కారు డిక్కీలో మహిళ మృతి కేసులో షాకింగ్ ట్విస్ట్! కూతురి హత్యకు తండ్రే సుపారీ?

జనవాణి: న్యూస్ డెస్క్ August 25: హనుమకొండ జిల్లా ఎల్కతుర్తిలో కారు డిక్కీలో మహిళ మృతదేహం లభించిన కేసులో పోలీసులు సంచలన విషయాలను వెలుగులోకి తెచ్చారు. పెద్దపల్లి జిల్లా గోదావరిఖనికి చెందిన మానస (33)ను ఆమె తండ్రి రాజేశం ఆదేశాల మేరకే ఆమెకు సన్నిహితంగా ఉన్న వినోద్‌కుమార్ హత్య చేసినట్లు దర్యాప్తులో తేలిందని పోలీసులు తెలిపారు. కుటుంబ పరువు పోతోందంటూ కుమార్తెను చంపేయాలని తండ్రి చెప్పినట్లు నిందితుడు వెల్లడించినట్లు పోలీసులు పేర్కొన్నారు.

కారు డిక్కీలో మృతదేహం.. అసలు కథేంటి?

ఎల్కతుర్తి పరిసరాల్లో కారు డిక్కీలో మానస మృతదేహం లభించడంతో పోలీసులు దర్యాప్తు ప్రారంభించారు. మృతదేహాన్ని గుర్తించిన అనంతరం కేసులో కీలక ఆధారాలను సేకరించారు. దర్యాప్తులో భాగంగా ఎల్కతుర్తికి చెందిన వినోద్‌కుమార్‌ను అదుపులోకి తీసుకుని ప్రశ్నించగా హత్యకు సంబంధించిన వివరాలు వెలుగులోకి వచ్చినట్లు పోలీసులు తెలిపారు.

మానసకు గతంలో రెండు వివాహాలు

పోలీసుల వివరాల ప్రకారం.. మానసకు గతంలో రెండు వివాహాలు జరిగాయి. ఇద్దరితోనూ విడాకులు తీసుకున్న అనంతరం ఆమె పుట్టింట్లో ఉంటోంది. ఈ క్రమంలో కరీంనగర్‌కు చెందిన వినోద్‌కుమార్‌తో ఆమె సన్నిహితంగా ఉంటున్నట్లు సమాచారం.

పెళ్లి చేసుకోవాలని ఒత్తిడి

గతవారం అరుణాచలం వెళ్తున్నానని చెప్పి మానస వినోద్‌కుమార్ గదికి వెళ్లినట్లు పోలీసులు తెలిపారు. తనను పెళ్లి చేసుకోవాలని ఆమె వినోద్‌పై ఒత్తిడి తెచ్చినట్లు దర్యాప్తులో వెల్లడైందన్నారు. దీంతో వినోద్ మానస తండ్రి రాజేశంకు ఫోన్ చేసి ఈ విషయం చెప్పినట్లు తెలిపారు.

‘నా వల్ల పరువు పోతోంది.. చంపేయ్’

మానస తమ మాట వినకుండా ఇష్టారీతిన వ్యవహరిస్తోందని, కుటుంబ సభ్యులను ఇబ్బందులకు గురిచేస్తోందని రాజేశం ఆగ్రహం వ్యక్తం చేసినట్లు పోలీసులు తెలిపారు. తన కుమార్తె వల్ల కుటుంబ పరువు పోతోందని చెబుతూ.. ఆమెను చంపేయాలని వినోద్‌కుమార్‌కు రాజేశం చెప్పినట్లు నిందితుడు విచారణలో వెల్లడించాడని పేర్కొన్నారు.

గొంతు నులిమి హత్య చేసినట్లు..

తండ్రి ఆదేశాల మేరకు మానసను గొంతు నులిమి హత్య చేసినట్లు వినోద్‌కుమార్ అంగీకరించాడని పోలీసులు తెలిపారు. అనంతరం మృతదేహాన్ని కారులోని డిక్కీలో పెట్టుకుని ఎల్కతుర్తిలోని తన ఇంటి పరిసర ప్రాంతాలకు తీసుకెళ్లినట్లు వెల్లడైందన్నారు.

మృతదేహం నుంచి దుర్వాసన రావడంతో..

మానస మృతదేహాన్ని అక్కడ పాతిపెట్టేందుకు వినోద్ ఏర్పాట్లు చేస్తున్న సమయంలో దుర్వాసన రావడంతో స్థానికులు అనుమానం వ్యక్తం చేసి పోలీసులకు సమాచారం అందించినట్లు పోలీసులు తెలిపారు. దీంతో ఎల్కతుర్తి శివారులో వినోద్‌కుమార్‌ను పోలీసులు అరెస్ట్ చేశారు.

కోర్టుకు తరలింపు

విచారణలో హత్యకు సంబంధించిన వివరాలు వెలుగులోకి వచ్చిన అనంతరం నిందితుడు వినోద్‌కుమార్‌ను పోలీసులు కోర్టులో హాజరుపరిచారు. అనంతరం రిమాండ్‌కు తరలించినట్లు తెలిపారు. కేసులో మానస తండ్రి రాజేశం పాత్రపైనా పోలీసులు దర్యాప్తు కొనసాగిస్తున్నారు.