కర్ణాటక, అక్టోబర్ 5 జనవాణి): కర్ణాటకలో గ్రామీణ యువత ఎదుర్కొంటున్న ఓ సామాజిక సమస్య ఇప్పుడు రాష్ట్రవ్యాప్తంగా చర్చనీయాంశంగా మారింది. వ్యవసాయం చేస్తున్న యువకులకు పెళ్లిళ్లు కావడం లేదంటూ ఓ యువరైతు డిప్యూటీ సీఎం డీకే శివకుమార్‌కు చేసిన విజ్ఞప్తి సోషల్ మీడియాలో వైరల్‌గా మారింది.
మైసూరు జిల్లాలో నిర్వహించిన ప్రజావాణి కార్యక్రమంలో ఓ యువరైతు తన సమస్యను నేరుగా డీకే శివకుమార్ దృష్టికి తీసుకెళ్లారు. గ్రామాల్లో చాలామంది యువకులకు సొంత ఇళ్లు, పొలాలు ఉన్నప్పటికీ వివాహాలు జరగడం లేదని ఆవేదన వ్యక్తం చేశారు.
ప్రభుత్వ ఉద్యోగులకే ప్రాధాన్యం..
ప్రస్తుతం చాలామంది అమ్మాయిలు, వారి కుటుంబాలు ప్రభుత్వ ఉద్యోగాలు లేదా అధిక వేతనాలు వచ్చే ఉద్యోగాల్లో ఉన్న యువకులనే వివాహానికి ప్రాధాన్యంగా ఎంచుకుంటున్నారని ఆయన అన్నారు. దీంతో వ్యవసాయంపై ఆధారపడుతున్న యువకులు 30, 40 ఏళ్లు దాటినా పెళ్లి కాకుండా మిగిలిపోతున్నారని పేర్కొన్నారు. ఈ పరిస్థితి కొందరిలో తీవ్ర మానసిక వేదనకు దారితీస్తోందని, మరికొందరు ఆత్మహత్యలకు కూడా పాల్పడుతున్నారని ఆయన ఆందోళన వ్యక్తం చేశారు.
‘మా పెళ్లిళ్లను ఆరో గ్యారంటీగా చూడండి’
కాంగ్రెస్ ప్రభుత్వం ప్రకటించిన ఐదు గ్యారంటీల తరహాలో గ్రామీణ యువ రైతుల వివాహ సమస్యను కూడా ఒక ప్రత్యేక సమస్యగా పరిగణించి పరిష్కరించాలని యువరైతు కోరారు. తమ పెళ్లిళ్ల సమస్యను ‘ఆరో గ్యారంటీ’గా భావించి ప్రభుత్వం చర్యలు తీసుకోవాలని విజ్ఞప్తి చేశారు. యువరైతు మాటలు విన్న డీకే శివకుమార్ తొలుత ఆశ్చర్యపోయినా, ఆ తర్వాత అతడి సమస్యను శ్రద్ధగా విన్నారు. సభలో కొందరు నవ్వడంతో ఇది నవ్వుకునే విషయం కాదని, తీవ్రమైన సామాజిక సమస్య అని ఆయన సూచించారు.
వైరల్ వీడియోతో కొత్త చర్చ
ఈ ఘటనకు సంబంధించిన వీడియో సోషల్ మీడియాలో వైరల్ కావడంతో గ్రామీణ ప్రాంతాల్లో యువత ఎదుర్కొంటున్న సమస్యలపై చర్చ మొదలైంది. వ్యవసాయంపై యువతలో తగ్గుతున్న ఆసక్తి, గ్రామాల నుంచి పట్టణాలకు వలసలు, ఉద్యోగాల స్వరూపంలో వచ్చిన మార్పులు, వివాహాల్లో మారుతున్న ప్రాధాన్యతలు వంటి అంశాలు తెరపైకి వచ్చాయి. ఆస్తులు, భూములు ఉన్నప్పటికీ వ్యవసాయం చేసే యువకులకు వివాహ సంబంధాలు కుదరడం కష్టంగా మారడం ఎందుకు? అనే ప్రశ్నపై నెటిజన్లు కూడా చర్చిస్తున్నారు. మొత్తంగా, ఓ యువరైతు చేసిన ఈ విజ్ఞప్తి కర్ణాటకలో గ్రామీణ యువత ఎదుర్కొంటున్న మరో కోణాన్ని వెలుగులోకి తెచ్చింది.
Loading Tweet...
