రేషన్ కార్డు కాగితం కాదు.. పేదల ఆత్మగౌరవం: సీఎం రేవంత్ రెడ్డి

సంగారెడ్డి, ఆగస్టు 15 (జనవాణి): తెలంగాణలో పేదల ఆత్మగౌరవమే లక్ష్యంగా తమ ప్రభుత్వం సంక్షేమ పథకాలను అమలు చేస్తోందని సీఎం రేవంత్ రెడ్డి అన్నారు. సంగారెడ్డి జిల్లా కేంద్రంలో నిర్వహించిన స్మార్ట్ రేషన్ కార్డుల పంపిణీ కార్యక్రమంలో ఆయన ప్రసంగించారు.

రేషన్ కార్డు కేవలం కాగితం కాదు

రేషన్ కార్డు కేవలం కాగితం కాదని, ప్లాస్టిక్ కార్డు అంతకంటే కాదని సీఎం అన్నారు. ఉచిత బియ్యం తెచ్చుకునే సాధనం మాత్రమే కాకుండా.. అది పేదల ఆత్మగౌరవానికి ప్రతీక అని పేర్కొన్నారు. ఎక్కడికి వెళ్లినా ఆకలి తీర్చుకునే భరోసా రేషన్ కార్డు కల్పిస్తుందని, పేదలు ఎవరి ముందు చేయి చాచాల్సిన అవసరం లేకుండా ఉండాలన్నదే ప్రభుత్వ లక్ష్యమన్నారు. పేదవాడు ఆకలితో పస్తులు ఉండకూడదనే సంకల్పంతో నిత్యావసర వస్తువుల పంపిణీ కోసం రేషన్ వ్యవస్థను తీసుకొచ్చింది కాంగ్రెస్ ప్రభుత్వాలేనని రేవంత్ రెడ్డి గుర్తు చేశారు.

ఇందిరాగాంధీని ఆదర్శంగా తీసుకున్నాం

మెదక్ పార్లమెంట్ స్థానం నుంచి ఇందిరాగాంధీ పోటీ చేసినప్పుడు ప్రజలు ఆమెను గెలిపించారని సీఎం తెలిపారు. అనంతరం ప్రధానిగా దేశానికి సేవ చేయడంతో పాటు మెదక్ ప్రాంతాన్ని పారిశ్రామికంగా అభివృద్ధి చేశారని పేర్కొన్నారు. అనేక మందికి ఉద్యోగ, ఉపాధి అవకాశాలు కల్పించిన ఇందిరాగాంధీ.. పేదల సంక్షేమం, ఆత్మగౌరవం కోసం నిరంతరం కృషి చేశారని అన్నారు. ఆమెను ఆదర్శంగా తీసుకుని ప్రజా పాలనలో పేదలకు సంక్షేమాన్ని అందిస్తున్నామని చెప్పారు.

బీజేపీ, బీఆర్ఎస్ ఒకటే

బీజేపీ, బీఆర్ఎస్ వేర్వేరు కాదని.. నాణేనికి బొమ్మ, బొరుసు లాంటి పార్టీలని రేవంత్ రెడ్డి విమర్శించారు. ఉచిత కరెంట్, సన్నబియ్యం, ఇందిరమ్మ ఇళ్లు, ఫీజు రీయింబర్స్‌మెంట్, ఆరోగ్యశ్రీ వంటి అంశాలపై ప్రభుత్వాన్ని ప్రశ్నిస్తున్నామని చెప్పే వారికి ప్రజలు గత పాలనను కూడా గుర్తు చేసుకోవాలని సూచించారు. గతంలో పేదలకు దొడ్డు బియ్యం మాత్రమే అందించారని, వాటిని పశువులు, కోళ్ల దాణా కోసం, ఇథనాల్ తయారీకి, బీర్ల కంపెనీలకు ఉపయోగించే పరిస్థితి ఉండేదని సీఎం ఆరోపించారు. పదేళ్ల బీఆర్ఎస్ పాలనలోనూ, కేంద్రంలో మోదీ పాలనలోనూ పేదలకు సన్నబియ్యం ఇవ్వాలనే ఆలోచన చేయలేదని విమర్శించారు.

3.48 కోట్ల మందికి సన్నబియ్యం పంపిణీ

తమ ప్రభుత్వం రాష్ట్రవ్యాప్తంగా 3.48 కోట్ల మందికి ప్రతి నెలా సుమారు 2.16 లక్షల క్వింటాళ్ల సన్నబియ్యాన్ని పంపిణీ చేస్తోందని రేవంత్ రెడ్డి తెలిపారు. 17 వేలకుపైగా రేషన్ షాపుల ద్వారా ఈ బియ్యం అందిస్తున్నామని చెప్పారు. ప్రస్తుతం ప్రభుత్వం అందిస్తున్న సన్నబియ్యాన్ని పేదలు పిల్లలకు వండి పెడుతున్నారని, కుటుంబాలు కడుపునిండా భోజనం చేసి ప్రశాంతంగా నిద్రపోతున్నాయని సీఎం పేర్కొన్నారు. ప్రభుత్వం సన్నబియ్యం పంపిణీ చేయడం వల్ల మార్కెట్‌లో సన్నబియ్యం ధర కూడా కిలో రూ.45కు తగ్గిందని రేవంత్ రెడ్డి తెలిపారు.