పశ్చిమ బెంగాల్‌కు చెందిన ఓ బాలుడి దీనస్థితి సోషల్ మీడియాలో వైరల్ కావడంతో ప్రముఖ పారిశ్రామికవేత్త అనంత్ అంబానీ స్పందించారు. ముర్షిదాబాద్‌కు చెందిన 16 ఏళ్ల ఇక్బాల్ షేక్‌ వింత అనారోగ్యంతో తీవ్రంగా బాధపడుతున్నాడు. ఒంటిపై నిప్పులు పోసినట్లు భరించలేని మంటలు రావడంతో ఉపశమనం కోసం గంటల తరబడి చెరువులోనే ఉండాల్సి వస్తోంది.
స్థానికుల కథనం ప్రకారం.. ఇక్బాల్ ఉదయం నుంచి రాత్రి వరకు గ్రామంలోని చెరువుల్లోనే ఈదుతూ గడిపేవాడు. నీటి నుంచి బయటకు రాగానే శరీరమంతా తీవ్రమైన మంటలు మొదలవుతాయని బాలుడు చెబుతున్నాడు. చివరకు చెరువులోనే అల్పాహారం తింటున్న అతడి వీడియో సోషల్ మీడియాలో వైరల్ కావడంతో ఈ విషయం వెలుగులోకి వచ్చింది.
అనంత్ అంబానీ చొరవ
ఇక్బాల్ కుటుంబం పేదరికంతో బాధపడుతోంది. ఇప్పటికే పలు ఆసుపత్రుల్లో చూపించినప్పటికీ సమస్యకు పరిష్కారం లభించలేదు. దీర్ఘకాలిక వైద్య ఖర్చులు భరించే స్థోమత లేకపోవడంతో బాలుడి తల్లిదండ్రులు సోషల్ మీడియా ద్వారా సాయం కోరారు. ఈ విషయం అనంత్ అంబానీ దృష్టికి వెళ్లడంతో ఆయన వెంటనే స్పందించారు. ఇక్బాల్‌ను ప్రత్యేక విమానంలో ముంబయికి తరలించే ఏర్పాట్లు చేశారు. అనంతరం సర్ హెచ్.ఎన్. రిలయన్స్ ఫౌండేషన్ ఆసుపత్రిలో చేర్పించారు. అక్కడ వైద్య నిపుణులు బాలుడికి పూర్తి స్థాయి పరీక్షలు నిర్వహించి, సమస్యకు కారణాన్ని గుర్తించి అవసరమైన చికిత్స అందించనున్నారు.
ఎక్కువసేపు నీళ్లలో ఉండటం ప్రమాదకరం
ఇక్బాల్‌కు అసలు ఏ అనారోగ్యం ఉందనేది వైద్య పరీక్షల తర్వాతే స్పష్టమవుతుంది. అయితే గంటల తరబడి నీటిలో ఉండటం వల్ల చర్మం మెత్తబడటం, తెల్లగా మారడం, బ్యాక్టీరియా, ఫంగల్ ఇన్‌ఫెక్షన్లు వంటి సమస్యలు తలెత్తే ప్రమాదం ఉందని వైద్య నిపుణులు హెచ్చరిస్తున్నారు. తన బాధను గుర్తించి ముంబయికి తీసుకెళ్లి చికిత్స అందిస్తున్న అనంత్ అంబానీకి ఇక్బాల్ కుటుంబ సభ్యులు, గ్రామస్థులు కృతజ్ఞతలు తెలిపారు. బాలుడికి మెరుగైన వైద్యం అందుతుందనే ఆశాభావం వ్యక్తం చేస్తున్నారు.
