ఎయిర్ ఇండియా విమాన ఘటనలో సంచలనం.. డ్రగ్ టెస్ట్‌లో పైలట్ పాజిటివ్?

న్యూఢిల్లీ, ఆగస్టు 9 (జనవాణి):

ఫుకెట్-ఢిల్లీ మధ్య నడిచిన ఎయిర్ ఇండియా విమానంలో ఇటీవల చోటుచేసుకున్న తీవ్ర కుదుపుల ఘటనలో కొత్త పరిణామం వెలుగులోకి వచ్చింది. ఆ విమానాన్ని నడిపిన ఇద్దరు పైలట్లలో ఒకరు ఘటన అనంతరం నిర్వహించిన డోప్ (డ్రగ్) పరీక్షలో పాజిటివ్‌గా తేలినట్లు సమాచారం. దీంతో ఇద్దరు పైలట్లను తాత్కాలికంగా విమాన సర్వీసుల నుంచి తప్పించి విచారణ చేపట్టినట్లు తెలుస్తోంది.

ఆగస్టు 5న ఫుకెట్ నుంచి ఢిల్లీకి బయలుదేరిన ఎయిర్ ఇండియా AI2379 (ఎయిర్‌బస్ A320) విమానం ఒడిశా గగనతలం సమీపంలో తీవ్ర గాలివానల కారణంగా భారీ కుదుపులకు గురైంది. దాదాపు ఐదు నిమిషాల పాటు కొనసాగిన ఈ ఘటనలో విమానం ఒక్కసారిగా సుమారు 300 అడుగుల మేర ఎత్తు కోల్పోయింది.

ఈ ఘటనలో 137 మంది ప్రయాణికులు, ఎనిమిది మంది సిబ్బంది ప్రయాణిస్తుండగా.. 13 మంది ప్రయాణికులు, నలుగురు క్యాబిన్ క్రూ సభ్యులు కలిపి మొత్తం 17 మంది గాయపడ్డారు. కొంతమంది క్యాబిన్ సిబ్బందికి వెన్నెముక దిగువ భాగం, మెడ వద్ద తీవ్ర గాయాలయ్యాయని కేంద్ర పౌర విమానయాన శాఖ మంత్రి కే. రామ్మోహన్ నాయుడు తెలిపారు. వారికి దీర్ఘకాలిక విశ్రాంతి సూచించినట్లు వెల్లడించారు.

పైలట్‌కు డ్రగ్ టెస్ట్

ఇలాంటి ప్రధాన విమాన ఘటనల అనంతరం అమల్లో ఉన్న నిబంధనల ప్రకారం ఢిల్లీ చేరుకున్న తర్వాత ఇద్దరు పైలట్లకు డ్రగ్ పరీక్షలు నిర్వహించారు. ఈ పరీక్షల్లో ఒక పైలట్ సైకోయాక్టివ్ పదార్థాలకు పాజిటివ్‌గా తేలినట్లు అధికార వర్గాలు వెల్లడించాయి.

డీజీసీఏ దర్యాప్తు

ఈ ఘటనపై డైరెక్టరేట్ జనరల్ ఆఫ్ సివిల్ ఏవియేషన్ (DGCA) సమగ్ర దర్యాప్తు ప్రారంభించింది. విమాన నిర్వహణలో అన్ని నిబంధనలు పాటించారా? పైలట్ల చర్యల వల్ల విమానం ఒక్కసారిగా ఎత్తు కోల్పోయిందా? అనే కోణాల్లో విచారణ కొనసాగుతోంది.

డీజీసీఏ నివేదిక ఆధారంగా అవసరమైతే ఈ కేసును ఎయిర్‌క్రాఫ్ట్ యాక్సిడెంట్ ఇన్వెస్టిగేషన్ బ్యూరో (AAIB)కి బదిలీ చేసే అంశంపై నిర్ణయం తీసుకుంటామని పౌర విమానయాన శాఖ వర్గాలు తెలిపాయి.

ఎయిర్ ఇండియా స్పందన

ఈ ఘటనపై స్పందించిన ఎయిర్ ఇండియా ప్రతినిధి.. పైలట్లకు డ్రగ్ పరీక్షలు నిర్వహించిన విషయం నిజమేనని, అయితే ఆ పరీక్షల అధికారిక ఫలితాలు ఇంకా తమకు అందలేదని తెలిపారు.

"పౌర విమానయాన నిబంధనల ప్రకారం పరీక్షలు నిర్వహించారు. అయితే అధికారిక నివేదిక మాకు అందలేదు. అందువల్ల ఫలితాలపై ప్రస్తుతం వ్యాఖ్యానించలేం. ఎయిర్ ఇండియా నిబంధనల ప్రకారం సిబ్బందికి క్రమం తప్పకుండా డ్రగ్ పరీక్షలు నిర్వహిస్తుంటుంది. ఈ వ్యవహారంలో సంబంధిత అధికారులతో పూర్తిగా సహకరిస్తాం" అని సంస్థ పేర్కొంది.

ఒకవేళ డీజీసీఏ విచారణలో డ్రగ్ టెస్ట్ ఫలితాలు అధికారికంగా ధ్రువీకరించబడితే, సంబంధిత పైలట్‌పై పునరావాస చర్యలతో పాటు క్రమశిక్షణాపరమైన చర్యలు తీసుకునే అవకాశం ఉంది.

Loading Tweet...

Loading Tweet...