తెలంగాణ రాజకీయాల్లో మరోసారి మాటల యుద్ధం ముదురుతోంది. బీఆర్ఎస్ మాజీ మంత్రి, సిద్దిపేట ఎమ్మెల్యే హరీశ్ రావుపై టీపీసీసీ అధ్యక్షుడు మహేశ్ కుమార్ గౌడ్ తీవ్ర ఆరోపణలు చేశారు. హరీశ్ రావు క్షుద్ర పూజలు చేస్తున్నారంటూ, అందుకు తమ వద్ద ఆధారాలు కూడా ఉన్నాయని పేర్కొంటూ సంచలన వ్యాఖ్యలు చేశారు.
హరీశ్ రావు ఈ ఏడాది మార్చి 2న తమిళనాడులోని తిరుచ్చికి, జూన్ 1న కర్ణాటకలోని శివమొగ్గకు వెళ్లారని మహేశ్ గౌడ్ తెలిపారు. ఆ తేదీల్లో ఆయన ఎక్కడ ఉన్నారో ప్రజలకు వివరించాలని డిమాండ్ చేశారు. తిరుపతి పర్యటన సందర్భంగా మీడియాతో మాట్లాడిన హరీశ్ రావు, అఘోరీ ఆలయానికి వెళ్లిన విషయాన్ని ఎందుకు వెల్లడించలేదని ప్రశ్నించారు.
తెలంగాణలో వర్షాలు పడకూడదని, కరువు రావాలని కోరుకుంటూ హరీశ్ రావు క్షుద్ర పూజలు చేశారని మహేశ్ గౌడ్ ఆరోపించారు. ప్రజల సంక్షేమం కోసం ప్రార్థించడం సహజమేనని, అయితే రాజకీయ ప్రయోజనాల కోసం ప్రజలకు కీడు జరగాలని కోరుకోవడం తగదని విమర్శించారు. ఈ వ్యవహారంలో నిజాలు బయటపెట్టినందుకే అద్దంకి దయాకర్, సామ రామ్మోహన్‌లకు లీగల్ నోటీసులు పంపించారని మహేశ్ గౌడ్ ఆరోపించారు. అయితే అలాంటి నోటీసులకు కాంగ్రెస్ భయపడదని స్పష్టం చేశారు.
మాజీ ముఖ్యమంత్రి కేసీఆర్ కూడా గతంలో అఘోరాలతో క్షుద్ర పూజలు చేశారనే ప్రచారం జరిగిందని మహేశ్ గౌడ్ పేర్కొన్నారు. ఇప్పుడు హరీశ్ రావుపై వస్తున్న ఆరోపణలతో ఆ ప్రచారంపై కూడా అనుమానాలు బలపడుతున్నాయని వ్యాఖ్యానించారు. యాదగిరిగుట్టకు వెళ్లి పొర్లు దండాలు పెట్టి మరీ ఏం చేశారో ప్రజలకు హరీశ్ రావు చెప్పాలని ఈ సందర్భంగా టీపీసీసీ చీఫ్ డిమాండ్ చేశారు. గతంలో మంత్రాలు, తంత్రాల పేరుతో ప్రజలను ఇబ్బందులకు గురిచేసిన ఘటనలు ఉన్నాయని, దేశంలోని కొన్ని రాష్ట్రాల్లో ఇలాంటి ఆచారాలను బలంగా నమ్ముతారని మహేశ్ గౌడ్ పేర్కొన్నారు.
అయితే, మహేశ్ కుమార్ గౌడ్ చేసిన ఈ ఆరోపణలు ఆయన వాదన మాత్రమే. ఈ ఆరోపణలపై హరీశ్ రావు లేదా బీఆర్ఎస్ పార్టీ నుంచి ఇప్పటివరకు అధికారిక స్పందన వెలువడలేదు.
