హైదరాబాద్, ఆగస్టు 11 (జనవాణి): స్వాతంత్య్ర దినోత్సవం సందర్భంగా ఆగస్టు 15న సంగారెడ్డిలో జరిగే భారీ బహిరంగ కార్యక్రమంలో ముఖ్యమంత్రి ఎ. రేవంత్‌రెడ్డి రాష్ట్రవ్యాప్తంగా కొత్త స్మార్ట్‌ రేషన్‌ కార్డుల పంపిణీని ప్రారంభించనున్నారని పౌరసరఫరాలు, నీటిపారుదల శాఖ మంత్రి ఎన్‌. ఉత్తమ్‌కుమార్‌రెడ్డి తెలిపారు. సంగారెడ్డి కార్యక్రమంతో పాటు రాష్ట్రంలోని మొత్తం 33 జిల్లాల కేంద్రాల్లో ఏకకాలంలో కార్యక్రమాలు నిర్వహించనున్నట్లు చెప్పారు.
స్మార్ట్‌ రేషన్‌ కార్డుల పంపిణీ ఏర్పాట్లపై మంగళవారం పౌరసరఫరాల కమిషనర్‌ స్టీఫెన్‌ రవీంద్ర, పౌరసరఫరాల సంస్థ అదనపు డైరెక్టర్ రోహిత్‌ సింగ్‌ తదితర ఉన్నతాధికారులతో మంత్రి సమీక్ష నిర్వహించారు. అంతకుముందు సంగారెడ్డి జిల్లా కలెక్టర్‌ ప్రతీక్‌ జైన్‌తోనూ ఏర్పాట్లపై చర్చించారు.
3.43 కోట్ల మందికి ఆహార భద్రత
తెలంగాణలో ప్రస్తుతం సుమారు 1.06 కోట్ల రేషన్‌ కార్డులు ఉండగా.. వాటి ద్వారా 3.43 కోట్ల మంది లబ్ధిదారులకు ఆహార భద్రత అందుతోందని ఉత్తమ్‌కుమార్‌రెడ్డి తెలిపారు. ప్రతి అర్హుడై లబ్ధిదారుడికి నెలకు ఆరు కిలోల సన్నబియ్యాన్ని ఉచితంగా అందిస్తున్నట్లు చెప్పారు. ఆగస్టు 15న స్మార్ట్‌ రేషన్‌ కార్డుల పంపిణీ సందర్భంగా లబ్ధిదారులకు ఎలాంటి ఇబ్బందులు కలగకుండా పౌరసరఫరాల శాఖ, జిల్లా యంత్రాంగాలు విస్తృత ఏర్పాట్లు చేయాలని ఆదేశించారు.
నిమిషం నిమిషానా కార్యక్రమం
సంగారెడ్డి కార్యక్రమాన్ని భారీ బహిరంగ కార్యక్రమంగా నిర్వహించనున్న నేపథ్యంలో లబ్ధిదారుల రాకపోకలు, కూర్చునే ఏర్పాట్లు, భద్రత, కార్డుల పంపిణీ తదితర అంశాలపై పకడ్బందీ ప్రణాళిక రూపొందించాలని మంత్రి సూచించారు. ముఖ్యమంత్రి షెడ్యూల్‌కు ఎలాంటి ఇబ్బంది కలగకుండా నిమిషం నిమిషానా కార్యక్రమాన్ని సిద్ధం చేయాలని ఆదేశించారు.
మధ్యాహ్నం సుమారు 2.30 గంటల నుంచి 3.35 గంటల వరకు కార్యక్రమం నిర్వహించి.. 3.45 గంటలకు ముఖ్యమంత్రి సంగారెడ్డి నుంచి బయలుదేరేలా ఏర్పాట్లు చేయాలని సూచించారు. ప్రసంగాలు, ఇతర కార్యక్రమాలను నిర్ణీత సమయంలోనే పూర్తి చేయాలని స్పష్టం చేశారు. ఎంపీలు, ఎమ్మెల్యేలు, ఎమ్మెల్సీలు, ఇతర ప్రజాప్రతినిధులకు పూర్తి వివరాలతో అధికారిక ఆహ్వానాలు పంపాలని ఆదేశించారు.
