తెలంగాణలో కాంగ్రెస్ ప్రభుత్వం అవినీతి, అక్రమాలకు కేంద్రంగా మారిందని బీఆర్ఎస్ వర్కింగ్ ప్రెసిడెంట్ కేటీఆర్ ఆరోపించారు. తెలంగాణ భవన్‌లో శనివారం మీడియాతో మాట్లాడిన ఆయన.. ప్రభుత్వంపై ప్రతిపక్షాలు చేస్తున్న విమర్శలే ఇప్పుడు అధికార పార్టీ ఎమ్మెల్యేల నోటి నుంచి కూడా వినిపిస్తున్నాయని అన్నారు. కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి చేసిన వ్యాఖ్యలతో తాను పూర్తిగా ఏకీభవిస్తున్నానని కేటీఆర్ తెలిపారు. అధికార పార్టీకి చెందిన ప్రజాప్రతినిధే ప్రభుత్వ పెద్దలపై అవినీతి ఆరోపణలు చేసే పరిస్థితి రావడం రాష్ట్రంలో పాలన ఏ స్థాయికి చేరిందో తెలియజేస్తోందన్నారు.
తెలంగాణను ఏఐసీసీకి ఏటీఎంగా మార్చారు
తెలంగాణను ఏఐసీసీకి ఏటీఎంగా మార్చారన్న ఆరోపణలు ప్రధానమంత్రి స్థాయి నుంచి వస్తున్నప్పటికీ కేంద్ర ప్రభుత్వం ఎందుకు చర్యలు తీసుకోవడం లేదని కేటీఆర్ ప్రశ్నించారు. ఎన్నికల సమయంలో రాజకీయ ఆరోపణలు చేయడం కాకుండా.. ఆరోపణల్లో వాస్తవం ఉంటే కేంద్ర దర్యాప్తు సంస్థలు నిష్పక్షపాతంగా విచారణ జరిపి నిజాలను ప్రజల ముందు ఉంచాలని డిమాండ్ చేశారు. మంత్రి పొంగులేటి శ్రీనివాస్ రెడ్డిపై గతంలో ఈడీ దాడులు జరిగాయని గుర్తుచేసిన కేటీఆర్.. ఆ తర్వాత విచారణ ఏ దశలో ఉందో ప్రజలకు స్పష్టత ఇవ్వలేదని విమర్శించారు. కేంద్ర దర్యాప్తు సంస్థలు రాజకీయ ప్రయోజనాలకు కాకుండా పారదర్శకంగా పనిచేయాలని అన్నారు.
రేవంత్ 18 గంటలు ఎవరి కోసం పనిచేస్తున్నారు?
ముఖ్యమంత్రి రేవంత్ రెడ్డి తాను రోజుకు 18 గంటలు పనిచేస్తున్నానని చెబుతున్నారని కేటీఆర్ వ్యాఖ్యానించారు. కుటుంబ సభ్యులు, అన్నదమ్ములు, బావమరుదులు, అల్లుడికి భూములు, కాంట్రాక్టులు, నిధులు దోచిపెట్టేందుకే సీఎం రేవంత్ రెడ్డి 18 గంటలు పనిచేస్తున్నారని ఆరోపించారు. రాష్ట్ర సంపద, భూములు, ప్రభుత్వ కాంట్రాక్టులు, ప్రజల నిధులు ప్రజల ప్రయోజనాలకే వినియోగించాల్సి ఉందని కేటీఆర్ అన్నారు. వాటిని కుటుంబ, బంధు, అనుచరుల ప్రయోజనాలకు మళ్లిస్తున్నారన్న ఆరోపణలు ఆందోళనకరమని పేర్కొన్నారు.
కల్యాణలక్ష్మిపై కేటీఆర్ ఫైర్
కల్యాణలక్ష్మి పథకాన్ని రద్దు చేసేందుకు కాంగ్రెస్ ప్రభుత్వం కుట్ర చేస్తోందని కేటీఆర్ ఆరోపించారు. ప్రభుత్వ నిర్లక్ష్యం కారణంగానే ఈ పథకానికి సంబంధించి హైకోర్టు తీర్పు వచ్చిందని అన్నారు. పేద కుటుంబాల్లో ఆడపిల్లల తల్లిదండ్రులకు భరోసా కల్పించడంతో పాటు బాల్య వివాహాలను అరికట్టడంలో, బాలికలు చదువుకు దూరం కాకుండా చూడటంలో కల్యాణలక్ష్మి కీలక పాత్ర పోషించిందని చెప్పారు. ఎన్నికల సమయంలో కల్యాణలక్ష్మితో పాటు తులం బంగారం ఇస్తామని కాంగ్రెస్ హామీ ఇచ్చిందని గుర్తుచేసిన కేటీఆర్.. అధికారంలోకి వచ్చిన తర్వాత ఉన్న పథకాన్నే నిర్వీర్యం చేసే ప్రయత్నం చేస్తోందని విమర్శించారు.
కేసీఆర్ కిట్, కల్యాణలక్ష్మి, షాదీ ముబారక్, రైతు బీమా వంటి పథకాల విషయంలో కాంగ్రెస్ ప్రభుత్వం నిర్లక్ష్యంగా వ్యవహరిస్తోందని ఆరోపించారు. గత బీఆర్ఎస్ ప్రభుత్వం అమలు చేసిన సంక్షేమ పథకాలు రాజకీయ ప్రయోజనాల కోసం కాకుండా పేదలు, రైతులు, మహిళలు, ఆడబిడ్డల జీవితాల్లో మార్పు తీసుకురావడానికి రూపొందించినవని కేటీఆర్ అన్నారు.
కోమటిరెడ్డి రాజగోపాల్ రెడ్డి వ్యాఖ్యలపై చర్చ
ఇదిలా ఉండగా.. యాదాద్రి భువనగిరి జిల్లా చౌటుప్పల్‌లో జరిగిన ఓ కార్యక్రమంలో కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి చేసిన వ్యాఖ్యలు రాజకీయంగా చర్చనీయాంశంగా మారాయి. తాను కాంగ్రెస్‌లోనే కొనసాగుతానని, రాహుల్ గాంధీ నాయకత్వంలో పనిచేస్తానని చెప్పిన రాజగోపాల్ రెడ్డి.. పార్టీలో బయటి వ్యక్తుల ఆధిపత్యం పెరుగుతోందని అసంతృప్తి వ్యక్తం చేశారు. తెలంగాణ ప్రజల ఆత్మగౌరవం కోసం రాష్ట్రం ఏర్పడిందని, ప్రభుత్వం ప్రజల కోసం పనిచేయాలి కానీ పెట్టుబడిదారులు, కాంట్రాక్టర్ల కోసం కాదని ఆయన వ్యాఖ్యానించారు. ఈ వ్యాఖ్యలు తెలంగాణ కాంగ్రెస్‌లో కొత్త చర్చకు దారితీశాయి. కాంగ్రెస్ ప్రభుత్వం ప్రజా ప్రయోజనాలకు ప్రాధాన్యం ఇవ్వాలని, లేకపోతే ప్రజలు తగిన సమయంలో తగిన సమాధానం చెబుతారని కేటీఆర్ హెచ్చరించారు.
