హైదరాబాద్, ఆగస్టు 19 (జనవాణి): తెలంగాణ ముఖ్యమంత్రి రేవంత్ రెడ్డి 10 రోజుల విదేశీ పర్యటనకు శ్రీకారం చుట్టనున్నారు. ఆగస్టు 20 నుంచి 30 వరకు బ్రిటన్, అమెరికాలో సీఎం పర్యటించనున్నారు. తెలంగాణకు పెట్టుబడులు తీసుకురావడంతో పాటు విద్యా రంగంలో అంతర్జాతీయ భాగస్వామ్యాలు కుదుర్చుకోవడం ఈ పర్యటన ప్రధాన లక్ష్యంగా ఉంది.
పర్యటనలో భాగంగా సీఎం రేవంత్ రెడ్డి తొలుత లండన్‌కు వెళ్లనున్నారు. ఆగస్టు 21న ఆక్స్‌ఫర్డ్ యూనివర్సిటీలోని బ్లావట్నిక్ స్కూల్ ఆఫ్ గవర్నమెంట్‌ను సందర్శించనున్నారు. అనంతరం ఎమిరేట్స్ స్టేడియంలో ఫుట్‌బాల్ ప్రజెంటేషన్‌లో పాల్గొంటారు. ఆగస్టు 22న కేంబ్రిడ్జ్ ప్రతినిధులతో సీఎం సమావేశం కానున్నారు. అదే రోజు ఉదయం యూనివర్సిటీ ఆఫ్ లండన్‌లోని సెనేట్ హౌస్‌ను, సాయంత్రం లండన్ బిజినెస్ స్కూల్‌ను సందర్శిస్తారు. ఆగస్టు 23న లండన్ నుంచి అమెరికాలోని బోస్టన్‌కు బయలుదేరుతారు.
అమెరికాలో ప్రముఖ వర్సిటీల సందర్శన
ఆగస్టు 24న బోస్టన్‌లోని హార్వర్డ్ యూనివర్సిటీ, ఎంఐటీ క్యాంపస్‌లను సీఎం సందర్శిస్తారు. ఆగస్టు 25న నార్త్‌ఈస్టర్న్ యూనివర్సిటీ క్యాంపస్‌ను సందర్శించడంతో పాటు వర్జీనియా టెక్ యూనివర్సిటీ ప్రతినిధులతో సమావేశమవుతారు. అదే రోజు రాత్రి బోస్టన్ నుంచి న్యూయార్క్‌కు వెళ్తారు. ఆగస్టు 26న న్యూయార్క్‌లో ఇండియన్ ఓవర్సీస్ కాంగ్రెస్ నిర్వహించే మీట్ అండ్ గ్రీట్ కార్యక్రమంలో సీఎం రేవంత్ రెడ్డి పాల్గొంటారు.
పెట్టుబడులపై ప్రత్యేక దృష్టి
ఆగస్టు 27, 28 తేదీల్లో గ్లోబల్ సీఈవోలు, వెంచర్ క్యాపిటలిస్టులు, బహుళజాతి సంస్థల ప్రతినిధులతో పారిశ్రామిక రౌండ్‌టేబుల్ సమావేశాల్లో సీఎం పాల్గొననున్నారు. ఐటీ, ఆర్టిఫిషియల్ ఇంటెలిజెన్స్, లైఫ్ సైన్సెస్, గ్రీన్ ఎనర్జీ, డేటా సెంటర్లు, మాన్యుఫ్యాక్చరింగ్ రంగాల్లో తెలంగాణకు పెట్టుబడులు ఆకర్షించడంపై ప్రధానంగా దృష్టి సారించనున్నారు. ముందుగా ఈ పర్యటనలో చైనా, జర్మనీలను కూడా చేర్చాలని భావించినప్పటికీ.. అసెంబ్లీ సమావేశాల నేపథ్యంలో పర్యటనను యూకే, అమెరికాకే పరిమితం చేసినట్లు తెలుస్తోంది.
ఆగస్టు 29న న్యూయార్క్ నుంచి హైదరాబాద్‌కు సీఎం తిరుగు ప్రయాణం కానున్నారు. ఆగస్టు 30న హైదరాబాద్ చేరుకోనున్నారు. విదేశీ పెట్టుబడులతో పాటు అంతర్జాతీయ విద్యా సంస్థలతో భాగస్వామ్యాలు, తెలంగాణ యువతకు మెరుగైన అంతర్జాతీయ ఉపాధి అవకాశాల కల్పన ఈ పర్యటనలో కీలక అంశాలుగా కనిపిస్తున్నాయి.
