హైదరాబాద్, ఆగస్టు 18 (జనవాణి): తెలంగాణలో ఓటర్ల జాబితా ప్రత్యేక సమగ్ర సవరణ (SIR) ప్రక్రియలో భాగంగా విడుదలైన ముసాయిదా జాబితా హైదరాబాద్ ఓటర్లపై ఆసక్తికర గణాంకాలను వెలుగులోకి తెచ్చింది. రాష్ట్రవ్యాప్తంగా 73.3 లక్షల మంది ఓటర్లు ASDD (Absent, Shifted, Dead, Duplicate) కేటగిరీలో ఉన్నట్లు అధికారులు గుర్తించారు. వీరిలో దాదాపు 43 లక్షల మంది హైదరాబాద్, మేడ్చల్‌-మల్కాజిగిరి, రంగారెడ్డి జిల్లాలకు చెందినవారే. రాష్ట్రంలోని మొత్తం ఓటర్లలో గ్రేటర్‌ హైదరాబాద్ ప్రాంతం వాటా సుమారు 33.8 శాతం కాగా.. ASDD జాబితాలో మాత్రం ఈ ప్రాంతం వాటా 58.6 శాతానికి చేరింది. గత ఓటర్ల జాబితాతో పోలిస్తే ముసాయిదా జాబితాలో ఓటర్ల సంఖ్య తగ్గడానికి హైదరాబాద్ మెట్రో ప్రాంతమే ప్రధాన కారణంగా కనిపిస్తోందని రాష్ట్ర ఎన్నికల ప్రధాన అధికారి సీ. సుదర్శన్‌రెడ్డి తెలిపారు.
హైదరాబాద్‌లోనే 19.4 లక్షల మంది
హైదరాబాద్ జిల్లాలో గతంలో ఉన్న ఓటర్లలో 19.4 లక్షల మందిని ASDD కేటగిరీలో గుర్తించారు. ఇది జిల్లా పాత ఓటర్లలో సుమారు 40.9 శాతం. రాష్ట్రవ్యాప్తంగా ఉన్న ASDD ఓటర్లలో హైదరాబాద్ జిల్లా వాటా దాదాపు 26.4 శాతంగా ఉంది. హైదరాబాద్ జిల్లాలోని ఏడు అసెంబ్లీ నియోజకవర్గాల్లో ఎంఐఎం ప్రాతినిధ్యం వహిస్తున్న స్థానాల్లో కలిపి 9.4 లక్షల మంది ASDD జాబితాలో ఉన్నారు. అయితే ASDD ఓటర్ల సంఖ్య కేవలం పాతబస్తీ లేదా ఎంఐఎం నియోజకవర్గాలకే పరిమితం కాలేదని గణాంకాలు స్పష్టం చేస్తున్నాయి.
మూడు జిల్లాల్లో 37.67 శాతం
హైదరాబాద్, మేడ్చల్‌-మల్కాజిగిరి, రంగారెడ్డి జిల్లాలను కలిపి చూస్తే సుమారు 1.1 కోట్ల మంది ఓటర్లలో 37.67 శాతం మంది ASDD కేటగిరీలో ఉన్నారు. హైదరాబాద్‌లో ఈ శాతం సుమారు 40గా ఉండగా.. మేడ్చల్‌-మల్కాజిగిరిలో 35.9 శాతం, రంగారెడ్డిలో 34.7 శాతంగా ఉంది. వికారాబాద్‌లో ASDD ఓటర్ల శాతం 20.6గా ఉండటం.. హైదరాబాద్ మెట్రో ప్రాంతానికి, రాష్ట్రంలోని ఇతర ప్రాంతాలకు మధ్య ఉన్న వ్యత్యాసాన్ని సూచిస్తోంది.
శాశ్వతంగా తరలిపోయిన వారే ఎక్కువ
ASDD కేటగిరీలో అత్యధికంగా శాశ్వతంగా ఇతర ప్రాంతాలకు తరలిపోయిన ఓటర్లు ఉన్నట్లు అధికారులు గుర్తించారు. హైదరాబాద్‌లో 13.4 లక్షలు, మేడ్చల్‌-మల్కాజిగిరిలో 7.9 లక్షలు, రంగారెడ్డిలో 7.7 లక్షల మంది శాశ్వతంగా ఇతర ప్రాంతాలకు వెళ్లిన ఓటర్లుగా గుర్తించారు. ఈ మూడు జిల్లాల్లో కలిపి ఈ సంఖ్య 29.1 లక్షలు.
శివారు నియోజకవర్గాల్లోనూ భారీ సంఖ్య
శేరిలింగంపల్లిలో 3.2 లక్షల మంది ASDD జాబితాలో ఉండగా.. ఇది మొత్తం ఓటర్లలో 42.6 శాతం. లాల్‌బహదూర్‌నగర్‌లో 2.7 లక్షలు (44.4%), రాజేంద్రనగర్‌లో 2.4 లక్షలు (38.8%), మహేశ్వరంలో 2.3 లక్షలు (40.9%) ASDD కేటగిరీలో ఉన్నారు. మేడ్చల్‌-మల్కాజిగిరి జిల్లాలో ఉప్పల్‌లో 2.1 లక్షలు (39.8%), మల్కాజిగిరిలో 1.9 లక్షలు (37.6%), కుత్బుల్లాపూర్‌లో 2.7 లక్షలు (37%), కూకట్‌పల్లిలో 1.7 లక్షలు (34.5%), మేడ్చల్‌లో 2.1 లక్షలు (31.4%) ASDD కేటగిరీలో ఉన్నట్లు గణాంకాలు వెల్లడిస్తున్నాయి.
మొత్తంగా SIR ముసాయిదా జాబితా హైదరాబాద్ మెట్రో ప్రాంతంలోని ఓటర్ల సంఖ్యలో భారీ మార్పులను సూచిస్తోంది. ముఖ్యంగా వేగంగా విస్తరిస్తున్న శివారు ప్రాంతాల్లో ఇతర ప్రాంతాలకు శాశ్వతంగా తరలిపోయిన ఓటర్ల సంఖ్య అధికంగా ఉండటం చర్చనీయాంశంగా మారింది.
