుంబం’తో పాటు అనిల్ రావిపూడి దర్శకత్వంలో తెరకెక్కుతున్న మరో సినిమాలోనూ వెంకటేష్ నటిస్తున్నారు.
