హైదరాబాద, సెప్టెంబర్ 18 (జనవాణి): తెలంగాణ రాజకీయాల్లో సంచలన పరిణామం చోటుచేసుకుంది. ఖైరతాబాద్ ఎమ్మెల్యే దానం నాగేందర్‌పై అనర్హత వేటు పడింది. పార్టీ ఫిరాయింపుల కేసులో తెలంగాణ హైకోర్టు కీలక తీర్పు వెలువరించింది. బీఆర్ఎస్ తరఫున ఎమ్మెల్యేగా గెలిచిన దానం నాగేందర్.. అనంతరం కాంగ్రెస్‌లో చేరారు. అంతేకాకుండా 2024 లోక్‌సభ ఎన్నికల్లో కాంగ్రెస్ అభ్యర్థిగా సికింద్రాబాద్ స్థానం నుంచి పోటీ చేశారు. ఈ నేపథ్యంలో ఆయనపై అనర్హత వేటు వేయాలని బీఆర్ఎస్ ఎమ్మెల్యే పాడి కౌశిక్‌రెడ్డి, బీజేపీ శాసనసభాపక్ష నేత ఏలేటి మహేశ్వర్‌రెడ్డి హైకోర్టును ఆశ్రయించారు.
ఈ పిటిషన్లపై విచారణ జరిపిన హైకోర్టు దానం నాగేందర్ విషయంలో అసెంబ్లీ స్పీకర్ తీసుకున్న నిర్ణయాన్ని కొట్టివేసింది. పార్టీ ఫిరాయింపుల నిరోధక చట్టం కింద ఆయన అనర్హుడిగా ప్రకటించింది. దానం నాగేందర్ బీఆర్ఎస్ ఎమ్మెల్యేగా కొనసాగుతూనే కాంగ్రెస్ తరఫున లోక్‌సభ ఎన్నికల్లో పోటీ చేయడం కేసులో కీలక అంశంగా నిలిచింది.
దానం నాగేందర్ అనర్హతపై స్పీకర్ నిర్ణయాన్ని సవాల్ చేస్తూ పాడి కౌశిక్‌రెడ్డి, ఏలేటి మహేశ్వర్‌రెడ్డి హైకోర్టులో పిటిషన్లు దాఖలు చేశారు. గతంలో స్పీకర్ దానం నాగేందర్‌పై అనర్హత పిటిషన్‌ను తిరస్కరించడంతో ఈ వ్యవహారం న్యాయస్థానానికి చేరింది.
కేటీఆర్ రియాక్షన్
హైకోర్టు తీర్పుపై బీఆర్ఎస్ వర్కింగ్ ప్రెసిడెంట్ కేటీఆర్ స్పందించారు. “సత్యమేవ జయతే” అంటూ సోషల్ మీడియా వేదికగా వ్యాఖ్యానించారు. కాంగ్రెస్‌లో చేరిన బీఆర్ఎస్ ఎమ్మెల్యే దానం నాగేందర్‌ను హైకోర్టు అనర్హుడిగా ప్రకటించిందని పేర్కొంటూ మిగిలిన పార్టీ ఫిరాయించిన ఎమ్మెల్యేల విషయంలోనూ ఇదే పరిణామం చోటుచేసుకుంటుందని ఆయన వ్యాఖ్యానించారు.
Loading Tweet...
కౌశిక్‌రెడ్డి ఏమన్నారంటే..
దానం నాగేందర్‌పై అనర్హత వేటు కోసం కోర్టును ఆశ్రయించిన బీఆర్ఎస్ ఎమ్మెల్యే పాడి కౌశిక్‌రెడ్డి కూడా తీర్పుపై స్పందించారు. హైకోర్టు తీర్పు కాంగ్రెస్ ప్రభుత్వానికి ఎదురుదెబ్బగా ఆయన అభివర్ణించారు. బీఆర్ఎస్ నుంచి కాంగ్రెస్‌లో చేరిన ఇతర ఎమ్మెల్యేల విషయంలోనూ ఈ తీర్పు ప్రభావం ఉంటుందని ఆయన పేర్కొన్నారు.
దానం నాగేందర్ అనర్హతతో ఖైరతాబాద్ నియోజకవర్గంలో ఉప ఎన్నికకు అవకాశం ఏర్పడుతుందా? అన్న అంశంపై ఇప్పుడు రాజకీయ వర్గాల్లో చర్చ మొదలైంది. అయితే తదుపరి న్యాయపరమైన పరిణామాలు, ఎన్నికల ప్రక్రియపై అధికారిక నిర్ణయాలు కీలకం కానున్నాయి.
