హైదరాబాద్, సెప్టెంబర్ 01 (జనవాణి): హైదరాబాద్ నగర ప్రజా రవాణాలో మరో ఆధునిక సదుపాయం అందుబాటులోకి రానుంది. ప్రయాణికులకు మెరుగైన అనుభూతిని అందించడంతో పాటు టికెట్ల ద్వారా కాకుండా ఇతర మార్గాల్లో ఆదాయాన్ని పెంచుకునే లక్ష్యంతో తెలంగాణ ఆర్టీసీ ఎలక్ట్రిక్‌ బస్సుల్లో డిజిటల్‌ అడ్వర్టయిజింగ్‌, ఇన్ఫోటైన్‌మెంట్‌ స్క్రీన్లను ఏర్పాటు చేస్తోంది.
10 బస్సుల్లో పైలట్‌ ప్రాజెక్టు
రూట్‌వేవ్‌ సంస్థతో ఒప్పందం మేరకు హయత్‌నగర్‌-2 డిపోకు చెందిన 10 ఎలక్ట్రిక్‌ బస్సుల్లో ఈ వ్యవస్థను ప్రయోగాత్మకంగా ప్రారంభించారు. హయత్‌నగర్‌–పటాన్‌చెరు మార్గంలో నడిచే ఈ బస్సుల్లో ఇప్పటికే డిజిటల్‌ తెరలను ఏర్పాటు చేశారు.
మెట్రో తరహాలో రాబోయే స్టాప్‌ల సమాచారం
ఈ స్క్రీన్ల ప్రత్యేకతల్లో ముఖ్యమైనది రాబోయే బస్‌స్టాప్‌ల వివరాలను ముందుగానే చూపించడం. బస్సు వెళ్లే మార్గంలోని ప్రధాన స్టేజీలు, బస్‌స్టాప్‌ల పేర్లు డిజిటల్‌ స్క్రీన్‌పై ప్రదర్శిస్తారు. దీంతో నగర మార్గాలపై అవగాహన లేని ప్రయాణికులు కూడా తమ స్టాప్ ఎప్పుడు వస్తుందో ముందుగానే తెలుసుకుని దిగేందుకు సిద్ధం కావచ్చు.
ప్రకటనలతో పాటు ప్రజలకు ఉపయోగపడే సమాచారం
డిజిటల్‌ స్క్రీన్లను కేవలం వాణిజ్య ప్రకటనలకే పరిమితం చేయకుండా ప్రయాణికులకు ఉపయోగపడే సమాచారాన్ని కూడా అందించనున్నారు. ఆర్టీసీ సేవలు, ప్రయాణికులకు సంబంధించిన ముఖ్యమైన సమాచారం, ప్రభుత్వ సంక్షేమ పథకాలు, ప్రజా సేవల వివరాలను స్క్రీన్ల ద్వారా అందించేలా ప్రణాళిక రూపొందిస్తున్నారు.
RTCకి అదనపు ఆదాయం
ప్రకటనల ప్రదర్శన ద్వారా ఆర్టీసీకి టికెట్లకు అతీతంగా నాన్‌-ఫేర్‌ రెవెన్యూ సమకూరే అవకాశం ఉంది. పైలట్‌ ప్రాజెక్టు ద్వారా స్క్రీన్ల పనితీరు, ప్రకటనల ఆదాయం, ప్రయాణికుల స్పందన తదితర అంశాలను అధికారులు పరిశీలించనున్నారు. ప్రయోగం విజయవంతమైతే నగరంలోని ఇతర డిపోల పరిధిలో నడిచే ఎలక్ట్రిక్‌ బస్సులకు కూడా ఈ సదుపాయాన్ని విస్తరించే అవకాశం ఉంది. దీంతో ఒకవైపు ప్రయాణికులకు ఆధునిక సౌకర్యాలు అందించడంతో పాటు మరోవైపు ఆర్టీసీకి అదనపు ఆదాయ వనరును అభివృద్ధి చేయాలన్నది సంస్థ లక్ష్యంగా కనిపిస్తోంది.
