ముంబై,సెప్టెంబర్ 21 (జనవాణి): ముంబైలోని Indian Institute of Technology Bombay (IIT బాంబే)లో విద్యార్థి సాహిల్ వాకోడ్ ఆత్మహత్య వ్యవహారం తీవ్ర కలకలం రేపుతోంది. రెండో సంవత్సరం బీటెక్ చదువుతున్న 20 ఏళ్ల సాహిల్ సెప్టెంబర్ 18న హాస్టల్ గదిలో ఆత్మహత్య చేసుకున్నాడు. ఈ ఘటనపై విద్యార్థులు మూడు రోజులుగా క్యాంపస్‌లో నిరసనలు చేపట్టారు.
అసలేం జరిగింది?
సాహిల్ మధ్యంతర పరీక్ష రాస్తున్న సమయంలో మొబైల్ ఫోన్ ఉపయోగించినట్లు IIT బాంబే వర్గాలు తెలిపాయి. ప్రశ్నాపత్రాన్ని AI ప్లాట్‌ఫామ్‌లో అప్‌లోడ్ చేసి సమాధానాలు పొందేందుకు ప్రయత్నించినట్లు సంస్థ పేర్కొంది. పరీక్షకు ఇన్విజిలేటర్‌గా ఉన్న ప్రొఫెసర్ సూర్యనారాయణ దూళ్ల ఈ విషయాన్ని సంస్థ అధికారుల దృష్టికి తీసుకెళ్లారు. అనంతరం సాహిల్‌కు కౌన్సెలింగ్ ఇచ్చారని, ఈ ఘటన అతడి అకడమిక్ కెరీర్‌పై ప్రభావం చూపదని హామీ ఇచ్చినట్లు IIT బాంబే తెలిపింది. అతడిపై అప్పటివరకు ఎలాంటి క్రమశిక్షణా చర్యలు తీసుకోలేదని స్పష్టం చేసింది.
అయితే ఈ ఘటన తర్వాత కొద్ది గంటల్లోనే సాహిల్ ఆత్మహత్య చేసుకోవడంతో వివాదం ముదిరింది. తన కుమారుడిని ప్రొఫెసర్ దూళ్ల వేధించారని, కుల వివక్షకు గురి చేశారని సాహిల్ తండ్రి రవీంద్ర వకోడ్ ఆరోపించారు. ఆయన ఫిర్యాదు ఆధారంగా పోలీసులు కేసు నమోదు చేశారు. ఈ ఆరోపణలు ప్రస్తుతం దర్యాప్తులో ఉన్నాయి.
18 డిమాండ్లతో విద్యార్థుల ఆందోళన
సాహిల్ మృతిపై నిష్పక్షపాత విచారణ జరపాలని, క్యాంపస్‌లో విద్యార్థుల భద్రత, మానసిక ఆరోగ్యానికి మరింత ప్రాధాన్యం ఇవ్వాలని విద్యార్థులు డిమాండ్ చేశారు. మొత్తం 18 అంశాలతో కూడిన చార్టర్‌ను IIT బాంబే యాజమాన్యం ముందు ఉంచారు. విద్యార్థులకు అకడమిక్ కమిటీల్లో ప్రాతినిధ్యం కల్పించడం, ప్రొఫెసర్లు-సిబ్బందికి మానసిక ఆరోగ్యంపై అవగాహన కార్యక్రమాలు నిర్వహించడం, కౌన్సెలింగ్ వ్యవస్థను మెరుగుపరచడం, డిసిప్లినరీ కమిటీ విధానాల్లో మార్పులు చేయడం వంటి డిమాండ్లు ఇందులో ఉన్నాయి. క్యాంపస్‌లో విద్యార్థుల ఆత్మహత్యలపై స్వతంత్ర విచారణ జరిపించాలని కూడా కోరారు. ఆదివారం రాత్రి విద్యార్థులతో సుదీర్ఘంగా చర్చించిన IIT బాంబే డైరెక్టర్ ప్రొఫెసర్ షిరీష్ కేదారే 18 డిమాండ్లతో కూడిన చార్టర్‌పై సంతకం చేశారు. దూళ్లపై చర్యలు తీసుకోవాలన్న డిమాండ్ కూడా ఇందులో ఉంది. అనంతరం సంస్థ ఆయనపై చర్యలు ప్రకటించింది.
సూర్యనారాయణకు ఫ్యాకల్టీ ఫోరం మద్దతు
మరోవైపు IIT బాంబే ఫ్యాకల్టీ ఫోరం ప్రొఫెసర్ సూర్యనారాయణ దూళ్లకు మద్దతుగా నిలిచింది. పరీక్ష సమయంలో అనధికారికంగా స్మార్ట్‌ఫోన్ వినియోగిస్తున్న విద్యార్థిని గుర్తించడం, ఆ విషయాన్ని సంస్థ నిబంధనల ప్రకారం అధికారులకు నివేదించడం మాత్రమే దూళ్ల చేసిన పని అని ఫ్యాకల్టీ ఫోరం పేర్కొంది. ఆయన సంస్థ నిర్దేశించిన విధానాల ప్రకారమే వ్యవహరించారని స్పష్టం చేసింది.
ఎవరీ సూర్యనారాయణ దూళ్ల?
సూర్యనారాయణ దూళ్ల IIT బాంబే ఎనర్జీ సైన్స్ అండ్ ఇంజినీరింగ్ విభాగంలో ప్రొఫెసర్‌గా పనిచేస్తున్నారు. పవర్ సిస్టమ్స్, స్మార్ట్ గ్రిడ్స్, మైక్రోగ్రిడ్స్, పునరుత్పాదక ఇంధన సమన్వయం వంటి అంశాల్లో ఆయన పరిశోధన చేస్తున్నారు. 2000లో నాగార్జున యూనివర్సిటీ నుంచి ఎలక్ట్రికల్ ఇంజినీరింగ్‌లో బీటెక్ పూర్తి చేసిన ఆయన.. 2002లో IIT బాంబే నుంచి ఎనర్జీ సిస్టమ్స్ ఇంజినీరింగ్‌లో ఎంటెక్ చేశారు. 2007లో IIT ఢిల్లీ నుంచి పవర్ సిస్టమ్స్‌లో పీహెచ్‌డీ పొందారు. IIT బాంబేలో చేరకముందు పలు విద్యా, పరిశోధనా సంస్థల్లో పనిచేశారు.
ప్రస్తుతం సాహిల్ మృతి, దూళ్లపై వచ్చిన ఆరోపణలు, పోలీసు దర్యాప్తు, విద్యార్థుల డిమాండ్లపై తదుపరి చర్యలపై ఉత్కంఠ కొనసాగుతోంది. ఈ కేసులో ఆరోపణలపై తుది నిర్ధారణ దర్యాప్తు పూర్తయ్యే వరకు పెండింగ్‌లోనే ఉంది.
