ఉత్తరప్రదేశ్‌, ఆగస్టు 31 (జనవాణి): ఉత్తరప్రదేశ్‌లోని కౌశాంబి జిల్లాలో ఘోర ప్రమాదం చోటుచేసుకుంది. ప్రయాగ్‌రాజ్-కౌశాంబి సరిహద్దులోని పిప్రి పోలీస్ స్టేషన్ పరిధిలో ఉన్న ఓ బాణసంచా ఫ్యాక్టరీలో భారీ పేలుడు సంభవించింది. ఈ ప్రమాదంలో 11 మంది కార్మికులు అక్కడికక్కడే ప్రాణాలు కోల్పోయారు. మరో 10 మందికిపైగా గాయపడినట్లు తెలుస్తోంది. ఫ్యాక్టరీలో ఒక్కసారిగా వరుస పేలుళ్లు సంభవించడంతో భారీగా మంటలు చెలరేగాయి. పేలుడు తీవ్రతకు సమీపంలోని పలు ఇళ్లు కూడా ధ్వంసమైనట్లు అధికారులు తెలిపారు. ప్రమాద సమయంలో ఫ్యాక్టరీలో పెద్ద సంఖ్యలో కార్మికులు ఉన్నట్లు సమాచారం.
సమాచారం అందుకున్న వెంటనే పోలీసులు, అగ్నిమాపక సిబ్బంది ఘటనాస్థలికి చేరుకుని సహాయక చర్యలు చేపట్టారు. శిథిలాల కింద మరికొందరు కార్మికులు చిక్కుకుని ఉండొచ్చని అధికారులు అనుమానిస్తున్నారు. దీంతో మృతుల సంఖ్య మరింత పెరిగే అవకాశం ఉన్నట్లు తెలుస్తోంది. ప్రస్తుతం ఘటనాస్థలిలో సహాయక, సహాయక చర్యలు కొనసాగుతున్నాయి. ప్రమాదానికి దారితీసిన కారణాలపై అధికారులు దర్యాప్తు చేస్తున్నారు.
