నోయిడా, అక్టోబర్, 3 (జనవాణి): నోయిడా సెక్టార్‌ 94లోని సూపర్‌నోవా భవనంలో విషాద ఘటన చోటుచేసుకుంది. హర్యానాలోని మానేసర్‌కు చెందిన సుమారు 25 ఏళ్ల సంభవ్‌ జైన్‌ 43వ అంతస్తు నుంచి దూకి ప్రాణాలు కోల్పోయాడు. శుక్రవారం భవనంలోని ఓ ఎయిర్‌బీఎన్‌బీలో బస చేసిన అతడు శనివారం మధ్యాహ్నం అక్కడి నుంచి బయటకు వెళ్లాల్సి ఉంది. అంతలోనే ఈ ఘటన చోటుచేసుకుంది.
ఆపేందుకు ప్రయత్నించినా..
సంభవ్‌ రైలింగ్‌ వద్దకు వెళ్లిన సమయంలో అక్కడే ఉన్న మరో వ్యక్తి అతడిని ఆపేందుకు ప్రయత్నించినట్లు పోలీసులు తెలిపారు. వెనక్కి లాగేందుకు ప్రయత్నించినప్పటికీ సంభవ్‌ వినలేదని చెప్పారు. అనంతరం 43వ అంతస్తు నుంచి దూకడంతో అక్కడికక్కడే మృతి చెందాడు.
తండ్రికి పలుమార్లు ఫోన్‌
ఘటనకు ముందు సంభవ్‌ తన తండ్రికి పలుమార్లు ఫోన్‌ చేసినట్లు పోలీసులు గుర్తించారు. అనంతరం కుటుంబ సభ్యులకు సమాచారం అందించారు. మృతదేహానికి పోస్టుమార్టం నిర్వహిస్తున్నారు. పోలీసులు, ఫోరెన్సిక్‌ బృందం ఘటనాస్థలాన్ని పరిశీలించి ఆధారాలు సేకరించింది. సీసీటీవీ దృశ్యాలను పరిశీలిస్తూ అన్ని కోణాల్లో దర్యాప్తు చేస్తున్నారు.
ఆర్థిక ఒత్తిడి ఉన్నట్లు సమాచారం
ఘటన సమయంలో అక్కడున్న వారిని పోలీసులు విచారించారు. సంభవ్‌ తీవ్ర ఆర్థిక ఒత్తిడిలో ఉన్నట్లు వారి నుంచి సమాచారం లభించిందని పోలీసులు తెలిపారు. అయితే అదే మృతికి కారణమని ఇప్పుడే నిర్ధారించలేమని పూర్తి వివరాలు దర్యాప్తులో తేలాల్సి ఉందని పేర్కొన్నారు.
సూపర్‌నోవాలో గతంలోనూ ఘటనలు
సూపర్‌నోవా భవనంలో ఇలాంటి ఘటన జరగడం ఇదే తొలిసారి కాదు. గతేడాది ఆగస్టులో 23 ఏళ్ల న్యాయ విద్యార్థి 32వ అంతస్తు నుంచి పడి మృతి చెందాడు. అంతకుముందు 2023 జనవరిలో 43 ఏళ్ల రియల్‌ ఎస్టేట్‌ కన్సల్టెంట్‌ నిర్మాణంలో ఉన్న సూపర్‌నోవా స్పైరా టవర్‌ పైభాగం నుంచి పడి ప్రాణాలు కోల్పోయాడు.
Loading Tweet...
