హైదరాబాద్: ఫీజు రీయింబర్స్‌మెంట్ బకాయిలను రాజకీయ అంశంగా మార్చి ముఖ్యమంత్రి రేవంత్ రెడ్డి రాజీనామా చేయాలని డిమాండ్ చేస్తున్న బీజేపీ రాష్ట్ర అధ్యక్షుడు ఎన్. రామచంద్రరావు ముందుగా కొన్ని ప్రశ్నలకు సమాధానం చెప్పాలని మంత్రి పొన్నం ప్రభాకర్ కోరారు.
ఫీజు రీయింబర్స్‌మెంట్ బకాయిలు ఒక్కరోజులో ఏర్పడిన సమస్య కాదని, గత బీఆర్ఎస్ ప్రభుత్వ హయాంలోనే అవి భారీగా పేరుకుపోయిన వారసత్వ సమస్య అని మంత్రి గుర్తు చేశారు. అప్పట్లో విద్యార్థులకు బకాయిలు పెరుగుతున్న సమయంలో బీజేపీ రాష్ట్ర నాయకత్వం ఎందుకు స్పందించలేదని ప్రశ్నించారు.
ప్రస్తుతం ఫీజు రీయింబర్స్‌మెంట్ పేరుతో ప్రభుత్వాన్ని విమర్శిస్తున్న బీజేపీ.. తాము అధికారంలో ఉన్న రాష్ట్రాల్లో ఎక్కడ ఈ పథకాన్ని అమలు చేస్తోందో ప్రజలకు చెప్పాలని సవాల్ విసిరారు. విద్యార్థుల సంక్షేమంపై నిజంగా చిత్తశుద్ధి ఉంటే దేశవ్యాప్తంగా ఫీజు రీయింబర్స్‌మెంట్ పథకాన్ని అమలు చేయాలని, లేదా రాష్ట్రాలపై పడుతున్న ఆర్థిక భారాన్ని కేంద్రం పంచుకోవాలని డిమాండ్ చేశారు.
ముఖ్యమంత్రి రేవంత్ రెడ్డి ఎమ్మెల్యే, ఎంపీ ఎన్నికల్లో పోటీ చేసే కనీస వయోపరిమితిని 21 సంవత్సరాలకు తగ్గించాలని చేసిన ప్రతిపాదన దేశవ్యాప్తంగా చర్చనీయాంశంగా మారిందని మంత్రి పేర్కొన్నారు. ఆ అంశంపై సమాధానం చెప్పకుండా ప్రజల దృష్టి మరల్చేందుకే బీజేపీ నాయకులు ఫీజు రీయింబర్స్‌మెంట్ అంశాన్ని ముందుకు తెస్తున్నారని ఆరోపించారు.
ఎమ్మెల్యే, ఎంపీ ఎన్నికల్లో పోటీ చేసే వయోపరిమితిని 21 సంవత్సరాలకు తగ్గించే ప్రతిపాదనకు కేంద్రంలోని బీజేపీ ప్రభుత్వం మద్దతు ఇస్తుందా? లేదా? అనే విషయాన్ని రామచంద్రరావు స్పష్టంగా వెల్లడించాలని మంత్రి డిమాండ్ చేశారు.
విద్యార్థి ప్రజాస్వామ్యాన్ని బలోపేతం చేయడానికి విద్యార్థి సంఘాల ఎన్నికలు నిర్వహించాలనే అభిప్రాయంతో కాంగ్రెస్ పార్టీ ఉందని పొన్నం ప్రభాకర్ చెప్పారు. ఈ అంశంపై బీజేపీ తన వైఖరిని స్పష్టం చేయాలని, విద్యార్థి సంఘాల ఎన్నికలకు మద్దతు ఇస్తుందా లేదా వ్యతిరేకిస్తుందా అనే విషయాన్ని ప్రజలకు వెల్లడించాలని కోరారు.
అదే సమయంలో పరీక్షల పేపర్ లీకేజీల కారణంగా విద్యార్థులు తీవ్ర ఇబ్బందులు ఎదుర్కొంటున్నారని పేర్కొంటూ, అలాంటి ఘటనలను అరికట్టడంలో విఫలమైన బీజేపీకి విద్యార్థుల సమస్యలపై ప్రశ్నించే నైతిక అర్హత లేదని మంత్రి పొన్నం ప్రభాకర్ విమర్శించారు.
