రైలులో సాధారణ తనిఖీల్లో భాగంగా ఓ ప్రయాణికురాలిని టీటీఈ టికెట్ చూపించాలని కోరారు. అయితే ఆమె వద్ద చెల్లుబాటు అయ్యే టికెట్ లేకపోవడంతో వివాదం మొదలైనట్లు వీడియోలో కనిపిస్తోంది. తొలుత డబ్బులు ఇస్తానంటూ ఆమె బేరసారాలకు దిగగా, “నాకు డబ్బులు వద్దు.. టికెట్ కావాలి” అంటూ టీటీఈ స్పష్టం చేసినట్లు తెలుస్తోంది.
సోదరుడు కూడా టీటీఈ అంటూ బెదిరింపులు
డబ్బులు తీసుకునేందుకు టీటీఈ అంగీకరించకపోవడంతో యువతి తన ధోరణిని మార్చినట్లు వీడియోలో కనిపిస్తోంది. తన సోదరుడు కూడా రైల్వేలో టీటీఈగా పనిచేస్తున్నాడని, తనను ఎవరూ ఏమీ చేయలేరంటూ ఆమె బెదిరించినట్లు ఆరోపణలు ఉన్నాయి.
దుస్తులు చింపుకుని.. 112కు ఫోన్
టీటీఈపై ఒత్తిడి పనిచేయకపోవడంతో యువతి తన పైబట్టలను తానే చింపుకున్నట్లు వీడియోలో కనిపిస్తోంది. అనంతరం ఫోన్‌లో మాట్లాడుతూ టీటీఈ తన బట్టలు లాగుతున్నాడని, తనను తాకుతున్నాడని ఆరోపించినట్లు తెలుస్తోంది. ఆ వెంటనే అత్యవసర నంబర్ 112కు ఫోన్ చేసి పోలీసులకు ఫిర్యాదు చేస్తానంటూ హెచ్చరించినట్లు సమాచారం.
టీటీఈ సమయస్ఫూర్తితో వీడియో రికార్డింగ్
మరోవైపు, యువతి ఆరోపణలు చేస్తున్న సమయంలో టీటీఈ సహనం కోల్పోకుండా వ్యవహరించినట్లు వీడియోలో కనిపిస్తోంది. ఆమెను ముందుగా దుస్తులు సర్దుకోవాలని, భయపడాల్సిన అవసరం లేదని చెబుతూ, 112కు ఫోన్ చేసుకోవచ్చని చెప్పినట్లు తెలుస్తోంది. అదే సమయంలో టీటీఈ తన మొబైల్‌లో వీడియో రికార్డ్ చేయడం ప్రారంభించడంతో ఘటనలో చోటుచేసుకున్న పరిణామాలు కెమెరాలో నమోదయ్యాయి. ఈ వీడియోనే ఇప్పుడు సోషల్ మీడియాలో వైరల్ అవుతోంది.
రైల్వే సిబ్బంది భద్రతపై చర్చ
ఈ ఘటనపై సోషల్ మీడియాలో విస్తృతంగా చర్చ జరుగుతోంది. ప్రయాణికులతో నేరుగా వ్యవహరించే టీటీఈలు, ఇతర ఫ్రంట్‌లైన్ రైల్వే సిబ్బందికి బాడీ-వార్న్ కెమెరాలు అందించాలని పలువురు డిమాండ్ చేస్తున్నారు. విధి నిర్వహణ సమయంలో చోటుచేసుకునే వివాదాలకు వీడియో రికార్డింగ్ ఆధారంగా ఉపయోగపడుతుందని వారు అభిప్రాయపడుతున్నారు.
Loading Tweet...
