కూటమి ‘ప్రోగ్రెస్‌ రిపోర్ట్‌’ అబద్ధాల పుట్ట.. చంద్రబాబుపై మండిపడ్డ మాజీ మంత్రి బుగ్గన

హైదరాబాద్‌, ఆగస్టు 8 (జనవాణి): కూటమి ప్రభుత్వం విడుదల చేసిన ప్రోగ్రెస్‌ రిపోర్ట్‌ అబద్ధాల పుట్ట అని వైఎస్సార్‌సీపీ నేత, మాజీ ఆర్థికశాఖ మంత్రి బుగ్గన రాజేంద్రనాథ్‌ విమర్శించారు. శనివారం హైదరాబాద్‌ సోమాజిగూడ ప్రెస్‌క్లబ్‌లో మీడియాతో మాట్లాడిన ఆయన.. వైట్‌పేపర్లు, ప్రోగ్రెస్‌ రిపోర్టుల పేరుతో సీఎం చంద్రబాబు ప్రజలను మోసం చేస్తున్నారని ఆరోపించారు. ప్రజాస్వామ్యంలో ప్రోగ్రెస్‌ రిపోర్ట్‌ ఇచ్చేది ప్రజలేనని, చంద్రబాబు తనకు తానే రాసుకుంటున్నారని వ్యాఖ్యానించారు.

చంద్రబాబు అధికారంలోకి వచ్చిన ప్రతిసారీ గత ప్రభుత్వ హయాంలో అంతా పాతరాతి యుగంలో ఉన్నట్లు చిత్రీకరించడం అలవాటుగా మారిందని బుగ్గన అన్నారు. తాను అధికారంలోకి వచ్చిన తర్వాతే వెలుగు నింపినట్లు ప్రచారం చేసుకుంటున్నారని విమర్శించారు. సెల్‌ఫోన్లు, కంప్యూటర్లను తానే కనిపెట్టినట్లు, తెలుగు భాష నేర్పించి ప్రజలను అమెరికా పంపినట్లు చెప్పుకోవడం విడ్డూరంగా ఉందన్నారు. సొంత పార్టీ ఎమ్మెల్యేలను సైతం బహిరంగంగా మందలిస్తూ అవమానిస్తున్నారని ఆరోపించారు.

రైతులను పట్టించుకోవడం లేదు

కూటమి ప్రభుత్వం అధికారంలోకి వచ్చి రెండేళ్లు పూర్తయినా ఏ ఒక్క రంగంలోనూ పురోగతి లేదని బుగ్గన ఆరోపించారు. రాష్ట్రంలోని ఏ ఒక్క రైతూ ఈ పాలనపై సంతోషంగా లేడన్నారు. రైతులకు మద్దతు ధర, ఇన్‌పుట్‌ సబ్సిడీ, పంటల బీమా వంటి వాటిని నిలిపివేశారని విమర్శించారు. ‘సూపర్‌ సిక్స్‌’ హామీల పేరుతో ఓట్లు వేయించుకుని మహిళలను మోసం చేశారని ఆరోపించారు. నిరుద్యోగ భృతి రూ.3 వేలు, ‘ఆడబిడ్డ నిధి’ కింద నెలకు రూ.1,500 ఇస్తామన్న హామీలు ఏమయ్యాయని ప్రశ్నించారు. మూడు ఉచిత గ్యాస్‌ సిలిండర్ల పథకాన్ని సైతం అరకొరగా అమలు చేసి చేతులు దులుపుకున్నారని అన్నారు.

అప్పు అనేది బూటకం అని చంద్రబాబు చెప్పడం ప్రపంచంలోనే పెద్ద వింత అని బుగ్గన వ్యాఖ్యానించారు. వైఎస్సార్సీపీ ప్రభుత్వ హయాంలో రాష్ట్ర అప్పులపై తప్పుడు ప్రచారం చేశారని ఆరోపించారు. వైఎస్సార్సీపీ ప్రభుత్వం దిగిపోయే నాటికి వాస్తవ అప్పు రూ.7.22 లక్షల కోట్లు మాత్రమేనని పేర్కొన్నారు. గతంలో రూ.14 లక్షల కోట్ల అప్పు చేశారని చంద్రబాబు చెప్పారని, కూటమి ప్రభుత్వం అధికారంలోకి వచ్చిన తర్వాత అప్పులు మరింత పెంచిందని విమర్శించారు. ఈ రెండేళ్లలో రాష్ట్ర సొంత ఆదాయం కూడా గణనీయంగా పడిపోయిందన్నారు.

