ప్రముఖ ఫోక్ సాంగ్స్ ఆర్టిస్ట్ మాధురి రాథోడ్ పోలీసులను ఆశ్రయించడం ఇప్పుడు చర్చనీయాంశంగా మారింది. ఇటీవల మరో ఫోక్ సాంగ్స్ ఆర్టిస్ట్ ఈశ్వర్ సాయి భార్య శరణ్యతో తలెత్తిన వివాదంపై ఆమె వేములవాడ పోలీసులకు ఫిర్యాదు చేశారు. తనను అసభ్య పదజాలంతో దూషించడంతో పాటు, ఎలాంటి కారణం లేకుండా తనపై చేయిచేసుకున్నారని ఫిర్యాదులో పేర్కొన్నారు. ఫోక్ సాంగ్స్‌తో మంచి గుర్తింపు తెచ్చుకున్న ఈశ్వర్ సాయి, మాధురి రాథోడ్ కలిసి గతంలో పలు పాటల్లో పనిచేశారు. వీరి కాంబినేషన్‌లో వచ్చిన ‘రాతిరి రాతిరి రాతిరిలో’, ‘ప్రమీల’ వంటి పాటలు ప్రేక్షకులను ఆకట్టుకున్నాయి. మాధురి రాథోడ్‌కు సోషల్ మీడియాలోనూ గణనీయమైన ఫాలోయింగ్ ఉంది.
వైరల్‌గా మారిన వీడియోతో వివాదం
ఈశ్వర్ సాయికి భార్య శరణ్య, ఒక కుమారుడు ఉన్నారు. ఇటీవల శరణ్య మాధురి రాథోడ్‌పై సంచలన ఆరోపణలు చేశారు. వేములవాడలోని రెడ్డి భవన్‌లోని ఓ గదిలో తన భర్త ఈశ్వర్ సాయితో మాధురి రాథోడ్ ఉన్న సమయంలో తాను గుర్తించినట్లు పేర్కొంటూ ఓ వీడియో విడుదల చేశారు. ఆ వీడియోలో ఈశ్వర్ సాయి, మాధురిని శరణ్య ప్రశ్నిస్తున్న దృశ్యాలు కనిపించాయి. అలాగే మాధురిపై కొందరు చేయిచేసుకున్నట్లు కూడా వీడియోలో కనిపించింది. ఈ వీడియో సోషల్ మీడియాలో వైరల్ కావడంతో ఈశ్వర్ సాయి, మాధురి రాథోడ్‌ల వ్యవహారం తీవ్ర చర్చకు దారితీసింది. తన భర్తను మాధురి రాథోడ్ వలలో వేసుకుందని శరణ్య ఆరోపించారు. తన భర్తకు ఎలాంటి చెడు అలవాట్లు లేవని, మాధురితో తనకు గతంలో పరిచయం కూడా ఉందని ఆమె తెలిపారు. అయితే మాధురి తమ దాంపత్య జీవితంలోకి ప్రవేశించి కుటుంబంలో సమస్యలు సృష్టించిందని ఆరోపించారు.
పోలీసులకు మాధురి ఫిర్యాదు
తాజాగా ఈ వివాదంపై మాధురి రాథోడ్ వేములవాడ పోలీసులను ఆశ్రయించారు. శరణ్యతో పాటు మరికొందరు తనను అసభ్య పదజాలంతో దూషించారని, తనపై దాడి చేశారని ఆమె ఆరోపించారు. ఘటనను వీడియోగా చిత్రీకరించడంతో పాటు తన ఐఫోన్‌ను కూడా తీసుకెళ్లారని ఫిర్యాదులో పేర్కొన్నారు. ఈ ఘటన అనంతరం సోషల్ మీడియాలో కొందరు ఉద్దేశపూర్వకంగా తనపై తప్పుడు ప్రచారం చేస్తున్నారని మాధురి ఆరోపించారు. తనపై అసత్య పోస్టులు చేస్తున్న వారిపైనా చట్టపరమైన చర్యలు తీసుకోవాలని పోలీసులను కోరారు. మాధురి రాథోడ్ ఇచ్చిన ఫిర్యాదుపై వేములవాడ పోలీసులు దర్యాప్తు చేపట్టారు. దర్యాప్తులో వెలువడే వివరాల ఆధారంగా ఈ వివాదంపై మరింత స్పష్టత వచ్చే అవకాశం ఉంది.
