హైదరాబాద్, సెప్టెంబర్ 8 (జనవాణి): తెలంగాణలో లా అండ్ ఆర్డర్ పూర్తిగా మంటగలిసిందని బీఆర్ఎస్ డిప్యూటీ ఫ్లోర్ లీడర్, మాజీ మంత్రి హరీశ్ రావు ఆరోపించారు. రాష్ట్రంలో పరిస్థితులను చక్కదిద్దేందుకు కేంద్ర ప్రభుత్వం, గవర్నర్ జోక్యం చేసుకుని రాష్ట్రపతి పాలన విధించాలని ఆయన డిమాండ్ చేశారు. జవహర్‌నగర్ పోలీస్ స్టేషన్ వద్ద మీడియాతో మాట్లాడిన హరీశ్ రావు.. సీఎం రేవంత్ రెడ్డి ప్రభుత్వంపై తీవ్రస్థాయిలో విరుచుకుపడ్డారు.
కేసీఆర్ ఇంటిపై జరిగిన దాడిని హరీశ్ రావు తీవ్రంగా ఖండించారు. ఈ ఘటనకు ముఖ్యమంత్రి రేవంత్ రెడ్డి బాధ్యత వహించి బేషరతుగా క్షమాపణ చెప్పాలని డిమాండ్ చేశారు. షాద్‌నగర్ ఎమ్మెల్యే శంకర్.. కేసీఆర్ చావాలని వ్యాఖ్యానించడం దారుణమని, ఆయనపై వెంటనే తీర్మానం పెట్టి సభ్యత్వాన్ని రద్దు చేయాలని కోరారు.
డైవర్షన్ పాలిటిక్స్‌తో ప్రజల తీర్పును మార్చలేరు
రేవంత్ రెడ్డి ప్రభుత్వం డైవర్షన్ పాలిటిక్స్‌కు పాల్పడుతోందని హరీశ్ రావు ఆరోపించారు. అసెంబ్లీలో ప్రభుత్వ వైఫల్యాలు బయటపడతాయనే ఉద్దేశంతో ప్రజా సమస్యలపై చర్చ జరగకుండా చేస్తున్నారని విమర్శించారు. డైవర్షన్ పాలిటిక్స్‌తో పేపర్ హెడ్‌లైన్స్ మార్చవచ్చు.. కానీ ప్రజల జీవితాలను మార్చలేరు. సోషల్ మీడియా ట్రెండ్ మార్చవచ్చు.. కానీ రైతులు, విద్యార్థుల కష్టాలను మార్చలేరు. ప్రజల తీర్పును మార్చలేరు అని హరీశ్ రావు వ్యాఖ్యానించారు.
రైతులకు ఇచ్చే పింఛన్, రైతు భరోసా, ఆరు గ్యారెంటీల అమలుపై ఆయన ప్రభుత్వాన్ని ప్రశ్నించారు. యూరియా కొరత, సాగునీటి సమస్యలు, విద్యుత్ సరఫరా వంటి అంశాలపై ప్రభుత్వం సమాధానం చెప్పాలని డిమాండ్ చేశారు.
విద్యార్థులు, ఉద్యోగుల సమస్యలపై ప్రశ్నలు
ఫీజు రీయింబర్స్‌మెంట్ కోసం విద్యార్థులు, పీఆర్సీ, డీఏ కోసం ఉద్యోగులు ఎదురుచూస్తున్నారని హరీశ్ రావు అన్నారు. కేసీఆర్ హయాంలో ఇలాంటి సమస్యలను పరిష్కరించామని పేర్కొన్నారు. ప్రస్తుత ప్రభుత్వం జాబ్ క్యాలెండర్‌ను ‘జాబ్‌లెస్ క్యాలెండర్’గా మార్చిందని విమర్శించారు.
మహిళా ఎమ్మెల్యేలపై దాడులపై మండిపాటు
అసెంబ్లీలో మహిళా ఎమ్మెల్యేలపై దాడి జరగలేదని స్పీకర్ ఎలా చెబుతారని హరీశ్ రావు ప్రశ్నించారు. ఘటనకు సంబంధించిన దృశ్యాలు మీడియాలో ప్రసారమయ్యాయని అన్నారు. ఫిర్యాదు చేసినా కేసులు నమోదు చేయకుండా, దాడికి గురైన మహిళా ఎమ్మెల్యేలపైనే కేసులు పెట్టడం సరికాదని విమర్శించారు. మహిళా ఎమ్మెల్యేల పట్ల ప్రభుత్వం వ్యవహరిస్తున్న తీరును ‘కలియుగ దుశ్శాసనుడు రేవంత్ రెడ్డి’ అంటూ తీవ్ర వ్యాఖ్యలు చేశారు. ప్రతిపక్షానికి అసెంబ్లీలో మాట్లాడే అవకాశం ఇవ్వడం లేదని, సభను కౌరవ సభగా మార్చారని ఆరోపించారు.
కేసీఆర్ ఇంటిపై దాడికి సీఎం క్షమాపణ చెప్పాలి
తెలంగాణ రాష్ట్ర సాధనలో కీలక పాత్ర పోషించిన కేసీఆర్ ఇంటిపైకి దాడి చేసేందుకు అధికార పార్టీ ప్రోత్సహించిందని హరీశ్ రావు ఆరోపించారు. మహిళా ఎమ్మెల్యేలపై దాడి, ప్రతిపక్ష నేత ఇంటిపై దాడి ఘటనలకు ముఖ్యమంత్రి హోదాలో రేవంత్ రెడ్డి క్షమాపణ చెప్పాలని డిమాండ్ చేశారు. అధికారంలో ఉన్నామనే కారణంతో ఇష్టానుసారంగా వ్యవహరిస్తే గతంలో కౌరవులకు ఎదురైన పరిస్థితినే ఎదుర్కోవాల్సి వస్తుందని హెచ్చరించారు.
ఫిర్యాదులు తీసుకోవడం లేదు
కేటీఆర్, యాదవ రెడ్డి, మర్రి రాజశేఖర్ రెడ్డి, జగదీశ్ రెడ్డి, సంజయ్‌తో పాటు తనకు కూడా దెబ్బలు తగిలాయని హరీశ్ రావు తెలిపారు. పోలీస్ స్టేషన్లలో ఫిర్యాదులు చేసేందుకు ప్రయత్నించినా పోలీసులు స్వీకరించడం లేదని ఆరోపించారు.
రెండు రోజులు ప్రజా సమస్యలు చర్చించలేదు
అసెంబ్లీలో ముఖ్యమంత్రి తర్వాత ప్రతిపక్ష నాయకుడి స్థానం అత్యంత కీలకమని హరీశ్ రావు అన్నారు. ప్రతిపక్ష నాయకుడిపై తీవ్ర వ్యాఖ్యలు చేసిన వారిపై స్పీకర్ ఎందుకు చర్యలు తీసుకోవడం లేదని ప్రశ్నించారు. సభలోని 119 మంది ఎమ్మెల్యేలను సమానంగా చూడాల్సిన బాధ్యత స్పీకర్‌పై ఉందన్నారు. రెండు రోజుల పాటు ప్రజా సమస్యలపై చర్చ జరగకుండా సభా సమయాన్ని వృథా చేశారని ఆరోపించారు. బీఆర్ఎస్ ప్రజా పోరాటాన్ని కొనసాగిస్తుందని, ప్రభుత్వాన్ని ప్రజాక్షేత్రంలో నిలదీస్తూనే ఉంటామని హరీశ్ రావు హెచ్చరించారు.
