హైదరాబాద్, ఆగస్టు 11 (జనవాణి): ఆషాఢ బోనాల ఉత్సవాల్లో భాగంగా అటవీ, పర్యావరణ, దేవాదాయ ధర్మాదాయ శాఖ మంత్రి కొండా సురేఖ సికింద్రాబాద్ ఉజ్జయిని మహంకాళి అమ్మవారికి మారుబోనం సమర్పించారు. మంగళవారం ఆలయానికి చేరుకున్న మంత్రికి దేవాదాయ శాఖ డైరెక్టర్ హనుమంతరావు, అసిస్టెంట్‌ కమిషనర్‌ మనోహర్‌రెడ్డి, అర్చకులు డప్పు చప్పుళ్లు, శివసత్తుల పూనకాల మధ్య ఘనంగా స్వాగతం పలికారు.
మంత్రి సురేఖ అమ్మవారిని దర్శించుకుని ప్రత్యేక పూజలు నిర్వహించారు. అనంతరం ఆలయ ప్రధానార్చకుల ఆధ్వర్యంలో జరిగిన మారుబోనం సమర్పణ కార్యక్రమంలో పాల్గొని అమ్మవారికి బోనం సమర్పించారు. బోనమెత్తిన మహిళలకు ఈ సందర్భంగా మంత్రి సురేఖ చీర, సారె అందజేశారు.
తెలంగాణ సంప్రదాయాల్లో విశిష్ట ఆచారం
ఈ సందర్భంగా మంత్రి కొండా సురేఖ మాట్లాడుతూ.. సికింద్రాబాద్ ఉజ్జయిని మహంకాళి అమ్మవారి మారుబోనం కార్యక్రమంలో పాల్గొనడం ఎంతో ఆనందంగా ఉందన్నారు. అమ్మవారికి సమర్పించిన బియ్యంతో మారుబోనం చేయడం తెలంగాణ సంస్కృతి, సంప్రదాయాల్లో విశిష్టమైన ఆచారమని పేర్కొన్నారు.
అమ్మవారి ఆశీస్సులతో తెలంగాణ ప్రజలంతా సుఖసంతోషాలతో, ఆయురారోగ్యాలతో ఉండాలని ఆకాంక్షించారు. తెలంగాణ సంస్కృతి, సంప్రదాయాలకు ప్రతీకగా నిలిచే ఆషాఢ బోనాల పండుగను భక్తిశ్రద్ధలతో ఘనంగా నిర్వహించుకోవడం మనందరికీ గర్వకారణమన్నారు.
ప్రజల సహకారంతో వైభవంగా బోనాలు
ఈ ఏడాది ఆషాఢ బోనాల ఉత్సవాలను ప్రజలు ఆనందోత్సాహాలతో జరుపుకుంటున్నారని మంత్రి తెలిపారు. ప్రభుత్వ ఏర్పాట్లకు తోడు ప్రజల సహకారం కూడా ఉండటంతో బోనాల ఉత్సవాలు వైభవోపేతంగా జరుగుతున్నాయని పేర్కొన్నారు.
