అమెరికాలోని మేరీల్యాండ్ రాష్ట్రం, బాల్టిమోర్(Baltimore) నగరంలో ప్రతిష్ఠాత్మకంగా నిర్వహించిన అమెరికన్ తెలుగు అసోసియేషన్ (ATA) 19వ మహాసభల్లో బీజేపీ తెలంగాణ రాష్ట్ర అధ్యక్షుడు రామచందర్ రావు పాల్గొన్నారు. ప్రపంచంలోని వివిధ ప్రాంతాల నుంచి వేలాది మంది ప్రవాస తెలుగు ప్రజలు, వ్యాపారవేత్తలు, సామాజికవేత్తలు, తెలుగు సంఘాల ప్రతినిధులు ఈ మహాసభలకు హాజరయ్యారు.
ఈ సందర్భంగా రామచందర్ రావు అమెరికాలోని పలు రాష్ట్రాల నుంచి వచ్చిన ప్రవాస తెలుగువారితో ఆత్మీయంగా సమావేశమయ్యారు. తెలంగాణ రాష్ట్ర అభివృద్ధి, పెట్టుబడుల అవకాశాలు, పారిశ్రామిక రంగంలో పురోగతి, ఐటీ, మౌలిక వసతులు, విద్య, వైద్య రంగాల్లో రాష్ట్ర ప్రభుత్వం చేపడుతున్న అభివృద్ధి కార్యక్రమాలపై వారితో చర్చించారు. తెలంగాణ అభివృద్ధిలో ప్రవాస భారతీయుల పాత్ర ఎంతో కీలకమని ఆయన పేర్కొన్నారు.
ప్రధానమంత్రి నరేంద్ర మోదీ నాయకత్వంలో భారత్ ప్రపంచ వేదికపై సాధిస్తున్న విజయాలను ప్రస్తావించిన ఆయన.. ప్రపంచ దేశాల్లో భారతదేశ ప్రతిష్ఠ మరింత పెరిగిందని అన్నారు. విదేశాల్లో నివసిస్తున్న భారతీయులు దేశానికి మంచి గుర్తింపు తీసుకొస్తున్నారని, దేశ అభివృద్ధిలో వారి భాగస్వామ్యం ప్రశంసనీయమని తెలిపారు.
అమెరికాలో తెలుగు భాష, సంస్కృతి, సంప్రదాయాలను భావితరాలకు చేరవేసేందుకు అమెరికన్ తెలుగు అసోసియేషన్ (ATA) చేస్తున్న కృషిని ఆయన అభినందించారు. తెలుగు భాష పరిరక్షణతో పాటు సాంస్కృతిక వారసత్వాన్ని విదేశాల్లో కొనసాగించడం అభినందనీయమని పేర్కొన్నారు. తెలంగాణలో పెట్టుబడులు, ఉపాధి అవకాశాల కల్పన, సామాజిక సేవా కార్యక్రమాలు, విద్య, ఆరోగ్య రంగాల్లో ప్రవాస భారతీయులు మరింతగా భాగస్వాములు కావాలని రామచందర్ రావు పిలుపునిచ్చారు. రాష్ట్ర అభివృద్ధికి ప్రభుత్వం చేపడుతున్న కార్యక్రమాలకు ప్రవాస తెలుగువారి సహకారం మరింత బలోపేతం కావాలని ఆకాంక్షించారు.
ఈ కార్యక్రమంలో అమెరికాలోని వివిధ రాష్ట్రాల నుంచి వచ్చిన ప్రవాస తెలుగు ప్రజలు, తెలుగు సంఘాల ప్రతినిధులు, సామాజికవేత్తలు, వ్యాపారవేత్తలు తదితరులు పాల్గొన్నారు.
