హైదరాబాద్, సెప్టెంబర్ 19 (జనవాణి): నగరంలో గంజాయి అక్రమ రవాణాకు అడ్డుకట్ట వేసేందుకు పోలీసులు చేపట్టిన తనిఖీల్లో భారీగా గంజాయి పట్టుబడింది. కుత్బుల్లాపూర్ జోన్ పరిధిలోని దుండిగల్ పోలీస్ స్టేషన్ ప్రాంతంలో శనివారం పోలీసులు ప్రత్యేక ఆపరేషన్ నిర్వహించారు.
ఔటర్ రింగ్‌రోడ్డుపై వాహనాలను తనిఖీ చేస్తుండగా డీసీఎంలో అక్రమంగా తరలిస్తున్న 425 కేజీల గంజాయి పోలీసులకు పట్టుబడింది. దీంతో గంజాయి స్మగ్లింగ్‌కు పాల్పడుతున్న ఆరుగురు సభ్యుల ముఠాను పోలీసులు అరెస్ట్ చేశారు.
ప్రాథమిక విచారణలో నిందితులు ఒడిశా నుంచి గంజాయిని మహారాష్ట్రలోని సోలాపూర్‌కు తరలిస్తున్నట్లు పోలీసులు గుర్తించారు. స్వాధీనం చేసుకున్న గంజాయితో పాటు డీసీఎంను పోలీసులు తమ అదుపులోకి తీసుకున్నారు.
నిందితులపై కేసు నమోదు చేసిన పోలీసులు వారిని దుండిగల్ పోలీస్ స్టేషన్‌కు తరలించి విచారిస్తున్నారు. ఈ వ్యవహారానికి సంబంధించి మరిన్ని వివరాలను పోలీసులు మీడియా సమావేశంలో వెల్లడించనున్నట్లు సమాచారం.
