హైదరాబాద్‌, ఆగస్టు 14 (జనవాణి): నల్సార్‌ న్యాయ విశ్వవిద్యాలయ విద్యార్థుల నిరసన వ్యవహారంలో బార్ కౌన్సిల్‌ ఆఫ్‌ ఇండియా (బీసీఐ) జోక్యంపై సుప్రీంకోర్టు ప్రధాన న్యాయమూర్తి (సీజేఐ) జస్టిస్‌ సూర్యకాంత్ తీవ్రంగా స్పందించారు. “ఇది విద్యార్థులకు, నాకు మధ్య విషయం.. ఇందులో మీ జోక్యం ఏంటి?” అంటూ తీవ్ర ఆగ్రహం వ్యక్తం చేశారు. నల్సార్‌ విద్యార్థులు తమ అభిప్రాయాలను వ్యక్తం చేస్తూ శాంతియుతంగా, చట్టబద్ధంగా నిరసన తెలిపే హక్కు ఉందని స్పష్టం చేశారు. విద్యార్థులు తమ గొంతు వినిపించకుండా అడ్డుకునే చర్యలను తాము అనుమతించబోమని తేల్చిచెప్పారు. ఈ వ్యవహారంలో విద్యార్థులు, అధ్యాపకులపై ఎలాంటి శిక్షాత్మక లేదా క్రిమినల్‌ చర్యలు తీసుకోరాదని సీజేఐ నేతృత్వంలోని ధర్మాసనం మధ్యంతర ఆదేశాలు జారీ చేసింది.
‘బీసీఐకి జోక్యం చేసుకునే హక్కు లేదు’
నల్సార్‌ విద్యార్థుల వ్యవహారంలో బీసీఐ అనవసరంగా జోక్యం చేసుకుంటోందని సీనియర్‌ న్యాయవాది కె. పరమేశ్వర్‌ సుప్రీంకోర్టు దృష్టికి తీసుకెళ్లారు. విశ్వవిద్యాలయంలో జరుగుతున్న విషయాల్లో బీసీఐకి జోక్యం చేసుకునే అధికారం లేదని, విద్యార్థుల భావ ప్రకటనా స్వేచ్ఛకు ఇది విఘాతం కలిగిస్తోందని పేర్కొన్నారు. దీనిపై సీజేఐ సూర్యకాంత్ స్పందిస్తూ.. “మేము మీతోనే ఉన్నాం. ఇది పూర్తిగా అనవసరం. వారికి ఇందులో జోక్యం చేసుకునే హక్కు లేదు. విద్యార్థులు నాకు లేఖ రాశారు. ఇది నాకు, విద్యార్థులకు మధ్య విషయం. మా మధ్య సంభాషణ జరుగుతోంది” అని వ్యాఖ్యానించారు.
‘విద్యార్థులకు నిరసన తెలిపే హక్కుంది’
శాంతియుతంగా, చట్టబద్ధంగా నిరసన తెలిపే విద్యార్థుల హక్కును ఎవరూ అడ్డుకోలేరని సీజేఐ స్పష్టం చేశారు. తన విద్యార్థి దశను కూడా గుర్తుచేసుకున్న ఆయన.. తాను కూడా యువకుడిగా ఉన్నప్పుడు విద్యార్థి కార్యకలాపాల్లో చురుకుగా పాల్గొన్నట్లు తెలిపారు. “వారికి నిరసన తెలిపే హక్కుంది. వారిని ఎవరు ఆపగలరు? వారు చట్టబద్ధంగా, శాంతియుతంగా నిరసన వ్యక్తం చేస్తున్నంత వరకు తమ గొంతు వినిపించే హక్కు ఉంది. మనం విశాల హృదయంతో వ్యవహరించాలి. వారు తప్పు చేసినా మాట్లాడే హక్కు వారికి ఉంటుంది” అని సీజేఐ పేర్కొన్నారు.
బీసీఐపై సుప్రీంకోర్టు నోటీసులు
నల్సార్‌ విద్యార్థులపై బీసీఐ తీసుకున్న చర్యలను భవిష్యత్తులో పునరావృతం చేయకుండా ఆదేశాలు ఇవ్వాలని కోరుతూ దాఖలైన పిటిషన్‌ను సుప్రీంకోర్టు విచారణకు స్వీకరించింది. సీజేఐ సూర్యకాంత్, జస్టిస్‌ జాయ్‌మాల్య బాగ్చి, జస్టిస్‌ వి. మోహనలతో కూడిన ధర్మాసనం బీసీఐకి నోటీసులు జారీ చేసింది. రెండు వారాల్లోగా కౌంటర్‌ అఫిడవిట్‌ దాఖలు చేయాలని ఆదేశించింది.
అలాగే బీసీఐ, అన్ని రాష్ట్ర బార్ కౌన్సిళ్లు.. నల్సార్‌ సహా జాతీయ న్యాయ విశ్వవిద్యాలయాలు, ఇతర విశ్వవిద్యాలయాల విద్యార్థులు, అధ్యాపకులపై ఈ వ్యవహారానికి సంబంధించి శిక్షాత్మక లేదా క్రిమినల్‌ చర్యలు తీసుకోకుండా ధర్మాసనం ఆదేశించింది.
