కర్ణాటక,సెప్టెంబర్ 9 (జనవాణి): కర్ణాటకలో అధికార కాంగ్రెస్, ప్రతిపక్ష బీజేపీ మధ్య మరోసారి మాటల యుద్ధం మొదలైంది. కాంగ్రెస్ మంత్రి ఎస్‌.ఎస్‌.మల్లికార్జున చేసినట్లు ప్రచారంలో ఉన్న వ్యాఖ్యలు తీవ్ర వివాదానికి దారితీశాయి. హరిహర బీజేపీ ఎమ్మెల్యే బీపీ హరీశ్‌ను చెప్పులతో కొట్టాలని మంత్రి అన్నట్లు ఉన్న వీడియో ప్రస్తుతం సోషల్ మీడియాలో వైరల్ అవుతోంది.
రైతుల నీటి సమస్యపై ఫిర్యాదు
హరిహరలో జరిగిన ఓ బహిరంగ కార్యక్రమంలో కొందరు రైతులు మంత్రి మల్లికార్జునను కలిసి తమ సమస్యలను వివరించినట్లు తెలుస్తోంది. భద్రా జలాశయం నుంచి తమ ప్రాంతానికి సాగునీటిని విడుదల చేయాలని వారు కోరారు. తాగునీటితో పాటు పశువులకు కూడా నీరు అందడం లేదని ఆవేదన వ్యక్తం చేశారు. తాము బీజేపీ ఎమ్మెల్యే బీపీ హరీశ్‌ను కలిసి భద్రా నీటి కోసం విజ్ఞప్తి చేశామని రైతులు మంత్రికి వివరించారు. జిల్లా ఇన్‌ఛార్జ్‌ మంత్రిని కలవాలని ఎమ్మెల్యే సూచించినట్లు తెలిపారు.
ఎమ్మెల్యేపై మంత్రి ఆగ్రహం?
రైతుల మాటలతో మంత్రి మల్లికార్జున ఆగ్రహం వ్యక్తం చేసినట్లు వైరల్ వీడియోలో కనిపిస్తోంది. ఎమ్మెల్యే హరీశ్‌ను ‘అన్న’ అని సంబోధించవద్దని రైతులకు సూచించినట్లు, ఆయనను చెప్పులతో కొట్టాలని వ్యాఖ్యానించినట్లు వీడియోలో వినిపిస్తోంది. ఈ వ్యాఖ్యలు తీవ్ర రాజకీయ వివాదానికి కారణమయ్యాయి. ప్రజాప్రతినిధిపై మంత్రి ఇలాంటి వ్యాఖ్యలు చేయడం సరికాదంటూ బీజేపీ నేతలు విమర్శలు గుప్పించారు.
మంత్రి వ్యాఖ్యలపై హరీశ్ ఫైర్
మల్లికార్జున వ్యాఖ్యలపై బీజేపీ ఎమ్మెల్యే బీపీ హరీశ్ తీవ్రంగా స్పందించారు. రైతులు భద్రా నీటి సమస్యను పరిష్కరించాలని కోరేందుకు మంత్రిని కలిస్తే.. తనపై అభ్యంతరకరమైన వ్యాఖ్యలు చేశారని ఆరోపించారు. తనపై అసభ్య పదజాలం ఉపయోగించడాన్ని ఆయన తప్పుబట్టారు. దీనికి ప్రజలే తగిన సమాధానం చెబుతారని హెచ్చరించారు. కర్ణాటక బీజేపీ అధ్యక్షుడు బీవై విజయేంద్ర కూడా మంత్రి వ్యాఖ్యలను ఖండించారు. ప్రజాప్రతినిధిపై మంత్రి అనుచిత వ్యాఖ్యలు చేయడం సమర్థనీయం కాదన్నారు. రైతులు నీటి సమస్యతో వస్తే దానిని పరిష్కరించాల్సిన బాధ్యత ప్రభుత్వంపై ఉందని, రాజకీయ ప్రత్యర్థిపై విమర్శలకు దిగడం సరికాదని వ్యాఖ్యానించారు.
Loading Tweet...
అయితే సోషల్ మీడియాలో వైరల్ అవుతున్న వీడియోకు సంబంధించిన పూర్తి సందర్భం, వీడియో ప్రామాణికతపై అధికారికంగా స్పష్టత రావాల్సి ఉంది.
