న్యూఢిల్లీ,సెప్టెంబర్ 23 (జనవాణి): బీజేపీలో కీలక సంస్థాగత మార్పులు చోటుచేసుకున్నాయి. దేశవ్యాప్తంగా 28 రాష్ట్రాలు, 8 కేంద్ర పాలిత ప్రాంతాలకు పార్టీ ఇన్‌ఛార్జ్‌లు, కో-ఇన్‌ఛార్జ్‌లను అధిష్ఠానం నియమించింది. ఈ మేరకు బీజేపీ జాతీయ అధ్యక్షుడు నితిన్ నబీన్ బుధవారం నియామకాలను ప్రకటించారు.
తెలంగాణ, పశ్చిమ బెంగాల్‌ పార్టీ వ్యవహారాల బాధ్యతలను సునీల్ బన్సల్‌కు అప్పగించారు. తెలంగాణకు అభయ్ పాటిల్, రేఖా శర్మ కో-ఇన్‌ఛార్జ్‌లుగా నియమితులయ్యారు. పశ్చిమ బెంగాల్‌కు లాల్ సింగ్ ఆర్య, రాజేంద్ర సింగ్, పింకీ కుష్వాహా కో-ఇన్‌ఛార్జ్‌లుగా బాధ్యతలు చేపట్టనున్నారు.
ఇక స్మృతి ఇరానీకి హరియాణా, ఛత్తీస్‌గఢ్‌ బాధ్యతలు అప్పగించారు. ఈ రెండు రాష్ట్రాలకు సిద్ధార్థ్ శంభు కో-ఇన్‌ఛార్జ్‌గా వ్యవహరించనున్నారు.
దేశ రాజకీయాల్లో కీలక రాష్ట్రంగా భావించే ఉత్తర్‌ప్రదేశ్‌ పార్టీ వ్యవహారాలను జాతీయ ప్రధాన కార్యదర్శి వినోద్ తావ్డే పర్యవేక్షించనున్నారు. ఆయనకు జగదీశ్ పటేల్, మేధా కులకర్ణి, ప్రదీప్ శర్మ, అనంత్ ఓజా సహకరించనున్నారు.
మహారాష్ట్ర ఇన్‌ఛార్జ్‌గా బైజయంత్ జయ్ పాండా నియమితులయ్యారు. ఆయనకు అమిత్ మాలవీయ, సదానంద్ షెట్ తానవాడే, కమల్‌జీత్ సెహ్రావత్ కో-ఇన్‌ఛార్జ్‌లుగా బాధ్యతలు అప్పగించారు.
ఢిల్లీ పార్టీ వ్యవహారాల ఇన్‌ఛార్జ్‌గా సీనియర్ నేత వినయ్ సహస్రబుద్ధేను నియమించారు. జమ్యాంగ్ త్సెరింగ్ నంగ్యాల్, దర్శనా జర్దోష్ కో-ఇన్‌ఛార్జ్‌లుగా వ్యవహరించనున్నారు.
బీజేపీ జాతీయ ఉపాధ్యక్షుడు రామ్ మాధవ్కు ఉత్తరాఖండ్ బాధ్యతలు అప్పగించారు. ఆయనకు అరవింద్ మీనన్, బాన్సురీ స్వరాజ్ సహాయకులుగా నియమితులయ్యారు. తమిళనాడు పార్టీ వ్యవహారాలకు మాత్రం ఇతర నేతలకు బాధ్యతలు అప్పగించారు.
ఇదిలా ఉంటే.. బీజేపీ కమ్యూనికేషన్ విభాగంలోనూ మార్పులు చేసింది. జాతీయ మీడియా విభాగం, సోషల్ మీడియా యూనిట్‌ను కలుపుతూ ఏర్పాటు చేసిన కమ్యూనికేషన్ విభాగానికి అనిల్ బలూనీ సమన్వయకర్తగా నియమితులయ్యారు. ఇటీవల నేషనల్ మీడియా విభాగం కో-కన్వీనర్‌గా నియమితులైన ఆశిష్ ఉషా అగర్వాల్కు కన్వీనర్ బాధ్యతలు అప్పగించారు.