పోలవరాన్ని నాశనం చేసింది చంద్రబాబే

పోలవరం ప్రాజెక్టును తొలుత నాశనం చేసింది చంద్రబాబేనని బుగ్గన ఆరోపించారు. వైఎస్‌ జగన్‌మోహన్‌రెడ్డి ప్రభుత్వం ఐదేళ్లపాటు పోలవరం కోసం కృషి చేసిందని, కేంద్రం నుంచి నిధుల ఆమోదం సాధించిందని చెప్పారు. విశాఖ విమానాశ్రయాన్ని ప్రైవేటు వ్యక్తులకు అప్పగించే ప్రయత్నాలు జరుగుతున్నాయని ఆరోపించారు.

అమరావతి రాజధాని నిర్మాణం పేరుతో రియల్‌ ఎస్టేట్‌ వ్యాపారం చేస్తున్నారని బుగ్గన విమర్శించారు. చదరపు అడుగుకు రూ.20 వేల చొప్పున భవనాలు నిర్మించడం వెనుక పెద్ద కుంభకోణం ఉందని ఆరోపించారు. హైదరాబాద్‌ నానక్‌రామ్‌గూడలో చదరపు అడుగు రూ.6 వేలకే అందుబాటులో ఉందని పేర్కొన్నారు. అమరావతి ముంపు ప్రాంతంలో ఉందని శివరామకృష్ణ కమిటీ అప్పట్లోనే స్పష్టం చేసిందన్నారు.

వైఎస్సార్సీపీ హయాంలో ఎన్నో కార్యక్రమాలు

వైఎస్సార్సీపీ ప్రభుత్వ హయాంలో సచివాలయాల ద్వారా 1.35 లక్షల శాశ్వత ఉద్యోగాలు ఇచ్చామని బుగ్గన తెలిపారు. రాష్ట్రవ్యాప్తంగా 10 వేలకు పైగా విలేజ్‌ క్లినిక్‌లు, 10,700 రైతు భరోసా కేంద్రాలు ఏర్పాటు చేశామన్నారు. ‘నాడు–నేడు’ ద్వారా ప్రభుత్వ పాఠశాలలు, ఆసుపత్రుల రూపురేఖలు మార్చామని పేర్కొన్నారు. 17 కొత్త మెడికల్‌ కాలేజీలను మంజూరు చేశామని, నాలుగు ఓడరేవులు, ఆరు ఫిష్‌ ల్యాండింగ్‌ సెంటర్లు నిర్మించామని చెప్పారు. ఉచిత పంటల బీమా కింద రైతులకు రూ.8 వేల కోట్లు చెల్లించామని తెలిపారు. ‘చేయూత’, ‘ఆసరా’, ‘కాపునేస్తం’, ‘ఈబీసీ నేస్తం’ పథకాల ద్వారా లక్షలాది మందికి ఆర్థిక ప్రయోజనం కల్పించామని పేర్కొన్నారు.

ప్రజల వద్దకు వెళ్లి ప్రోగ్రెస్‌ రిపోర్ట్‌ తీసుకోవాలి

రాష్ట్రంలో రెండేళ్ల కూటమి పాలనతో అన్ని రంగాలు అస్తవ్యస్తంగా మారాయని బుగ్గన ఆరోపించారు. రూముల్లో కూర్చుని ప్రోగ్రెస్‌ రిపోర్టులు రాయడం కాదని, ప్రజల వద్దకు వెళ్లి వారి అభిప్రాయాలను తెలుసుకోవాలని సూచించారు. చంద్రబాబు అబద్ధాలు, ఆత్మవంచన మానుకోవాలని హితవు పలికారు. వైఎస్సార్సీపీ అధినేత వైఎస్‌ జగన్‌మోహన్‌రెడ్డి ప్రజల్లోకి వస్తుండటంతో కూటమి ప్రభుత్వానికి వణుకు పుడుతోందని అన్నారు. అబద్ధాల కూటమి ప్రభుత్వానికి ప్రజలే త్వరలో తగిన బుద్ధి చెబుతారని బుగ్గన వ్యాఖ్యానించారు.