జనవాణి, హైదరాబాద్: షేక్‌పేటలోని వరద కాలువలో భారీగా పేరుకుపోయిన చెత్తపై హైడ్రా దృష్టి సారించింది. నాలాలోకి జేసీబీలను దించి రెండు మూడు రోజుల్లో వ్యర్థాలన్నింటినీ తొలగించాలని హైడ్రా కమిషనర్ ఏవీ రంగనాథ్ అధికారులకు స్పష్టమైన ఆదేశాలు జారీ చేశారు. అంతేకాదు.. మళ్లీ నాలాలో చెత్త వేయకుండా కాలువ పొడవునా సీసీ కెమెరాలు ఏర్పాటు చేసి నిఘా పెట్టాలని సూచించారు. చెత్త వేస్తూ పట్టుబడిన వారిపై చర్యలకు వెనుకాడవద్దని స్పష్టం చేశారు.
మీడియా కథనంతో రంగంలోకి హైడ్రా
షేక్‌పేట హకీంషా విరాట్‌నగర్‌లోని వరద కాలువలో పెద్ద మొత్తంలో చెత్త పేరుకుపోయింది. దీనిపై మీడియాలో కథనం రావడంతో పాటు స్థానికుల నుంచి కూడా ఫిర్యాదులు అందాయి. ఈ నేపథ్యంలో సోమవారం సాయంత్రం హైడ్రా కమిషనర్ ఏవీ రంగనాథ్ నేరుగా క్షేత్రస్థాయికి వెళ్లి నాలాను పరిశీలించారు. వ్యర్థాలు ఇంత భారీగా పేరుకుపోవడానికి కారణాలేమిటని స్థానిక అధికారులను అడిగి తెలుసుకున్నారు.
ఎక్కడి నుంచి వస్తోంది ఈ చెత్త?
ఎగువ ప్రాంతాల నుంచి పెద్ద మొత్తంలో వ్యర్థాలు కొట్టుకురావడంతో పాటు కొందరు ఇష్టానుసారంగా చెత్తను కాలువలో పడేస్తుండటం వల్ల సమస్య తీవ్రంగా మారుతోందని అధికారులు కమిషనర్‌కు వివరించారు. హైడ్రా ఆర్‌ఎఫ్‌వో జయప్రకాశ్, ఎస్‌ఎఫ్‌వో చరణ్ అక్కడి పరిస్థితులను రంగనాథ్‌కు వివరించారు.
నాలా పొడవునా CCTV నిఘా
సమస్యను తాత్కాలికంగా పరిష్కరించడం కాకుండా మళ్లీ పునరావృతం కాకుండా చర్యలు తీసుకోవాలని రంగనాథ్ అధికారులకు సూచించారు. షేక్‌పేట ఓయూ కాలనీ నుంచి మారుతినగర్, వివేకానందనగర్, అంబేడ్కర్‌నగర్, ఎంజీ నగర్, హకీంషా విరాట్‌నగర్, బృందావన్ కాలనీ వరకు వరద కాలువ పొడవునా సీసీటీవీ కెమెరాలను ఏర్పాటు చేయాలని ఆదేశించారు. కెమెరాల ద్వారా నిరంతరం నిఘా ఉంచాలని, నాలాలో చెత్త వేస్తున్న వారిని గుర్తించి చర్యలు తీసుకోవాలని స్పష్టం చేశారు.
చెత్త వేస్తే చర్యలు తప్పవు
వరద కాలువలను చెత్త డంపింగ్ ప్రాంతాలుగా మార్చొద్దని హైడ్రా హెచ్చరించింది. ఎవరైనా కాలువలో చెత్త వేస్తున్నట్లు గుర్తిస్తే చర్యలు తీసుకునేందుకు వెనుకాడవద్దని రంగనాథ్ అధికారులకు సూచించారు. స్థానిక ప్రజలు కూడా బాధ్యతగా వ్యవహరించాలని కోరారు. నాలాలో చెత్త వేయకుండా చూసే విషయంలో ఆయా కాలనీల సంక్షేమ సంఘాల ప్రతినిధులు బాధ్యత తీసుకోవాలని సూచించారు.
రెండు మూడు రోజుల్లో క్లీన్ చేయండి
ప్రస్తుతం కాలువలో పేరుకుపోయిన వ్యర్థాలను తొలగించేందుకు వెంటనే చర్యలు చేపట్టాలని కమిషనర్ ఆదేశించారు. అవసరమైన జేసీబీలను నాలాలోకి దించి రెండు మూడు రోజుల్లో మొత్తం చెత్తను తొలగించాలని స్పష్టం చేశారు. వర్షాకాలంలో వరద నీరు సాఫీగా వెళ్లేందుకు కాలువల్లో అడ్డంకులు లేకుండా చూడాల్సిన అవసరం ఉన్న నేపథ్యంలో హైడ్రా చేపట్టిన ఈ చర్య ప్రాధాన్యం సంతరించుకుంది.
