హైదరాబాద్,సెప్టెంబర్ 18 (జనవాణి): హైదరాబాద్ ఆర్టీసీ క్రాస్‌రోడ్స్‌లోని వీఎస్‌టీ స్టీల్ బ్రిడ్జిపై ఓ యువకుడు బలవన్మరణానికి పాల్పడిన ఘటన తీవ్ర కలకలం రేపింది. పోలీసుల వివరాల ప్రకారం శుక్రవారం ఉదయం మనోజ్‌ తన బైక్‌పై వీఎస్‌టీ స్టీల్ బ్రిడ్జి వద్దకు వచ్చాడు. బైక్‌ను అక్కడ నిలిపిన అనంతరం అతడు బలవన్మరణానికి పాల్పడ్డాడు. తీవ్ర గాయాలతో అక్కడికక్కడే మృతి చెందాడు.
సమాచారం అందుకున్న చిక్కడపల్లి పోలీసులు వెంటనే ఘటనా స్థలానికి చేరుకుని పరిశీలించారు. యువకుడి బైక్‌పై మొబైల్‌ ఫోన్‌ లభించిందని, అందులో సూసైడ్‌ నోట్‌ ఉన్నట్లు గుర్తించామని పోలీసులు తెలిపారు.
ప్రేమ వ్యవహారమే కారణమా?
తాను ఎలాంటి అప్పుల్లో లేనని, తాను ప్రేమించిన ఓ యువతి కారణంగా ఈ నిర్ణయం తీసుకున్నట్లు ఆ నోట్‌లో పేర్కొన్నట్లు పోలీసులు తెలిపారు. అయితే నోట్‌లోని అంశాలను పోలీసులు ఇంకా ధృవీకరిస్తున్నారు. ఘటనకు దారితీసిన పూర్తి కారణాలపై దర్యాప్తు కొనసాగుతోంది.
ఈ ఘటనతో ఆర్టీసీ క్రాస్‌రోడ్స్‌ పరిసరాల్లో కొద్దిసేపు ట్రాఫిక్‌కు అంతరాయం ఏర్పడింది. పోలీసులు పరిస్థితిని చక్కదిద్దారు. దర్యాప్తు పూర్తయిన అనంతరం మరిన్ని వివరాలు వెల్లడిస్తామని అధికారులు తెలిపారు.
