ప్రపంచ దేశాలు తిరుగుతూ ట్రావెల్ వీడియోలతో కోట్లాది మంది అభిమానులను సంపాదించుకున్న ప్రముఖ థాయ్ యూట్యూబర్ హ్లున్ సోలో (Hlun Solo) అనుమానాస్పద పరిస్థితుల్లో మృతి చెందారు. జార్జియాలోని రాజధాని టిబిలిసిలో హోటల్ గదిలో ఆయన మృతదేహం లభ్యమవడంతో అభిమానులు తీవ్ర దిగ్భ్రాంతికి గురయ్యారు.
హోటల్ గదిలో మృతదేహం
థాయ్‌లాండ్‌కు చెందిన ప్రముఖ ట్రావెల్ యూట్యూబర్ హ్లున్ సోలో అసలు పేరు బోవోర్న్‌థాట్ పెంగ్‌సుక్. 27 ఏళ్ల ఆయన ఈ నెల ప్రారంభంలో ట్రావెల్ వీడియోల చిత్రీకరణ కోసం జార్జియా వెళ్లారు. అయితే జూలై 13 తర్వాత కుటుంబ సభ్యులకు ఆయన నుంచి ఎలాంటి సమాచారం రాలేదు. పలుమార్లు సంప్రదించేందుకు ప్రయత్నించినా స్పందన లేకపోవడంతో కుటుంబ సభ్యులు ఆందోళన చెందారు.
చివరకు జార్జియాలోని టిబిలిసిలో ఓ హోటల్ గదిలో ఆయన మృతదేహాన్ని పోలీసులు గుర్తించారు. ఈ విషయాన్ని జార్జియా పోలీసులు అధికారికంగా ధృవీకరించడంతో పాటు ఘటనపై దర్యాప్తు ప్రారంభించినట్లు తెలిపారు.
అసలు ఏం జరిగింది?
హ్లున్ సోలో మరణానికి గల కారణాలు ఇంకా వెల్లడికాలేదు. స్థానిక మీడియా కథనాల ప్రకారం, ఆయన మృతి వెనుక ఉన్న పరిస్థితులపై అధికారులు దర్యాప్తు చేస్తున్నారు. కుటుంబ, స్నేహితుల సమాచారం ప్రకారం, సోషల్ మీడియాలో వచ్చిన సందేశాల ద్వారానే హ్లున్ సోదరుడు తొలుత ఈ విషయం తెలుసుకున్నట్లు తెలుస్తోంది. అయితే థాయ్ కాన్సులేట్ నుంచి అధికారిక సమాచారం వచ్చే వరకు కుటుంబ సభ్యులు ఎలాంటి ఏర్పాట్లు చేయలేదని వెల్లడించారు.
హ్లున్ సోలో ఎవరు?
బడ్జెట్ ట్రావెల్, సోలో బ్యాక్‌ప్యాకింగ్ వీడియోలతో హ్లున్ సోలో సోషల్ మీడియాలో విశేష గుర్తింపు పొందారు. ప్రపంచంలోని పలు దేశాల్లో చేసిన ప్రయాణాలను వీడియోల రూపంలో పంచుకుంటూ తక్కువ ఖర్చుతో విదేశీ పర్యటనలు ఎలా చేయాలో సూచనలు అందించేవారు.
ఫేస్‌బుక్‌లో ఆయనకు సుమారు 25 లక్షల మంది ఫాలోవర్లు ఉండగా, యూట్యూబ్‌లో 10 లక్షలకుపైగా సబ్‌స్క్రైబర్లు ఉన్నారు. ఆయన చివరిగా అప్‌లోడ్ చేసిన వీడియో ఇప్పటికే 24 లక్షలకు పైగా వ్యూస్ సాధించగా, వేలాది మంది అభిమానులు కామెంట్ల రూపంలో నివాళులు అర్పిస్తున్నారు.
కష్టాల నుంచి స్టార్ యూట్యూబర్‌గా..
థాయ్‌లాండ్‌లోని కలాసిన్ ప్రాంతానికి చెందిన బోవోర్న్‌థాట్ చిన్న వయసులోనే తండ్రిని కోల్పోయారు. అమ్మమ్మ వద్ద పెరిగిన ఆయన మొదట ఫ్యాక్టరీలో ఉద్యోగం చేశారు. అనంతరం స్కాలర్‌షిప్ సాధించి బ్యాంకాక్‌లోని చులాలాంగ్‌కోర్న్ యూనివర్సిటీలో పొలిటికల్ సైన్స్‌లో పట్టా పొందారు.
ఆ తర్వాత సాధారణ ఉద్యోగాన్ని వదిలి పూర్తిస్థాయిలో కంటెంట్ క్రియేటర్‌గా మారారు. ప్రపంచవ్యాప్తంగా ఒంటరిగా పర్యటిస్తూ ట్రావెల్ వీడియోలు రూపొందించి లక్షలాది మంది అభిమానులను సంపాదించారు.
