దేశంలో డిజిటల్ చెల్లింపులకు కీలక వేదికగా మారిన యూనిఫైడ్ పేమెంట్స్ ఇంటర్‌ఫేస్ (UPI)పై కొత్త ఛార్జీల విధింపును వ్యాపార వర్గాలు వ్యతిరేకిస్తున్నాయి. ఈ నిర్ణయానికి నిరసనగా అక్టోబర్ 2న ‘నో యూపీఐ డే’ పాటించాలని పలు వాణిజ్య, వ్యాపార సంఘాలు నిర్ణయించాయి. ఆ రోజున దుకాణాల్లోని యూపీఐ QR కోడ్‌లు, స్కానర్లు, సౌండ్ బాక్సులను నల్లటి వస్త్రంతో కప్పి నిరసన తెలపాలని పిలుపునిచ్చాయి.
అక్టోబర్ 15 నుంచి కొత్త నిబంధనలు
అక్టోబర్ 15 నుంచి వ్యాపారులు స్వీకరించే రూ.2,000కు పైబడిన ప్రతి P2M (పర్సన్ టు మర్చంట్) యూపీఐ లావాదేవీపై 0.4 శాతం మర్చంట్ డిస్కౌంట్ రేట్ (MDR) చెల్లించాల్సి ఉంటుంది. అయితే ఒక్కో లావాదేవీపై గరిష్ఠంగా రూ.300 మాత్రమే ఛార్జ్ చేయనున్నారు.
వ్యక్తుల మధ్య జరిగే P2P (పర్సన్ టు పర్సన్) లావాదేవీలకు ఈ ఛార్జీలు వర్తించవు. అలాగే నెలకు రూ.1 లక్ష వరకు యూపీఐ చెల్లింపులు స్వీకరించే చిన్న వ్యాపారులకు కూడా MDR నుంచి మినహాయింపు ఇచ్చారు. 2026 ఆగస్టులో వ్యాపారులకు యూపీఐ ద్వారా రూ.8.95 ట్రిలియన్ల విలువైన 15.51 బిలియన్ల లావాదేవీలు జరిగినట్లు గణాంకాలు సూచిస్తున్నాయి. వీటిలో రూ.2,000కు పైబడిన చెల్లింపుల వాటా సుమారు 67 శాతంగా ఉంది.
భారం పెరుగుతుందంటున్న వ్యాపారులు
ఇప్పటికే మార్జిన్లు తక్కువగా ఉన్న పరిస్థితుల్లో యూపీఐ లావాదేవీలపై అదనపు ఛార్జీలు విధిస్తే తమపై ఆర్థిక భారం మరింత పెరుగుతుందని వ్యాపార సంఘాలు చెబుతున్నాయి. డిజిటల్ చెల్లింపులను ప్రోత్సహించి, పారదర్శక లావాదేవీలను నిర్వహిస్తున్న వ్యాపారులపై ఛార్జీలు విధించడం సరికాదని వారు వాదిస్తున్నారు. మహారాష్ట్ర ఛాంబర్ ఆఫ్ కామర్స్ (MACCIA), ఆల్ ఇండియా కన్స్యూమర్ ప్రొడక్ట్స్ డిస్ట్రిబ్యూటర్స్ ఫెడరేషన్ (AICPDF) సహా పలు జాతీయ స్థాయి వాణిజ్య సంఘాలు నిరసనకు మద్దతు ప్రకటించాయి.
పెట్రోలియం డీలర్లు, బ్రోకర్లకూ ఆందోళన
యూపీఐ ఛార్జీల నుంచి తమకు కూడా మినహాయింపు ఇవ్వాలని పెట్రోలియం డీలర్లు, స్టాక్ బ్రోకర్లు కోరుతున్నారు. పెట్రోలియం డీలర్ల సమస్యలపై ఇప్పటికే సంబంధిత మంత్రిత్వ శాఖ చర్చలు జరిపింది. మరోవైపు క్యాపిటల్ మార్కెట్ లావాదేవీలపై విధించిన 0.02 శాతం MDR విషయంలో బ్రోకర్ల ఆందోళనలను పరిశీలిస్తామని సెబీ హామీ ఇచ్చింది. అక్టోబర్ 15లోగా కొత్త ఛార్జీలను ఉపసంహరించుకోకపోతే తమ నిరసనను మరింత ఉద్ధృతం చేస్తామని వ్యాపార సంఘాలు హెచ్చరించాయి.