పారదర్శకంగా కార్డుల పంపిణీ
వివిధ వర్గాలకు చెందిన నిజమైన లబ్ధిదారులను గుర్తించి ముఖ్యమంత్రి చేతుల మీదుగా స్మార్ట్‌ రేషన్‌ కార్డులు అందజేయాలని మంత్రి సూచించారు. నిర్దేశిత లామినేటెడ్‌ ఫార్మాట్‌లో కార్డులను సిద్ధం చేయాలని తెలిపారు. కార్డుల పంపిణీని ఫెయిర్‌ ప్రైస్‌ షాపులు లేదా ఈ కార్యక్రమంతో పూర్తిగా అనుసంధానమైన ఏజెన్సీల ద్వారా క్రమబద్ధంగా నిర్వహించాలని ఉత్తమ్‌కుమార్‌రెడ్డి సూచించారు. కార్డు అందజేసే ముందు లబ్ధిదారుడి గుర్తింపును ధ్రువీకరించడం ద్వారా పారదర్శకతను పెంచడంతోపాటు వివాదాలకు తావులేకుండా చూడవచ్చని పేర్కొన్నారు.
మిగిలిన జిల్లాల్లో నిర్వహించే కార్యక్రమాలకు సంబంధించి కలెక్టర్లకు సమగ్ర మార్గదర్శకాలు జారీ చేయాలని, ఏర్పాట్లకు అవసరమైన ఖర్చులపై స్పష్టమైన విధివిధానాలను రూపొందించాలని అధికారులను ఆదేశించారు.
ఏటా రూ.14 వేల కోట్ల రేషన్‌ బియ్యం ఖర్చు
తెలంగాణలో ఆహార భద్రత కార్యక్రమం భారీ స్థాయిలో కొనసాగుతోందని మంత్రి తెలిపారు. రేషన్‌ బియ్యం కోసం రాష్ట్ర ప్రభుత్వం ఏటా సుమారు రూ.14 వేల కోట్లు ఖర్చు చేస్తోందని చెప్పారు. ధాన్యం కొనుగోళ్లకు మరో రూ.20 వేల కోట్ల వరకు వ్యయం చేస్తున్నట్లు తెలిపారు.
2025 జనవరి 26 నుంచి తెలంగాణ ప్రభుత్వం 6,32,810 కొత్త ఆహార భద్రత కార్డులను జారీ చేసిందని వెల్లడించారు. వీటి ద్వారా 61,08,544 మంది లబ్ధిదారులకు ప్రయోజనం కలుగుతోందన్నారు. 2026 ఆగస్టు నాటికి రాష్ట్రంలో మొత్తం 1,06,28,092 ఆహార భద్రత కార్డులు ఉన్నాయని తెలిపారు.
విస్తృత ప్రచారం చేయాలి
స్మార్ట్‌ రేషన్‌ కార్డుల ద్వారా పారదర్శకత, సామర్థ్యం, ప్రజలకు సౌకర్యం మరింత పెరుగుతుందని ఉత్తమ్‌కుమార్‌రెడ్డి అన్నారు. ఈ భారీ సంక్షేమ కార్యక్రమంపై ప్రజలకు విస్తృతంగా అవగాహన కల్పించేందుకు ప్రింట్‌, ఎలక్ట్రానిక్‌, సోషల్‌ మీడియాను వినియోగించాలని సూచించారు.
రేషన్‌ కార్డుల సంఖ్య, ఉచిత సన్నబియ్యం పంపిణీ, లబ్ధిదారులకు అందుతున్న ప్రయోజనాలను వివరించే షార్ట్‌ వీడియోలు, రీల్స్‌, ఇతర డిజిటల్‌ కంటెంట్‌ను రూపొందించాలని ఆదేశించారు. ఆగస్టు 15 నాటికి అన్ని ఏర్పాట్లు పూర్తి చేసి సంగారెడ్డి కార్యక్రమంతో పాటు 33 జిల్లాల్లో జరిగే కార్యక్రమాలను క్రమశిక్షణతో, లబ్ధిదారులకు అనుకూలంగా, గౌరవప్రదంగా నిర్వహించాలని మంత్రి సూచించారు.
