తిరువనంతపురం,సెప్టెంబర్ 25 (జనవాణి): కల నెరవేర్చుకోవడానికి వయసు అడ్డంకి కాదని నిరూపిస్తున్నారు అనిజ. 11 ఏళ్లుగా వాయిదా పడుతూ వచ్చిన తన వంట వ్యాపార కలను ఈ ఏడాది ఆగస్టులో నిజం చేసుకున్నారు. ప్రస్తుతం ఉద్యోగం చేస్తూనే అరిటాకులో దమ్ బిర్యానీ విక్రయిస్తూ ప్రత్యేక గుర్తింపు తెచ్చుకున్నారు.
ప్రతిరోజూ తెల్లవారుజామున 3 గంటలకే అనిజ వంటగదిలో సందడి మొదలవుతుంది. తిరువనంతపురంలోని సస్థమంగళంలోని తన ఇంట్లో బిర్యానీ తయారు చేసి, వంచియూర్ ప్రాంతంలో విక్రయిస్తున్నారు. పగటిపూట ప్రైవేట్ మెర్చంట్ నేవీ రిక్రూట్‌మెంట్ కార్యాలయంలో హెచ్‌ఆర్‌గా పనిచేస్తూనే ఈ వ్యాపారాన్ని కొనసాగిస్తున్నారు.
తొలినాళ్లలో అంతా కష్టమే..
వంట చేయడంపై ఎంతో ఆసక్తి ఉన్నప్పటికీ పరిస్థితుల కారణంగా అనిజ తన కలను 11 ఏళ్ల పాటు పక్కన పెట్టాల్సి వచ్చింది. చివరకు ఈ ఏడాది ఆగస్టు మధ్యలో ఇక ఆలస్యం చేయకూడదని నిర్ణయించుకున్నారు. వంచియూర్ కోర్టు కాంప్లెక్స్‌ సమీపంలో కేవలం 17 బిర్యానీ ప్యాకెట్లతో వ్యాపారాన్ని ప్రారంభించారు. అయితే ప్రారంభంలో ఆశించిన స్థాయిలో అమ్మకాలు జరగలేదు. మంచి రోజుల్లో కూడా ఐదారు ప్యాకెట్లు మాత్రమే అమ్ముడయ్యేవి. మిగిలిన బిర్యానీని వృథా చేయకుండా రోడ్డుపై ఉన్న నిరాశ్రయులకు పంచిపెట్టేవారు. అయినా అనిజ మాత్రం ప్రయత్నాన్ని ఆపలేదు.
ఒక్క వీడియో.. పెరిగిన డిమాండ్
క్రమంగా కోర్టు లాయర్లు, యూనివర్సిటీ విద్యార్థులు, ఆటో డ్రైవర్లు ఆమె బిర్యానీకి కస్టమర్లుగా మారారు. ఇంతలో ప్రముఖ యూట్యూబర్ అనిజ గురించి వీడియో రూపొందించి సోషల్ మీడియాలో పోస్ట్ చేశారు. ఆ వీడియో వైరల్ కావడంతో ఆమె బిర్యానీకి డిమాండ్ ఒక్కసారిగా పెరిగింది.
ఆ వీడియో తర్వాత నా సేల్స్ ఊహించని విధంగా పెరిగాయి అని అనిజ తెలిపారు. గతంలో రోజుకు 5-6 ప్యాకెట్లు మాత్రమే విక్రయించిన ఆమె ప్రస్తుతం రోజుకు సుమారు 50 ప్యాకెట్ల వరకు అమ్ముతున్నారు. అరిటాకులో చుట్టి ఇచ్చే ఒక్క బిర్యానీ ప్యాకెట్ ధర రూ.140. కస్టమర్ల నుంచి వచ్చే ఫీడ్‌బ్యాక్‌ను స్వీకరిస్తూ బిర్యానీ తయారీ విధానంలో మార్పులు చేసుకుంటూ రుచిని మరింత మెరుగుపరుచుకుంటున్నట్లు అనిజ చెబుతున్నారు.
వ్యాపార విస్తరణతో పాటు మరో పెద్ద లక్ష్యం
పెరుగుతున్న డిమాండ్‌కు అనుగుణంగా అనిజకు సహాయం చేసేందుకు మరో మహిళ కూడా ఆమెతో కలిసి పనిచేయడం ప్రారంభించారు. ఇకపై హాట్‌బాక్స్‌లకు మాత్రమే పరిమితం కాకుండా టెంట్ తరహా నిర్మాణాన్ని ఏర్పాటు చేసి వ్యాపారాన్ని విస్తరించాలని అనిజ భావిస్తున్నారు. అంతేకాదు.. తన భవిష్యత్ ప్రణాళికల్లో సామాజిక బాధ్యతకూ చోటిచ్చారు. దివ్యాంగులను కూడా తన వ్యాపారంలో భాగస్వామ్యం చేసి వారికి స్వయం ఉపాధి కల్పించాలన్నది ఆమె లక్ష్యం.
11 ఏళ్ల నిరీక్షణ.. ప్రారంభంలో ఎదురైన నిరాశ.. కస్టమర్ల సూచనలు.. సోషల్ మీడియాలో వైరల్ అయిన ఒక్క వీడియో.. వీటన్నింటినీ దాటుకుంటూ అనిజ తన కలను ముందుకు తీసుకెళ్తున్నారు. పట్టుదలతో మొదలుపెట్టిన చిన్న ప్రయత్నం కూడా సరైన సమయంలో పెద్ద అవకాశంగా మారుతుందని ఆమె ప్రయాణం చెబుతోంది.
