హైదరాబాద్, సెప్టెంబర్ 10 (జనవాణి): తెలంగాణ శాసనమండలిలో గురువారం బీఆర్ఎస్ ఎమ్మెల్సీలు ఆందోళనకు దిగారు. మండలి ప్రారంభమైన వెంటనే 22ఎపై చర్చ చేపట్టాలని బీఆర్ఎస్ సభ్యులు పట్టుబట్టారు. ఈ అంశంపై చర్చించేందుకు వాయిదా తీర్మానాన్ని ప్రతిపాదించారు. అయితే బీఆర్ఎస్ సభ్యుల వాయిదా తీర్మానాన్ని మండలి చైర్మన్ తిరస్కరించారు. దీంతో బీఆర్ఎస్ ఎమ్మెల్సీలు తీవ్ర ఆగ్రహం వ్యక్తం చేశారు. చైర్మన్ పోడియం వద్దకు చేరుకుని ప్రభుత్వానికి వ్యతిరేకంగా నినాదాలు చేశారు.
ఈ క్రమంలో కొందరు సభ్యులు పేపర్లు చించి గాలిలోకి ఎగరేస్తూ నిరసన తెలిపారు. సభలో తమ డిమాండ్‌ను పట్టించుకోవడం లేదంటూ బీఆర్ఎస్ సభ్యులు ఆందోళన వ్యక్తం చేశారు. చైర్మన్ నిర్ణయంతో నిరసనకు దిగిన బీఆర్ఎస్ ఎమ్మెల్సీలు.. అనంతరం మండలి నుంచి వాకౌట్ చేస్తున్నట్లు ప్రకటించి సభ నుంచి బయటకు వెళ్లిపోయారు. దీంతో తెలంగాణ శాసనమండలిలో కొద్దిసేపు ఉద్రిక్త వాతావరణం నెలకొంది.
