ఢిల్లీ, అక్టోబర్ 5 జనవాణి): ఢిల్లీలోని జంతర్ మంతర్ వద్ద ఓ నిరసన సందర్భంగా హైడ్రామా చోటుచేసుకుంది. ఓటర్ల జాబితా సవరణలు, ఎన్నికల కమిషన్‌కు సంబంధించిన పలు డిమాండ్లపై కొందరు ఆందోళనకారులు నిరసన చేపట్టారు. దీంతో పోలీసులు భారీగా మోహరించి పలువురిని అదుపులోకి తీసుకున్నారు.
అదుపులోకి తీసుకున్న వారిని పోలీసు బస్సులో ఎక్కించి అక్కడి నుంచి తరలించేందుకు అధికారులు సిద్ధమయ్యారు. ఈ సమయంలో ఓ మహిళా కార్యకర్త ఒక్కసారిగా బస్సు డ్రైవర్ వద్దకు వెళ్లి వాహనం తాళం చెవిని లాక్కున్నారు.
తాళం చెవి చేతిలోకి తీసుకున్న ఆమె వెంటనే అక్కడి నుంచి జనంలోకి వెళ్లిపోయారు. దీంతో తాళం చెవి లేకపోవడంతో పోలీసు బస్సు ముందుకు కదలలేకపోయింది. ఆమెను వెంబడించి తాళం చెవి తీసుకునేందుకు కొందరు ప్రయత్నించినప్పటికీ, అప్పటికే ఆమె జనంలో కలిసిపోయారు.
ఈ మొత్తం ఘటన అక్కడే ఉన్న కెమెరాల్లో రికార్డైంది. ప్రస్తుతం ఆ వీడియో సోషల్ మీడియాలో వైరల్‌గా మారింది. మహిళా కార్యకర్త ధైర్యసాహసాలను కొందరు నెటిజన్లు ప్రశంసిస్తుండగా, నిరసన పేరుతో చట్టాన్ని చేతుల్లోకి తీసుకోవడం సమర్థనీయం కాదని మరికొందరు అభిప్రాయపడుతున్నారు.
